គ្មានពាក្យបរិយាយឱ្យត្រូវនឹងស្ថានភាពចាញ់របស់ក្រុមជើងឯកចាស់អាល្លឺម៉ង់នោះទេ ខណៈក្រុមមួយនេះត្រូវវិចបង្វេចទៅផ្ទះវិញទាំងមិនអស់ចិត្ត ។ ការប្រកួតជម្រុះចុងក្រោយក្នុងពូល F យប់មិញរវាងក្រុមអាល្លឺម៉ង់និងកូរ៉េខាងត្បូងដែលបញ្ចប់នៅលទ្ធផលហួសចិត្ត ០-២ ក្នុងពហុកីឡដ្ឋាន Kazan ដែនដីរុស្ស៊ីគឺជាប្រវត្តិសាស្ត្រដ៏ខ្មៅងងឹតរបស់ក្រុមជើងឯកនៅប្រេស៊ីលកាលពី៤ ឆ្នាំមុនហើយវាក៏ជាការខ្ទាតចេញពីសមរភូមិ World Cup លើកទី២បន្ទាប់ពីឆ្នាំ ១៩៣៨ ។
ពីរគ្រាប់ដ៏អស្ចារ្យរបស់ក្រុមកូរ៉េខាងត្បូងរកដោយខ្សែការពារ Kim Young-gwon (៩០+២) និងខ្សែប្រយុទ្ធ Son Heung-min (៩០+៦) បានក្លាយជាកម្រងអនុស្សវរីយ៍ដល់ប្រទេសជាតិទាំងមូលទោះបីជាមិនអាចឡើងទៅវគ្គ ១៦ ក្រុមបានតែអាចកាច់ស្លាបឥន្ទ្រីដែកអាល្លឺម៉ង់មិនហើរបាន ។
*ប្រតិកម្មចំពោះការធ្លាក់របស់អាល្លឺម៉ង់
គ្រូបង្វឹកក្រុមអង់គ្លេសលោក Southgate ថាការធ្លាក់ចេញរបស់អាល្លឺម៉ង់គឺជាការព្រមានដល់កូនក្រុមរបស់លោកឱ្យប្រយ័ត្នប្រយែងចៀសវាងជួបគ្រោះអាក្រក់ដូចក្រុមជើងឯក World Cup ២០១៤ ដែរ ។
*តើការបរាជ័យរបស់អាល្លឺម៉ង់នៅ World Cup ២០១៨ ធ្ងន់ធ្ងរជាងប្រេស៊ីលនៅ ២០១៤ មែនទេ
អាល្លឺម៉ង់ធ្លាប់ផ្តល់មេរៀនចុកឈាមឱ្យប្រេស៊ីលនៅលទ្ធផល ៧-១ វគ្គពាក់កណ្តាលផ្តាច់ព្រ័ត្រ ខណៈពេលនោះប្រេស៊ីលជាម្ចាស់ផ្ទះតែម្តង ។ ដូច្នេះតើការធ្លាក់របស់អាល្លឺម៉ង់នៅវគ្គជម្រុះ ៣២ ក្រុមនេះមានសភាពធ្ងន់ធ្ងរជាងប្រេស៊ីលឬយ៉ាងណា ?
*Angela Merkel ៖ ប្រទេសជាតិជួបទុក្ខធំ
អ្នកស្រី Angela Merkel និយាយក្រោយពីលទ្ធផលចាញ់របសក្រុមអាល្លឺម៉ង់ថា «គ្រប់គ្នាក្នុងប្រទេសសុទ្ធតែក្រៀមក្រំចំពោះអ្វីដែលបានកើតឡើងនៅ World Cup» ។
*កៅអីគ្រូបង្វឹករបស់លោក Joachim Low អាចរង្គោះរង្គើ
លោក Joachim Low តបសំនួរអ្នកការសែតរឿងកៅអីគ្រូបង្វឹកក្រោយធា្លក់ World Cup ២០១៨ ថា «ភ្លាមៗនេះខ្ញុំមិនអាចឆ្លើយបានទេព្រោះយើងត្រូវការពេលវេលាដើម្បីប៉ះប៉ូវទឹកចិត្តកីឡាករជាមុនសិន» ។ Lowបានចូលកាន់តំណែងគ្រូបង្វឹកកាលីបឆ្នាំ ២០០៦ ហើយរូបលោកបានចុះកុងត្រាដល់ឆ្នាំ ២០២២ ។
* World Cup ២០១៨ ជាប្រវត្តិជូរចត់របស់អាល្លឺម៉ង់
អាល្លឺម៉ង់គឺជាក្រុមជើងឯកចាស់ទី៤ក្នុងចំណោមក្រុមជើងឯកផ្សេងទៀតដែលត្រូវបានជ្រុះចេញពីនៅវគ្គជម្រុះតាមពូលនៅ World Cup ៥ លើកចុងក្រោយ ។ ក្រុម៣ផ្សេងទៀតមានដូចជាអ៊ីតាលី បារាំង និងអេស្ប៉ាញសុទ្ធតែធ្លាប់ភ្លក្សរសជាតិនេះដូចគ្នា មានន័យពួកគេលើកពាន World Cup ហើយក៏ធ្លាក់នៅ ៤ ឆ្នាំក្រោយវិញ ។
(បារាំងលើកពាន World Cup ១៩៩៨ តែធ្លាក់នៅឆ្នាំ ២០០២) ។ (អ៊ីតាលីលើកពាន World Cup ២០០៦ តែជ្រុះនៅ ២០១០) ។ អេស្ប៉ាញលើកពានឆ្នាំ ២០១០ តែធ្លាក់នៅ ២០១៤) ។
នេះគឺជាការជ្រុះចេញលើកទី២របស់ឥន្ទ្រីដែកអាល្លឺម៉ង់ខណៈក្រុមនវធ្លាប់ធ្លាក់នៅ World Cup ១៩៣៨ ដែលពេលនោះមានតែ ១៦ ក្រុមបង្ហាញខ្លួន ។
អាល្លឺម៉ង់រកបានតែ២គ្រាប់ប៉ុណ្ណោះនៅ World Cup រុស្ស៊ីពោលគឺជាតួលេខតិចបំផុតលំដាប់ទីពីររបស់ជើងឯកចាស់ខណៈបារាំងឈរលេខ១ដែលមិនមានគ្រាប់នៅ World Cup ២០០២ ។
នេះគឺជាការចាញ់លើកទី១ក្រោមថ្វីជើងរបស់ក្រុមមកពីអាស៊ីក្នុងព្រឹត្តិការណ៍ World Cup ។ ខណៈក្រុមអាល្លឺម៉ង់រកគ្រាប់មិនបាននៅពីរប្រកួតជាប់ៗគ្នាក្នុងចំណោម ៣ ប្រកួតសរុបដែលវាបានកើតឡើងច្រើនដងមកហើយក្នុងចំណោមការប្រកួត World Cup ១៥ លើកបូលបញ្ជូលគ្នា ៕
ចែករំលែកព័តមាននេះ