អ្នកគាំទ្រអង់គ្លេសកំពុងព្រួយបារម្ភរឿងមួយនេះខ្លាចកើតឡើងម្តងទៀតពេលប៉ះជាមួយស៊ុយអែត

ថ្ងៃទី ០៧ ខែ កក្កដា ឆ្នាំ ២០១៨

ម៉ោង ០៩:៤៤

លំហូរនៃអ្នកគាំទ្រអង់គ្លេសរាប់ពាន់នាក់សម្រុកទៅទីក្រុង Samara ត្រៀមចូលរួមទស្សនាការប្រកួតរវាងក្រុមជម្រើសជាតិរបស់ខ្លួន ប៉ះគ្នាជាមួយស៊ុយអែតក្នុងវគ្គ១/៤ នៅរាត្រីថ្ងៃសៅរ៍នេះ បានក្លាយជារឿងដ៏គួរឱ្យព្រួយបារម្ភមួយពីសុវត្ថិភាពពួកគេនៅទឹកដីរុស្ស៊ី ។

ក្តីបារម្ភនេះ គឺបានដក់ជាប់ក្នុងចិត្តជនជាតិអង់គ្លេស ដែលបន្តខ្លាចរអាតាំងពីវគ្គចែកពូលមកម៉្លេះវត្តមានក្រុម និងអ្នកគាំទ្ររបស់ខ្លួន នៅទឹកដីម្ចាស់ផ្ទះ World Cup ព្រោះថាអង់គ្លេស និងរុស្ស៊ី ធ្លាប់ប៉ះទង្គិចគ្នាដ៏ខ្លាំងក្លាម្តងរួចមកហើយអំឡុងជំនួបប្រកួតយូរ៉ូឆ្នាំ២០១៦ រវាងអ្នកគាំទ្រក្រុមតោកំណាច និងក្រុមខ្លាឃ្មុំទឹកកក ។ ហេតុនេះ ទើបអ្នកគាំទ្រអង់គ្លេសនៅតែព្រួយបារម្ភខ្លាចកើតមានអំពើហិង្សានានាកើតឡើង ស្របពេលពួកគេក្លាយជាគោលដៅចម្បងនៃការសងសឹករបស់ពួកសង្គមងងឹតនៅរុស្ស៊ី ។

ទោះបីយ៉ាងណា អាជ្ញាធររុស្ស៊ីបានអះអាងថា វត្តមានក្រុម និងអ្នកគាំទ្រអង់គ្លេសអំឡុងរឹត្តិការណ៍ World Cup នេះ គឺមិនមានអ្វីគួរឱ្យព្រួយបារម្ភទេ ។ អាជ្ញាធររុស្ស៊ីលើកឡើងថា «យើងគិតថា គ្មានអ្វីគួរឱ្យបារម្ភសោះឡើយ។ ពួកយើងបានបង្កើនប្រព័ន្ធការពារគ្រប់ទីកន្លែងនៅទីក្រុង Samara នេះ ។ យើងសង្ឃឹមថា ក្រុមនិងអ្នកគាំទ្រអង់គ្លេស នឹងពេញចិត្តទីក្រុងដ៏ស្រស់ស្អាតមួយនេះមិនខាន» ៕