ទីក្រុងប៉ារីស ៖ រដ្ឋាភិបាលបារាំងបាននិយាយកាលពីថ្ងៃអាទិត្យថា សហរដ្ឋអាមេរិកអាចនឹងជួបប្រទះការឆ្លើយតបរួមគ្នាពីអឺរ៉ុប បន្ទាប់ពីប្រទេសអាល្លឺម៉ង់បង្ហាញសញ្ញាថា ពួកគេចង់ចរចា ។
ព្រោះតែវិស័យឧស្សាហកម្មយានយន្តដ៏ធំរបស់អាល្លឺម៉ង់ជួបប្រទះនឹងការគំរាមកំហែងពីពន្ធអាមេរិក លោកស្រីអធិការបតី Angela Merkel បាននិយាយកាលពីថ្ងៃព្រហស្បតិ៍មុនថា លោកស្រីចង់ឲ្យសហភាពអឺរ៉ុបយកពន្ធលើការនាំចូលរថយន្តរបស់អាមេរិកវិញ។
លោក Bruno Le Maire រដ្ឋមន្ត្រីហិរញ្ញវត្ថុបារាំង បាននិយាយថា ៖« ប្រសិនបើថ្ងៃស្អែកមានការបង្កើនពន្ធក្នុងវិស័យរថយន្ត ការឆ្លើយតបរបស់ពួកយើងគួរតែរួបរួមគ្នា និងរឹងមាំ ដើម្បីបង្ហាញថា អឺរ៉ុបគឺជាថាមពលរួបរួម និងមានអធិបតេយ្យភាព » ។
គួរបញ្ជាក់ថា កាលពីដើមខែមិថុនា លោកប្រធានាធិបតីអាមេរិក ដូណាល់ ត្រាំ បានដាក់ពន្ធ២៥%លើដែកថែប និង១០%លើអាលុយមីញ៉ូមនាំចូលពីសហភាពអឺរ៉ុប (EU), កាណាដា និងម៉ិកស៊ិក ។
យោងតាមច្បាប់របស់អង្គការពាណិជ្ជ កម្មពិភពលោក (WTO) សហភាពអឺរ៉ុបមិនអាចកាត់បន្ថយពន្ធនាំចូលសម្រាប់តែរថយន្តអាមេរិកទេ ប៉ុន្តែពួកគេត្រូវតែកាត់បន្ថយពន្ធរថយន្តនាំចូលពីគ្រប់សមាជិករបស់ WTO ។
ក្រុមហ៊ុនរថយន្តបារាំងប្រហែលជាមិនទទួលរងផលប៉ះពាល់ពីពន្ធនេះប៉ុន្មានទេ ប៉ុន្តែពួកគេនៅតែអាចជួបប្រទះនឹងការប្រកួតប្រជែងពីក្រុមហ៊ុនអាស៊ី ប្រសិនបើសហភាពអឺរ៉ុបកាត់បន្ថយពន្ធ ។
លោក Bruno Le Maire ក៏បានបន្តជំរុញឲ្យសហភាពអឺរ៉ុបព្រមព្រៀងគ្នាដាក់ពន្ធលើក្រុមហ៊ុនបច្ចេកវិទ្យាធំៗដូចជា Google និង Apple ផងដែរ ព្រោះពួកគេបានទាញយកអត្ថប្រយោជន៍ពីប្រទេសមានអត្រាពន្ធទាប ៕
ចែករំលែកព័តមាននេះ