ខេត្តព្រះវិហារ ៖ បើតាមសេចក្តីរាយការណ៍បានឱ្យដឹងថា បុរសម្នាក់កំពុងអង្គុយជក់បារីនៅមាត់ជណ្តើរស្រាប់តែត្រូវជនមិនស្គាល់ម្នាក់បានបាញ់ប្រហារ បណ្តាលឱ្យរងរបួសធ្ងន់ធ្ងរ ហេតុការណ៍នេះបានកើតឡើងកាលពីម៉ោង៨និង៣០នាទីយប់ ថ្ងៃទី១៩ ខែមិថុនា ឆ្នាំ២០១៨នេះ ស្ថិតក្នុងភូមិជាំស្រែ…
ខេត្តព្រះវិហារ ៖ បើតាមសេចក្តីរាយការណ៍បានឱ្យដឹងថា បុរសម្នាក់កំពុងអង្គុយជក់បារីនៅមាត់ជណ្តើរស្រាប់តែត្រូវជនមិនស្គាល់ម្នាក់បានបាញ់ប្រហារ បណ្តាលឱ្យរងរបួសធ្ងន់ធ្ងរ ហេតុការណ៍នេះបានកើតឡើងកាលពីម៉ោង៨និង៣០នាទីយប់ ថ្ងៃទី១៩ ខែមិថុនា ឆ្នាំ២០១៨នេះ ស្ថិតក្នុងភូមិជាំស្រែ ឃុំយាង ស្រុកជាំក្សាន្ត ខេត្តព្រះវិហារ ។
សេចក្តីរាយការណ៍បន្តថា បុរសរងគ្រោះខាងលើឈ្មោះ សែ សាវុធ អាយុ៣៤ឆ្នាំ មានទីលំនៅភូមិជាំស្រែ ឃុំយាង ស្រុកជាំក្សាន្ត ខេត្តព្រះវិហារ រងរបួសធ្ងន់ ។
យោងតាមសម្តីលោកវរសេនីយ៍ឯក ឆយ បូរិន បានឲ្យដឹងថា ករណីប៉ុនប៉ងមនុស្សឃាតនៅចំណុចខាងលើនេះបើតាមការបំភ្លឺពីប្រពន្ធជនរងគ្រោះប្រាប់ថា ខណៈពេលដែលប្តីរបស់គាត់កំពុងអង្គុយជក់បារីនៅមាត់ជណ្តើរផ្ទះ រីឯរូបគាត់ជាប្រពន្ធ និងម្តាយក្មេកកំពុងដេកនៅក្នុងផ្ទះ ស្រាប់តែឮសម្លេងបាញ់ប្រហារជាច្រើនគ្រាប់ និងឮសម្លេងប្តីរបស់គាត់ស្រែក ពេលនោះគាត់ចេញទៅមើលក៏ឃើញប្តីរបស់គាត់ត្រូវគ្រាប់កាំភ្លើងពេញខ្លួនចំនួន៥គ្រាប់ ក្នុងនោះ២គ្រាប់ចំដើមដៃ ១គ្រាប់ចំគល់ក ២គ្រាប់ចថ្គាម ខាងឆ្វេង តែពិតជាសំណាងល្អណាស់ដែលមិនស្លាប់ គ្រាន់តែរបួសធ្ងន់ ។
ដោយយោងតាមការបំភ្លឺពីប្រពន្ធជនរងគ្រោះ សមត្ថកិច្ចសន្និដ្ឋានថា ករណីនេះជារឿងគំនុំដែលកន្លងទៅគ្រួសាររបស់ជនរងគ្រោះត្រូវបានអ្នកភូមិនៅទីនោះចោទថា ចេះធ្វើអំពើធ្មប់អាប ។ ហើយកាលពីឆ្នាំមុន ឪពុករបស់ជនរងគ្រោះក៏ត្រូវបានបាញ់សម្លាប់ផងដែរដោយជនមិនស្គាល់មុខ ដោយសង្ស័យចោទថា ឪពុករបស់ជនរងគ្រោះខាងលើចេះអំពើធ្មប់ ។
សូមបញ្ជាក់ថា ក្រោយកើតហេតុជនរងគ្រោះត្រូវក្រុមគ្រួសារដឹកទៅកាន់មន្ទីរពេទ្យបង្អែកដើម្បីធ្វើការសង្គ្រោះ ប៉ុន្តែដោយស្ថានភាពធ្ងន់ធ្ងរពេកក៏បញ្ជូនបន្តទៅកាន់មន្ទីរពេទ្យនៅភ្នំពេញ ។ មកដល់ពេលនេះ សមត្ថកិច្ចពាក់ព័ន្ធនៅគ្រប់មូលដ្ឋានទាំងអស់កំពុងដុតដៃដុតជើងធ្វើការស្រាវជ្រាវរកមុខសញ្ញាចាប់ជនសង្ស័យដែលបាញ់ប្រហារមកលើជនរងគ្រោះមកផ្តន្ទាទោសទៅតាមផ្លូវច្បាប់ ។
ចែករំលែកព័តមាននេះ