រាជធានីភ្នំពេញ ៖ បុរសម្នាក់បានជួបគ្រោះចរាចរណ៍បែកក្បាលស្លាប់ភ្លាមៗយ៉ាងអាណោចអធម៌ បន្ទាប់ពីបានជិះម៉ូតូមួយគ្រឿងត្រូវរថយន្តបុកពីក្រោយរួចកិនពីលើអ្នកបើកម៉ូតូ ហេតុការណ៍នេះបានកើតឡើង កាលពីវេលាម៉ោង៨យប់ថ្ងៃទី១៧ ខែមិថុនា ឆ្នាំ២០១៨ ស្ថិតនៅចំណុចលើស្ពានអាកាស៥មករា តាមបណ្តោយផ្លូវសហពន្ធ័រុស្សី ក្នុងសង្កាត់ទឹកល្អក់១ ខណ្ឌទួលគោក ។
សពជនរងគ្រោះមានឈ្មោះ ឆៀម ធារ៉ា ភេទប្រុស អាយុ២១ឆ្នាំ មុខរបរមេការជាងសំណង់ ស្នាក់នៅការដ្ឋានសំណង់ មានទីលំនៅភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញរថយន្តរបស់ក្រុមហ៊ុនឯកជន ជាប្រភេទរថយន្តដឹកអ្នកដំណើរ៣៥កៅអីមួយគ្រឿង ម៉ាកហ៊ីយ៉ាន់ដាយ ពណ៌ពងមាន់ ពាក់ស្លាកលេខភ្នំពេញ3B-7920 បើករបរដោយបុរសម្នាក់ឈ្មោះ សឺ សំបូរ អាយុ៣៣ឆ្នាំ មុខរបរបើករថយន្ត ស្នាក់នៅលើរថយន្ត តាមបណ្តោយផ្លូវ៥៩៨ ក្នុងសង្កាត់ទួលសង្កែ ខណ្ឌឬស្សីកែវ មានស្រុកកំណើតនៅស្រុកពួក ខេត្តសៀមរាបបានបើកចេញពីម្តុំក្តាន់ពីរបំណងទៅយកភ្ញៀវនៅអាកាសយានដ្ឋានអន្តរជាតិភ្នំពេញបានធ្វើដំណើតាមបណ្តោយផ្លូវសហព័ន្ធរុស្សីទិសដៅពីកើតទៅលិច លុះមកដល់ចំណុចកើតហេតុខាងលើបានរេចង្កូតជ្រុលទៅបុកម៉ូតូមួយគ្រឿងម៉ាកToday ពណ៌ក្រហម ពាក់ស្លាកលេខភ្នំពេញ1GX-7165 បើកបរដោយបុរសម្នាក់ ដោយស្របទិសដៅគ្នាបានបុកពីក្រោយ បណ្តាលឲ្យកិនចំក្បាលក្រពឹតមុខធ្លាយខួរស្លាប់ ភ្លាមៗនោះរថយន្តបង្កបានព្យាយាម បើករត់គេចខ្លួនបានចម្ងាយ៤០០ម៉ែត្រ ត្រូវបានប្រជាពលរដ្ឋ និងសមត្ថកិច្ចចាប់មកវិញភ្លាម ។
ក្រោយពេលកើតហេតុសមត្ថកិច្ចមូលដ្ឋានបានប្រគល់ឲ្យជំនាញចរាចរណ៍ក្រុងធ្វើការវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នានៅពេលក្រោយ ។ ដោយឡែកសពជនរងគ្រោះសមត្ថកិច្ចប្រគល់ជូនសាច់ញាតិយកទៅធ្វើបុណ្យប្រពៃណី ៕
ចែករំលែកព័តមាននេះ