រាជធានីភ្នំពេញ ៖ យុវសិស្ស២នាក់ទំនងចាញ់បាល់ World Cup ពិភពលោកច្រើនពេកបានចេញធ្វើសកម្មភាពឆក់៤លើកជាប់ខ្នោះដៃនគរបាលព្រហ្មទណ្ឌកាលពីថ្ងៃទី២៦ មិថុនា ២០១៨ ។ យុវជនដែលត្រូវសមត្ថកិច្ចឃាត់ខ្លួននោះម្នាក់ឈ្មោះ…
រាជធានីភ្នំពេញ ៖ យុវសិស្ស២នាក់ទំនងចាញ់បាល់ World Cup ពិភពលោកច្រើនពេកបានចេញធ្វើសកម្មភាពឆក់៤លើកជាប់ខ្នោះដៃនគរបាលព្រហ្មទណ្ឌកាលពីថ្ងៃទី២៦ មិថុនា ២០១៨ ។
យុវជនដែលត្រូវសមត្ថកិច្ចឃាត់ខ្លួននោះម្នាក់ឈ្មោះ ពៅ វិចិត្រ ភេទប្រុស អាយុ១៦ឆ្នាំ មុខរបរ សិស្ស ស្នាក់នៅផ្ទះជួល សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ និងឈ្មោះ ប្រាក់ ចាន់ណារ៉ុង ភេទប្រុស អាយុ១៧ឆ្នាំ មុខរបរសិស្ស ស្នាក់នៅផ្ទះ ផ្លូវវ៉េងស្រេង សង្កាត់ចោមចៅ២ ខណ្ឌពោធិសែនជ័យ រាជធានីភ្នំពេញ ។
ទាក់ទិន និងការឃាត់ខ្លួនយុវសិស្សសាលា២នាក់ខាងលើនេះត្រូវបានលោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញបានឲ្យដឹងថា នៅវេលាម៉ោង១១ព្រឹក ថ្ងៃទី២៦ មិថុនា កម្លាំងសមត្ថកិច្ចជំនាញការិយាល័យព្រហ្មទណ្ឌកម្រិតស្រាលបានធ្វើការអន្តរាគមន៍បង្ក្រាបក្រុមឆក់ជាក់ស្តែង និងឃាត់ខ្លួនបាន២នាក់ នៅចំណុចផ្លូវលេខ២៦១ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ។
ក្រោយពីឃាត់ខ្លួនជនសង្ស័យ២នាក់បានសារភាពថា ពួកគេបានធ្វើសកម្មភាពឆក់ទ្រព្យសម្បត្តិប្រជាពលរដ្ឋចំនួន៤លើកមកហើយ ។ លោកប៊ុន សត្យា បន្តថា លើកទី១- ឆក់ទូរស័ព្ទដៃម៉ាកIPhone6pluse ពណ៌ទឹកមាស នៅចំណុចមុខផ្ទះលេខ១១៨ ផ្លូវលេខ១៣៨ ក្រុមទី៩ ភូមិ៣ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ កាលពីថ្ងៃទី២៦ មិថុនា ២០១៨ ។
ជនរងគ្រោះឈ្មោះ ម៉េង ស្រីហួច ភេទស្រី អាយុ២៣ឆ្នាំ ជនជាតិខ្មែរ មុខរបរនិស្សិត ស្នាក់នៅផ្ទះជួល ផ្លូវលំ ភូមិស្លែងរលើង សង្កាត់ទឹកថ្លា ខណ្ឌសែនសុខ រាជធានីភ្នំពេញ បាត់បង់ទូរស័ព្ទដៃ ម៉ាក IPhone6pluse ពណ៌ទឹកមាស១គ្រឿង ។ លើកទី២- ឆក់ទូរស័ព្ទម៉ាកអាយហ្វូន ដូចខាងលើ ពណ៌ទឹកប្រាក់ នៅចំណុចមហាវិថីសហពន្ធ័រ៉ុស្សី កែងផ្លូវលេខ ២០០៩ សង្កាត់កាកាប១ ខណ្ឌពោធិ៍សែនជ័យ កាលពីថ្ងៃខែមីនា ឆ្នាំ២០១៨ វេលាម៉ោងប្រហែល៩និង៣០នាទីយប់ ។ លើកទី៣- ឆក់ទូរស័ព្ទដៃម៉ាកអាយដូចគ្នា ពណ៌ទឹកប្រាក់ នៅចំណុចមហាវិថីសហពន្ធ័រ៉ុស្សី កែងផ្លូវលេខ២០០៩ សង្កាត់កាកាប១ រាជធានីភ្នំពេញ កាលពីថ្ងៃខែឧសភា ឆ្នាំ២០១៨ ។ លើកទី៤- ឆក់ទូរស័ព្ទដៃម៉ាក OPPO ពណ៌ទឹកប្រាក់ នៅចំណុចក្រោមស្ពានអាកាសស្ទឹងមានជ័យ សម្តៅមកវត្តស្ទឹងមានជ័យ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ កាលពីថ្ងៃទី១០ មិថុនា វេលាម៉ោងប្រហែល៩យប់ ។
ចំណែកវត្ថុតាងចាប់យកម៉ូតូម៉ាកហុងដាឌ្រីមសង់ សេ១២៥ ពណ៌ខ្មៅ សេរីឆ្នាំ២០១៤ ពាក់ស្លាកលេខភ្នំពេញ១CL-១០៦៦ មួយគ្រឿង ។ យោងលើបទល្មើសដែលសមត្ថកិច្ចបង្ក្រាបជាក់ស្តែង និងតាមចម្លើយជនសង្ស័យមានបន្ទុកគ្រប់គ្រាន់សមត្ថកិច្ចបានកសាងសំណុំរឿងបញ្ជូនយុវសិស្ស២នាក់នោះទៅកាន់សាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ