ខេត្តកំពង់ឆ្នាំង ៖ អគ្គិភ័យបានឆាបឆេះស្មៅ និងស្លឹកឈើងាប់ៗក្នុងបរិវេណមុខសាលាខេត្ត បណ្តាលឱ្យមានការភ្ញាក់ផ្អើលមនុស្សម្នាដែលធ្វើដំណើរតាមផ្លូវក្បែរសាលាខេត្ត ហើយភ្លាមៗនោះមន្ត្រីប៉ូលិសដែលនៅជិតបានយកដំបង ឬមែកឈើជួយវាយពន្លត់ ប៉ុន្តែមិនឈ្នះអំណាចភ្លើង ទើបរថយន្តពន្លត់អគ្គិភ័យរបស់ស្នងការដ្ឋានចេញជួយអន្តរាគមន៍ពន្លត់ទាន់ពេលវេលា។ ហេតុការណ៍នេះកើតឡើងកាលពីវេលាម៉ោង១និង៤៥នាទីរសៀលថ្ងៃទី១ មីនា ២០១៣ ។
តាមសាក្សីបាននិយាយថា មូលហេតុដែលនាំឱ្យមានអគ្គិភ័យនេះ គឺបណ្តាលមកពីទុស្សេខ្សែភ្លើង ។ ប្រភពដដែលបានបន្តថា មុនដំបូងនៅជ្រុងរបងសាលាខេត្តប៉ែកខាងកើត និងឆៀងខាងជើង មានធាងដូងងាប់បានធ្លាក់មកទើរលើខ្សែភ្លើងស្រាតបង្កឱ្យទុស្សេឆេះធាងដូងនោះធ្លាក់មកដី ហើយបានឆាបឆេះស្មៅខ្ពស់ៗប្រវែងប្រហែលកន្លះម៉ែត្រ (ស្មៅលាយស្បូវ) លាយជាមួយស្លឹកឈើ (ស្លឹកដើមម៉ៃសាក់) ហើយឆេះរាលយ៉ាងឆាប់រហ័សបង្កជាអណ្តាតភ្លើងខ្ពស់ៗបង្កឱ្យមានការភ្ញាក់ផ្អើល ភ្លាមៗនោះប៉ូលិសដែលប្រចាំការនៅជិត៣-៤នាក់ បានព្យាយាមយកមែកឈើទៅវាយពន្លត់ ប៉ុន្តែនៅតែមិនឈ្នះ ទើបរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តចេញជួយអន្តរាគមន៍ពន្លត់ទាន់ពេលវេលា ប៉ុន្តែទម្រាំចេញពន្លត់អគ្គិភ័យបានឆាបឆេះអស់វាលស្មៅមុខសាលាខេត្ត ប្រហែលជិត១ហិកតាទៅហើយ៕
ចែករំលែកព័តមាននេះ