ប្រព័ន្ធផ្សព្វផ្សាយរុស្ស៊ីថា កំពូលតារាចម្រៀងកូឡុំប៊ីលោក Maluma ត្រូវបានចោរលួចរបស់មានតម្លៃគិតជាប្រាក់សរុប ៧៨៣.០០០ដុល្លារ ខណៈលោកកំពុងស្នាក់នៅសណ្ឋាគារមួយក្បែរតំបន់ Red Square របស់ក្រុងម៉ូស្គូ រង់ចាំគាំទ្រក្រុមជម្រើសជាតិខ្លួន។
ពាក់ព័ន្ធនឹងករណីចោរកម្មនេះ ប៉ូលិសក្រុងម៉ូស្គូបានប្រាប់សារព័ត៌មាន RBC ថា វត្ថុមានតម្លៃរបស់តារាចម្រៀងខាងលើដែលចោរលួចទៅរួមមានកាបូបម៉ាកល្បី Louis Vuitton នាឡិកាទំនើបៗ១១ខ្សែ គ្រឿងអលង្កាម៉ាក Cartier វ៉ែនតា១០ សុទ្ធតែដាំពេជ្រនិងគជ់ថ្លៃៗ ។ ហេតុការណ៍នេះកើតឡើងក្រោយតារាចម្រៀងវ័យ២៤ឆ្នាំ Maluma បង្ហោះរូបភាពលើបណ្តាញសង្គមមុនការប្រកួតរវាងក្រុមកូឡុំប៊ីនិងជប៉ុនមកដល់ ។
ប៉ូលិសក្រុងម៉ូស្គូបានបើកការស៊ើបអង្កេតរកជនសង្ស័យកាលពីថ្ងៃអង្គារ ខណៈបុគ្គលិកសណ្ឋាគារមិនបានផ្តល់ព័ត៌មានលម្អិតណាមួយឡើយក្រៅតែពីនិយាយថា ការស៊ើបអង្កេតកំពុងតែត្រូវបានធ្វើឡើងហើយ ៕
ចែករំលែកព័តមាននេះ