ទីក្រុងម៉ូស្គូ៖ ថ្ងៃនេះ រុស្ស៊ីវាយប្រហារស្លាប់ជនស៊ីវិលបីនាក់ និងរបួសរាប់សិបនាក់បន្ទាប់ពីលោកពូទីនទើបតែនិយាយព្រមានថ្មីៗថាបណ្ដាប្រទេសនៅអឺរ៉ុបមិនត្រូវបញ្ជូនកងទ័ពទៅអ៊ុយក្រែនជាដាច់ខាត។ បើមិនដូច្នេះទេ មានន័យថាពួកគេធ្វើសង្គ្រាមដោយផ្ទាល់ជាមួយរុស្ស៊ី។ អ៊ុយក្រែនសព្វថ្ងៃនេះកំពុងទទួលរងសម្ពាធកាន់តែខ្លាំងពីការវាយប្រហារឥតបន្ធូរដៃពីសំណាក់យោធារុស្ស៊ីដែលដឹងចំណុចខ្សោយថាអ៊ុយក្រែនកំពុងខ្វះខាតប្រព័ន្ធការពារដែនអាកាស។ ដូច្នេះ រុស្ស៊ីវាយប្រហារដោយមីស៊ីលផ្លោងផង និងដ្រូនដែលប្រើម៉ាស៊ីនកម្លាំងខ្លាំងផង។ រុស្ស៊ីច្រើនវាយប្រហារទីតាំងផលិតថាមពលមុនពេលរដូវរងាចូលមកដល់។
មន្ត្រីរដ្ឋាភិបាលអ៊ុយក្រែនចាត់ទុកថានេះជាសង្គ្រាមចិត្តសាស្ត្រដើម្បីបំបាក់ទឹកចិត្តរបស់ជនស៊ីវិល។ មនុស្ស២នាក់ស្លាប់ និងម្នាក់រងរបួសនៅពេលដ្រូនជាច្រើនគ្រឿងរបស់រុស្ស៊ីវាយប្រហារអគារស្នាក់នៅមួយខ្នងកាលពីយប់មិញនៅទីក្រុងហ្សាប៉ូរីហ្សៀ។ ក្រៅពីនេះ នៅទីក្រុងគ្រីវយីរីដែលជាស្រុកកំណើតរបស់លោកហ្សេឡិនស្គី មនុស្សម្នាក់ស្លាប់ និងបីនាក់រងរបួស។ នៅទីក្រុងកំពង់ផែអូដេសា និងតំបន់ជុំវិញនោះ មនុស្ស២៨នាក់រងរបួសដោយសារការវាយប្រហារដ៏ធំមួយ។ នៅក្នុងចំណោមអគារនានាដែលរងការវាយប្រហារក៏មានអគារស្នាក់នៅរបស់ប្រជាជនដ៏ខ្ពស់ស្កឹមស្កៃមួយខ្នងផងដែរ។ នៅជាន់ខាងលើនៃអគារត្រូវបានបំផ្លិចបំផ្លាញខ្ទេចខ្ទីអស់។
សូមរំលឹកថាលោកពូទីនទើបតែថ្លែងប្រាប់អ្នកសារព័ត៌មាននៅឯវេទិកាប្រ៊ីកស៍ (BRICS) រៀបចំនៅឥណ្ឌាកាលពីថ្ងៃសុក្រថាប្រសិនបើរដ្ឋាភិបាលនៅអឺរ៉ុបហ៊ានបញ្ជូនកងទ័ពទៅអ៊ុយក្រែន មានន័យថាពួកគេធ្វើសង្គ្រាមដោយផ្ទាល់ជាមួយរុស្ស៊ី។ លោកថ្លែងថាឥឡូវនេះ ពួកគេកំពុងជំនុំគ្នាថាត្រូវបញ្ជូនកងទ័ពទៅអ៊ុយក្រែនរបៀបណា។ មានន័យថានោះជាការធ្វើសង្គ្រាមជាមួយរុស្ស៊ីហើយ។ ថ្នាក់ដឹកនាំអឺរ៉ុបខ្លះធ្លាប់សន្យាថាពួកគេអាចនឹងបញ្ជូនកងទ័ពរក្សាសន្តិភាពទៅអ៊ុយក្រែនពិតមែន។ ប៉ុន្តែលុះត្រាតែសង្គ្រាមចប់សិន។ ទោះជាបែបនេះក្ដី រុស្ស៊ីនៅតែបដិសេធម្ដងហើយម្ដងទៀតថាខ្លួនមិនអាចទទួលយកបានជាដាច់ខាត។
នៅប្រទេសឥណ្ឌាដដែល លោកពូទីនបដិសេធថាមិនបានបង្កការគំរាមកំហែងណាមួយចំពោះទ្វីបអឺរ៉ុបទេ។ លោកថាគ្មានការគំរាមកំហែងឡើយមិនថាពេលនេះ ឬពីអតីតកាលនោះទេ។ យើងមិនគំរាមអឺរ៉ុបឡើយ ហើយយើងក៏មិនបានតាំងចិត្តគំរាមពួកគេដែរ។ នាយករដ្ឋមន្ត្រីប៉ូឡូញ លោកដូណាល់ទូស ថ្លែងកាលពីថ្ងៃព្រហស្បតិ៍ថាព្រឹត្តិការណ៍២បានកើតឡើងនៅព្រំដែនរវាងប៉ូឡូញ និងអ៊ុយក្រែន និងរវាងអ៊ុយក្រែន និងម៉ុលដូវ៉ានៅសប្ដាហ៍នេះ។ លោកចាត់ទុកថានេះអាចជាចេតនាបង្កហេតុរបស់រុស្ស៊ី។ កាលពីរាត្រីថ្ងៃអង្គារ ដ្រូនរបស់រុស្ស៊ីវាយប្រហារច្រកព្រំដែនរវាងអ៊ុយក្រែន និងម៉ុលដូវ៉ាបណ្ដាលឱ្យស្លាប់មនុស្ស២នាក់។ ចំណែកការគំរាមកំហែងទៅលើច្រកព្រំដែនរវាងប៉ូឡូញ និងអ៊ុយក្រែនអាចទប់ស្កាត់បានក្រោមកិច្ចសហការរវាងប្រទេសទាំង២៕ ប្រភព៖ AP
ចែករំលែកព័តមាននេះ