ខេត្តកំពត ៖ បុរសម្នាក់ត្រូវបានអ្នកដំណើរប្រទះឃើញស្លាប់ក្នុងស្ថានភាពផ្កាប់មុខ ជាមួយនឹងម៉ូតូមួយគ្រឿង នៅក្រោមស្ពានស្រះប៉ោង តាមផ្លូវជាតិលេខ៣កំពត-ភ្នំពេញ កាលពីវេលាម៉ោង១០ និង៥នាទីព្រឹក ថ្ងៃទី២១ មិថុនា…
ខេត្តកំពត ៖ បុរសម្នាក់ត្រូវបានអ្នកដំណើរប្រទះឃើញស្លាប់ក្នុងស្ថានភាពផ្កាប់មុខ ជាមួយនឹងម៉ូតូមួយគ្រឿង នៅក្រោមស្ពានស្រះប៉ោង តាមផ្លូវជាតិលេខ៣កំពត-ភ្នំពេញ កាលពីវេលាម៉ោង១០ និង៥នាទីព្រឹក ថ្ងៃទី២១ មិថុនា ស្ថិតក្នុងភូមិតារោង ឃុំព្រៃឃ្មុំ ស្រុកទឹកឈូ ។ ចំពោះការប្រទះឃើញសពនៅក្រោមស្ពាននេះដែរ ក៏មានប្រភពមួយចំនួនអះអាងថា ជនរងគ្រោះនៅពេលជិះម៉ូតូអាចវាក់នឹងរថយន្ត ឬក៏វាក់ជាមួយយានយន្តអ្វីមួយ ទើបបណ្តាលឱ្យជ្រុលចង្កូតធ្លាក់ក្រោមស្ពាន ហើយបោកក្បាលនឹងវត្ថុរឹងកាលពីកំឡុងម៉ោងជាង៧យប់ថ្ងៃទី២០ ខែមិថុនា ទើបគ្មានអ្នកណាដឹង ។
បន្ទាប់ពីអ្នកធ្វើដំណើរតាមផ្លូវប្រទះឃើញសព ក៏បានរាយការណ៍ទៅសមត្ថកិច្ចចុះមកពិនិត្យសន្និដ្ឋានថា បុរសរងគ្រោះអាចស្លាប់ដោយសារជិះម៉ូតូក្នុងល្បឿនលឿន លុះមកដល់ស្ពានអាចវាក់នឹងយានយន្តអ្វីមួយក៏រេចង្កូតធ្លាក់ចូលក្រោមស្ពានទាំងមនុស្សទាំងម៉ូតូ ហើយបោកផ្ទប់ទៅនឹងជញ្ជាំងស្ពានស្លាប់ភ្លាមៗ ដោយគ្មានអ្នកដំណើរណាម្នាក់ដឹងឡើយ ។ ក្រោយពីប្រទះឃើញសព ក៏មានសាច់ញាតិជនរងគ្រោះមកអះអាងថា ជនរងគ្រោះឈ្មោះ អ៊ូ ចំរើន អាយុ៣១ឆ្នាំ ជាជាងជួសជុលរថយន្ត មានទីលំនៅភូមិភ្នំតូច ឃុំកណ្តោល ស្រុកទឹកឈូ ខេត្តកំពត ។ 
សាច់ញាតិរៀបរាប់ថា នាព្រលប់ថ្ងៃទី២០ ខែមិថុនា ជនរងគ្រោះបានជិះម៉ូតូវេវ ពាក់ផ្លាកលេខ ភ្នំពេញ ១L-៨១៨៩ តែម្នាក់ឯងពីកន្លែងយានដ្ឋានជួសជុលរថយន្តក្នុងខេត្តកំពត បំណងទៅផ្ទះ តែដោយរហូតដល់យប់ជ្រៅមិនឃើញដល់ផ្ទះ ទើបបងប្អូនសាច់ញាតិទូរស័ព្ទទៅជនរងគ្រោះដែរ ប៉ុន្តែហៅទូរស័ព្ទមិនចូល ។
លុះនៅវេលាម៉ោងជាង១០ព្រឹកថ្ងៃទី២១ ខែមិថុនា ក្រុមគ្រួសារក៏បានទទួលដំណឹងថា មានគេប្រទះឃើញបុរសម្នាក់ស្លាប់នៅក្រោមស្ពានស្រះប៉ោងក៏មកមើលទើបដឹងថា អ្នកស្លាប់ជាសាច់ញាតិដែលបាត់ កាលពីយប់នោះឯង ។ សពបុរសរងគ្រោះ ត្រូវបានសាច់ញាតិដឹកទៅកាន់លំនៅឋាន ដើម្បីចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ