រាជធានីភ្នំពេញ ៖ សម្តេចតេជោនាយករដ្ឋមន្ត្រី កាលពីព្រឹកថ្ងៃទី១៩ មិថុនា នៅវិមានសន្តិភាព បានអញ្ជើញជាអធិបតីប្រកាសគោរមងារវិទ្យាសាស្ត្រ និងគោរមងារកិត្តិយសនៃរាជបណ្ឌិត្យសភាកម្ពុជា ជូនដល់ឥស្សរជន មន្ត្រីរាជការមានស្នាដៃ…
រាជធានីភ្នំពេញ ៖ សម្តេចតេជោនាយករដ្ឋមន្ត្រី កាលពីព្រឹកថ្ងៃទី១៩ មិថុនា នៅវិមានសន្តិភាព បានអញ្ជើញជាអធិបតីប្រកាសគោរមងារវិទ្យាសាស្ត្រ និងគោរមងារកិត្តិយសនៃរាជបណ្ឌិត្យសភាកម្ពុជា ជូនដល់ឥស្សរជន មន្ត្រីរាជការមានស្នាដៃ ដើម្បីជំរុញអភិវឌ្ឍន៍ធនធានមនុស្សចំនួន៨រូប ។ សម្តេចតេជោមានប្រសាសន៍បន្តថា ចំណុចនេះហើយ ដែលខ្ញុំចង់រំលឹកតួនាទីរបស់រាជបណ្ឌិត្យសភា ក៏ដូចជាតួនាទីនៃបញ្ញវន្តរបស់
យើង ។
ពិតហើយការស្រាវជ្រាវនានាត្រូវតែមាន មិនមែនគ្រាន់តែមានបញ្ហាប៉ុណ្ណឹងទេ នៅមានបញ្ហាច្រើនជាងនេះច្រើនណាស់ ។ ក៏ប៉ុន្តែខ្ញុំស្នើសុំផ្តល់អាទិភាពទៅឱ្យកិច្ចការបន្ទាន់ៗចំពោះមុខ ។ ព្រោះបើសិនយើងប្រើប្រាស់នូវខួរក្បាលរបស់យើង និងធនធានដែលមានកំរិតរបស់យើងទៅក្នុងតែមួយពេលប៉ុណ្ណោះ ពិតជាមិនអាចឆ្លើយតបបានទេ ។ដូច្នេះត្រូវប្រមូលផ្តុំកិច្ចការណាត្រូវធ្វើមុន កិច្ចការណាត្រូវធ្វើក្រោយ ។ និយាយយ៉ាងដូច្នេះមិនមែនបានសេចក្តីថា បោះបង់ចោលនូវកិច្ចការខ្លះនោះទេ ។ ក៏ប៉ុន្តែកិច្ចការវាពិតជាវាមានអាទិភាពនិងមានលំដាប់លំដោយរបស់វា ។សម្តេចថ្លែងថា ខ្ញុំសង្ឃឹមថា បញ្ញវន្តរបស់យើងដែលទទួលគោរមងារថ្ងៃនេះ ក៏ដូចជាអ្នកទាំងអស់ដែលជាបញ្ញវន្តរបស់ជាតិ និងចូលរួមសិក្សាស្រាវជ្រាវ រាប់ទាំងបណ្តាសាកលវិទ្យាល័យនានានៅក្នុងព្រះរាជាណាចក្រកម្ពុជា អាចនឹងចូលរួមដើម្បីផ្តល់នូវធាតុចូល សម្រាប់ការសិក្សាស្រាវជ្រាវពាក់ព័ន្ធទៅនឹងស្ថានភាពបច្ចុប្បន្ននេះ ។
ហើយវាមិនមែនគ្រាន់តែជាសង្គ្រាមពាណិជ្ជកម្មដែលទើបនឹងកើតទេ ក៏ប៉ុន្តែសង្គ្រាមដែលវាបានកើតឡើងឆាបឆេះនៅក្នុងតំបន់ខ្លះទូទាំងពិភពលោក បញ្ហាភេរវកម្ម ការប្រែប្រួលអាកាសធាតុ និងបញ្ហាផ្សេងៗទៀតសុទ្ធតែក្លាយជាប្រធានបទដែលយើងត្រូវរកវិធីដោះស្រាយនៅក្នុងក្របខណ្ឌប្រទេសខ្លួនឯងផង នៅក្នុងក្របខណ្ឌអនុតំបន់ក៏ដូចជាសម្រាប់ពិភពលោកផងដែរ ។ លោកបណ្ឌិតសភាចារ្យ សុខ ទូច អនុប្រធានប្រចាំការក្រុមប្រឹក្សាបណ្ឌិតសភាចារ្យនិងជាប្រធានរាជបណ្ឌិត្យសភាកម្ពុជាបានថ្លែងថា ពិធីប្រកាសគោរមងារជូនដល់ឥស្សរជន និងបញ្ញាជនជាន់ខ្ពស់របស់ជាតិ ទាំង៨រូបនាពេលនេះ គឺពិតជាមានអត្ថន័យជាប្រវត្តិសាស្ត្រ និងជាការផ្តល់នូវមហាកិត្តិយសដ៏ធំធេងបំផុត សម្រាប់រាជបណ្ឌិត្យសភាកម្ពុជា ក៏ដូចជាសម្រាប់ឥស្សរជនជាន់ខ្ពស់របស់ជាតិទាំង៨រូប នឹងត្រូវប្រកាសផ្តល់ទទួលនូវគោរមងារវិទ្យាសាស្ត្រនិងគោរមងារកិត្តិយសនៃរាជបណ្ឌិត្យសភាកម្ពុជា ។
លោកបណ្ឌិតសភាចារ្យបានថ្លែងបន្តថា គោរមងារវិទ្យាសាស្ត្រនៃរាជបណ្ឌិត្យសភាកម្ពុជា មាន៤រូប ១-លោកបណ្ឌិតសភាចារ្យ អូន ព័ន្ធមុនីរ័ត្នទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទទួលគោរមងារជា«អគ្គបណ្ឌិតសភាចារ្យ» ២-លោកបណ្ឌិត នេត បារ៉ុម បានទទួលគោរមងារជា «បណ្ឌិតសភាចារ្យ»៣-លោកបណ្ឌិត ហ៊ាន សាហ៊ីប រដ្ឋលេខាក្រសួងសេដ្ឋកិច្ច និងហិរញ្ញវត្ថុ បានទទួលគោរមងារជា«បណ្ឌិតសភាចារ្យ» ៤-លោកបណ្ឌិត ណាត ប៊ុនរឿន រដ្ឋលេខាធិការនៃក្រសួងអប់រំយុវជន និងកីឡា បានទទួលគោរមងារជា«បណ្ឌិតសភាចារ្យ» ។
គោរមងារកិត្តិយសនៃរាជបណ្ឌិត្យសភាកម្ពុជាមានចំនួន៤រូប ១-លោកកិត្តិសេដ្ឋា បណ្ឌិត គា ត ឈន់ ប្រធានកិត្តិយសឧត្តមក្រុមប្រឹក្សា សេដ្ឋកិច្ចជាតិបានទទួលគោរមងារជា«កិត្តិបរិរក្សបណ្ឌិត» ២-លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានទទួលគោរមងារជា«កិត្តិសង្គហបណ្ឌិត» ៣-លោក ប៊ិន ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រី បានទទួលគោរមងារជា«កិត្តិនីតិកោសលបណ្ឌិត» ៤-លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្មនិងសិប្បកម្ម បានទទួលគោរមងារជា«កិត្តិសេដ្ឋាបណ្ឌិត» ៕
ចែករំលែកព័តមាននេះ