ការទទួលមរណភាពរបស់អ្នកម្នាង អ៊ុក ផល្លា ដោយគ្រោះថ្នាក់ចរាចរណ៍ដ៏រន្ធត់នេះ បានធ្វើឱ្យមានការរំលឹកឡើងវិញ ពីការជួបឧបទ្ទវហេតុដ៏រន្ធត់ដូចគ្នានេះកាល៣ឆ្នាំមុន គឺនៅរសៀលថ្ងៃទី២៦ មេសា ២០១៥ ត្រូវបានថ្នាក់ដឹកនាំគណបក្សយាងទ្រង់ និងអ្នកម្នាងចាកចេញពីប្រទេសកម្ពុជា ឆ្ពោះទៅកាន់មន្ទីរពេទ្យឯបរទេស ដើម្បីសម្រាកព្យាបាល បន្ទាប់ពីព្រះអង្គបានជួបគ្រោះអកុសល ដោយគ្រោះថ្នាក់ចរាចរណ៍ដែលបានធ្វើឱ្យព្រះអង្គរងរបួសស្រាល និងអ្នកម្នាងរងរបួសធ្ងន់នៅត្រង់ក្បាល រួមជាមួយមន្ត្រីអ្នកហែហមច្រើននាក់ទៀតក៏បានរងរបួសធ្ងន់និងស្រាលដែរ ។
កាលណោះ លោក ញ៉េប ប៊ុនជិន ដែលជាអ្នកនាំពាក្យបានថ្លែងថា គ្រោះថ្នាក់នេះបណ្ដាលឱ្យមនុស្សចំនួន៦នាក់រងរបួស ក្នុងនោះ២នាក់រងរបួសធ្ងន់ និង៤នាក់របួសស្រាល ។ ម្នាក់ក្នុងចំណោម២នាក់រងរបួសធ្ងន់គឺជាអ្នកម្នាង អ៊ុក ផល្លា ។ នៅវេលារសៀលថ្ងៃដដែលនោះ រថយន្តមន្ទីរពេទ្យរ៉ូយាល់រតនៈ បានដឹកអ្នកម្នាងចេញពីមន្ទីរពេទ្យកាល់ម៉ែត និងក្រោយមកធ្វើដំណើរតាមជើងយន្តហោះពិសេសចាកចេញពីកម្ពុជាដើម្បីព្យាបាលនៅប្រទេសថៃ ។ លោក ញ៉េប ប៊ុនជិន បានអះអាងកាលនោះថា គណបក្សហ្វុ៊នស៊ិនប៉ិចយល់ឃើញថា ករណីនេះសង្ស័យថា ជាអំពើភេរវកម្មច្រើនជាងគ្រោះថ្នាក់ចរាចរណ៍ធម្មតា ព្រោះរថយន្តបង្កបានបើកមកចូលក្នុងក្បួនព្រះទីនាំងរបស់សម្តេចក្រុមព្រះដែលធ្វើដំណើរបញ្ច្រាសទិសគ្នា ។ ក្រោយពេលកើតហេតុភ្លាម សម្តេចក្រុមព្រះនិងអ្នកម្នាងត្រូវបានគេជួយសង្គ្រោះដឹកមកកាន់មន្ទីរពេទ្យរ៉ូយាល់រតនៈ ក្នុងរាជធានីភ្នំពេញ ។ សម្តេចក្រុមព្រះមានរបួសស្រាល តែអ្នកម្នាងរងរបួសធ្ងន់នៅក្បាល ។ នៅល្ងាចថ្ងៃដដែលនោះ ក្រុមគ្រូពេទ្យនៅមន្ទីរពេទ្យរ៉ូយាល់រតនៈបានបញ្ជូនអ្នកម្នាងអ៊ុក ផល្លា ទៅផ្នែកសរសៃប្រសាទនៅឯមន្ទីរកាល់ម៉ែត មុនពេលនាំចេញទៅព្យាបាលនៅប្រទេសថៃ ។
ក្នុងឧបទ្ទវហេតុគ្រោះថ្នាក់កាលនោះ ត្រូវបានឱ្យដឹងថា រថយន្តដឹកដីធុនធំមួយគ្រឿងពាក់ស្លាកលេខភ្នំពេញ 3B-4405 បានបើកបរក្នុងល្បឿនលឿននៅលើកំណាត់ផ្លូវជាតិលេខ៧ និងបានជ្រុលទៅបុករថយន្តទំនើបប្រភេទBMW របស់សម្ដេចក្រុមព្រះ នរោត្តម រណឫទ្ធិ ប្រធានគណបក្សហ្វុ៊នសិុនបិច និងរថយន្តកងអង្គរក្សបណ្ដាលឱ្យរងរបួសធ្ងន់ស្រាលចំនួន៦នាក់ ។ ហេតុការណ៍នេះ បានកើតឡើងនៅភូមិអំពិលធំ ឃុំខ្វិតធំ ស្រុកព្រៃឈរ ខេត្តកំពង់ ចាម ។ ចំណែកអ្នកបើកបររថយន្តដឹកដីបានបើកទ្វាររថយន្តរត់គេចខ្លួនតាមវាលស្រែបាត់ ។ លោកវរសេនីយ៍ត្រី ស៊ាង ហ៊ន់ អធិការនគរបាលស្រុកព្រៃឈរបានឱ្យដឹងពេលនោះថា នៅមុនពេលកើតហេតុនាព្រឹកនោះសម្ដេចក្រុមព្រះ បានយាងចុះទៅសំណេះសំណាលជាមួយសមាជិកសមាជិកាគណបក្សហ្វុ៊នសិុនបិុចនៅវត្តគរ ស្ថិតក្នុងឃុំគរ ស្រុកព្រៃឈរ ។ បន្ទាប់មក ព្រះអង្គនិងអ្នកម្នាងយាងតាមរថយន្តខាងលើដើម្បីត្រឡប់ទៅរាជធានីភ្នំពេញវិញ ក៏ជួបហេតុការណ៍នោះតែម្ដង ។ ចំណែកអ្នកបើកបររថយន្តដឹកដីធុនធំ១គ្រឿងដែលបុករថយន្តBMW ពាក់ស្លាកលេខភ្នំពេញ2AC-1611 របស់ព្រះអង្គ ទោះបីជារត់គេចខ្លួនក៏ត្រូវបានស្គាល់ឈ្មោះនិងអត្តសញ្ញាណដែរគឺឈ្មោះផឹង ផេន ភេទប្រុស អាយុ៤១ឆ្នាំ ដែលក្រោយមកត្រូវនាំខ្លួនឡើងតុលាការ ។
ចែករំលែកព័តមាននេះ