ខេត្តកំពង់ស្ពឺ ៖ កុមារីម្នាក់បន្ទាប់ពីម្តាយស្លាប់ចោលហើយ ត្រូវឪពុកបោះបង់ទៀតនោះ បានរស់នៅជាមួយអ៊ំរបស់គេ តាំងពីតូចពេលនេះអ៊ំក៏មានជំងឺឈឺដេកដួលនៅមួយកន្លែង នាងដាច់ចិត្តលើកដៃសុំឲ្យសប្បុរសជនដែលមានចិត្តមេត្តាជួយដល់នាង និងអ៊ំផង ព្រោះថា ជីវភាពសព្វថ្ងៃដុនដាបខ្លាំងណាស់ ។ អ្វីដែលនាងចង់បានបំផុត គឺកង់ និងសម្ភារសិក្សាព្រមទាំងថវិកា ដើម្បីយកអ៊ំរបស់នាងទៅព្យាបាល ។
ដោយជួបជាមួយអ្នកយកពត៌មានយើងកុមារីអភ័ព្វរៀបរាប់ថា«នាងមានឈ្មោះ ធំ សុខឡា អាយុ៧ឆ្នាំ រស់នៅជាមួយម្តាយធំ (បងម្តាយនាង) ក្នុងភូមិដូងឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ» ។ នាងរស់នៅជាមួយម្តាយធំរបស់នាងដែលយកនាងមកចិញ្ចឹមតាំងពីតូច បន្ទាប់ពីឪពុករបស់នាងចាកចោលនាងទៅរកស៊ីនៅស្រុកថៃ (អ៊ំនាងប្រាប់) ។ កុមារីអភ័ព្វបានបន្តថា ក្រោយពេលដែលឪពុករបស់នាងចាកចេញបាត់ទៅម្តាយនាងក៏មានជំងឺស្លាប់ចោល នាងទៀត រាល់ថ្ងៃនាងគ្រាន់តែដឹងថា នាងមានបងប្អូនបង្កើត៧នាក់ នាងជាកូនពៅ ឯបងៗមិនដឹងរស់នៅឯណាខ្លះទេពេលនេះ ។
កុមារីសុខ ឡា បានរៀបរាប់ទៀតថា នាងត្រូវបានម្តាយធំយកមកចិញ្ចឹមតាំងពីតូច បន្ទាប់ពីម្តាយនាងស្លាប់បាត់ ទៅពេលនេះម្តាយធំរបស់នាងក៏ធ្លាក់ខ្លួនមានជំងឺឈឺធ្ងន់ដេកនៅលើកន្ទេលមិនអាចធ្វើអ្វីកើតនោះទេ ។ ម្តាយធំរបស់នាងមានឈ្មោះ មុត យីម អាយុ៥២ឆ្នាំ គ្មានប្តី ។ នាងតូចបានលើកដៃសុំក្តីមេត្តាពីសំណាក់សប្បុរសជនក្នុង និងក្រៅប្រទេស សូមជួយដល់នាង និងអ៊ំរបស់នាងផង ព្រោះថា ពេលនេះគាត់ជិតលាចាកលោកហើយ ព្រោះតែមិនមានប្រាក់ព្យាបាលជំងឺ ។
ដោយឡែកស្ត្រីឈ្មោះ មុត យីម បាននិយាយទាំងសំឡេងខ្សាវៗថា«ក្មួយរបស់គាត់ត្រូវម្តាយស្លាប់ចោលកំព្រាតាំងពីតូច ហើយត្រូវឪពុកបោះបង់ចោលទៀត ដោយអាណិតក្មួយគាត់ក៏យកមកចញ្ចឹម តែពេលនេះអ្វីដែលគាត់បារម្ភបំផុត គឺនៅពេលដែលគាត់ផុតរលត់ជីវិតទៅវាសនារបស់គេនឹងក្លាយជាយ៉ាងណា ។ បើនិយាយពីឪពុករបស់នាងវិញ តាំងពីមកពីស្រុកថៃវិញ ដឹងថា ប្រពន្ធស្លាប់បាត់ក៏យកប្រពន្ឋថ្មី ហើយមិនដែលនឹកនាមកមើលកូនសម្បីតែម្តង» ។ ពេលនេះមានតែលើកដៃសុំក្តីមេត្តាករុណាពីសំណាក់សប្បុរសជនដែលមានចិត្តមេត្តាសូមជួយដល់ជីវិតចុងក្រោយរបស់គាត់ និងក្មួយផង ពេលនេះសូម្បីតែអង្កដាំបាយក៏អត់មានដែរ ។
អ្នកភូមិជាច្រើនបានរៀបរាប់ផងដែរថា ជីវិតរបស់ម្តាយធំ និងក្មួយខាងលើពិតជាកម្សត់មែនទែន ក្រោយពេលដែលម្តាយធំរបស់នាងធ្លាក់ខ្លួនឈឺមក និយាយរួមស្ថានភាពពួកគេពិតជាគួរឲ្យគួរឱ្យសង្វេគណាស់ចំពោះជីវិតទុរគតរបស់កុមារី និងអ៊ំរបស់នាង ៕
ចែករំលែកព័តមាននេះ