ខេត្តបាត់ដំបង ៖ ស្ត្រីចិត្តធំម្នាក់សម្រេចចិត្តធ្វើអត្តឃាតភ្លាមៗដោយគ្រាន់តែសុំលុយប្ដី១ម៉ឺនរៀលដើម្បីលេងឡូតូបន្តទៀតមិនបាន បន្ទាប់ពីខ្លួនលេងចាញ់អស់១០ម៉ឺនរៀលទៅហើយ ហេតុការណ៍នេះកើតឡើងកាលពីម៉ោង៣និង៣៥នាទីរសៀលថ្ងៃទី៧ មិថុនា ២០១៨ ស្ថិតនៅក្នុងភូមិខ្នារមាស ឃុំខ្នាចរមាស ស្រុកបវេល។…
ខេត្តបាត់ដំបង ៖ ស្ត្រីចិត្តធំម្នាក់សម្រេចចិត្តធ្វើអត្តឃាតភ្លាមៗដោយគ្រាន់តែសុំលុយប្ដី១ម៉ឺនរៀលដើម្បីលេងឡូតូបន្តទៀតមិនបាន បន្ទាប់ពីខ្លួនលេងចាញ់អស់១០ម៉ឺនរៀលទៅហើយ ហេតុការណ៍នេះកើតឡើងកាលពីម៉ោង៣និង៣៥នាទីរសៀលថ្ងៃទី៧ មិថុនា ២០១៨ ស្ថិតនៅក្នុងភូមិខ្នារមាស ឃុំខ្នាចរមាស ស្រុកបវេល។
លោកសុខ សារិន អធិការស្រុកបវេលបានឲ្យដឹងថា ស្ត្រីរងគ្រោះឈ្មោះ កាក់ គឹមស្រន់ អាយុ២០ឆ្នាំ រស់នៅចំណុចកើតហេតុខាងលើ ហើយស្ត្រីរូបនេះបានយកខ្សែគោទៅចង.កខ្លួនឯងនៅក្នុងផ្ទះដោយចាក់គន្លឹះជាប់ពីខាងក្នុង។
លោកអធិការបន្តថា តាមការសួរនាំពីក្រុមគ្រួសារ ស្ត្រីរូបនេះបានលេងល្បែងឡូតូចាញ់ ហើយសុំលុយប្ដីលេងបន្តមិនបាន លុះទៅដល់ផ្ទះវិញចង.កសម្លាប់ខ្លួនភ្លាមៗតែម្ដង ប៉ុន្តែគ្រាហ៍នោះបុរសជាប្ដីទៅដល់ឃើញចង.កក៏ទម្លុះទ្វារចូលទៅជួយសង្គ្រោះ តែហួសពេលមួយជំហានទៅហើយ។
តាមការស្រង់សំដីពីសាក្សីនានាប្រាប់ថា នៅថ្ងៃកើតហេតុនោះ គេឃើញស្ត្រីខាងលើលេងល្បែងឡូតូនៅក្នុងភូមិ ហើយចាញ់អស់លុយប្រហែល១០ម៉ឺនរៀល។ ពេលនោះគេឃើញបុរសជាប្ដីជិះម៉ូតូទៅដល់ហៅប្រពន្ធមកផ្ទះ តែប្រពន្ធហាក់មិនអស់ចិត្តក៏សុំលុយប្ដី១ម៉ឺនរៀលបន្ថែមទៀតដើម្បីលេងបន្ត តែប្ដីមិនឲ្យថែមទាំងលួងលោមហៅប្រពន្ធឲ្យទៅផ្ទះវិញ។ ខណៈនោះស្ត្រីរងគ្រោះទំនងជាខឹងប្ដីមិនឲ្យលុយលេងបន្ត ទើបមិនព្រមជិះម៉ូតូជាមួយប្ដីទៅផ្ទះទេ ប៉ុន្តែក្រោយពីទៅដល់ផ្ទះមិនទាន់បានប៉ុន្មាននាទីផង ស្រាប់តែមានការភ្ញាក់ផ្អើលថា ស្ត្រីរងខាងលើបានចង.កសម្លាប់ខ្លួននៅក្នុងផ្ទះទៅហើយ ព្រោះតែខឹងប្ដីមិនឲ្យលុយ១ម៉ឺនរៀលលេងឡូតូមិនបាន។
ទោះយ៉ាងណា នេះគ្រាន់តែជាការបំភ្លឺខ្លះៗពីសាក្សី រីឯរឿងរាវពិតបែបណានោះយើងមិនទាន់ទទួលព័ត៌មានជាក់លាក់ពីក្រុមគ្រួសារនៅឡើយទេ ប៉ុន្តែលោកអធិការស្រុកក៏បានឲ្យដឹងដែរថា ជុំវិញការធ្វើអត្តឃាតខាងលើនេះ លោកក៏ទទួលបានព័ត៌មានដូចការបំភ្លឺរបស់សាក្សីនានាដែរ។
ហើយបើតាមអ្នកភូមិនិយាយថា ប្ដីប្រពន្ធនេះទើបរៀបការបានប៉ុន្មានខែប៉ុណ្ណោះ ហើយកន្លងមកប្ដីប្រពន្ធនេះគេឃើញស្រលាញ់គ្នាណាស់ មិនដែលមានបញ្ហាល្អក់កករជាមួយគ្នាម្ដងណាទេ ប៉ុន្តែបែរជាមានរឿងអកុសលតែមួយប៉ប្រិចភ្នែក ដោយសារតែរឿងល្បែងស៊ីសង។ ទោះយ៉ាងណា មន្ត្រីជំនាញបានប្រគល់សពជនរងគ្រោះឲ្យក្រុមគ្រួសារធ្វើបុណ្យតាមប្រពៃណីហើយ ក្រោយធ្វើការពិនិត្យ និងបញ្ចប់ការធ្វើកំណត់ហេតុ៕
ចែករំលែកព័តមាននេះ