ទូរទស្សន៍​ជាតិ​វៀតណាម VTV បាន​ចុះ​​កុងត្រា​ជាមួយ​ប៉ុស្តិ៍​ទូរទស្សន៍​ស្វ៊ី​ស Infront Sports & Media រឿង​ទិញ​សិទ្ធិ​ផ្សព្វផ្សាយ​ព្រឹត្តិការណ៍ World Cup ។ កិច្ចព្រមព្រៀង​នេះ​ដំបូង​ឡើយ​ត្រូវការ​ទទួលស្គាល់​ពី​សហព័ន្ធ​បាល់ទាត់​អន្តរជាតិ FIFAជា​មុន​សិន​មុន​ពេល​ព័ត៌មាន​លម្អិត​បង្ហា​ញ
ជាសាធារណៈ ។

យោង​តាម​មន្ត្រី VTV និយាយ​ថា កុងត្រា​នេះ​បាន​ផ្តល់​សិទ្ធិ​ឱ្យ​ទូរទស្សន៍​រដ្ឋ​វៀតណាម​ផ្សាយ​ផ្តាច់មុខ​លើ​គ្រប់​ប្រព័ន្ធផ្សព្វផ្សាយ​ទាំងអស់​ក្នុង​នោះ​រួម​មាន​ប៉ុស្តិ៍​ទូរទស្សន៍ ប្រព័ន្ធ​អុីន​ធើ​រ​ណេ​ត និង​លើ​កម្មវិធី​ទូរ​ស័ព្ទ​ដៃ ។ ប៉ុន្តែប៉ុស្តិ៍​ទូរទស្សន៍​ស្វ៊ី​ស Infront Sports & Media ទារដល់​ទៅ​១៤​លាន​​ដុល្លារ​សម្រាប់​ការលក់​សិទ្ធិ​ផ្សាយ World Cup ធ្វើឱ្យភាគី​ទូរទស្សន៍រដ្ឋវៀតណាម​វិលមុខ​ចង់​ដួល ។

យោង​តាម​ទីភ្នាក់ងារ​ព័ត៌មាន​វៀតណាម Vietnam News Agency ថា ចំនួន​ទឹក​លុយ​ដែល VTV ចំណាយ​ទិញ​សិទ្ធិ​ផ្សព្វផ្សាយមិន​ត្រូវ​បាន​ទម្លាយ​ទេ ប៉ុន្តែគេប៉ាន់ស្មានថា​មាន​ចំនួន​ច្រើន​ជាង៧លាន​ដុល្លារ ។ ទន្ទឹម​គ្នា​នេះ​ដែរ VTV មិន​បាន​បំភ្លឺ​រឿង​ពាក្យ​ចចាមអារ៉ាម​ថា ក្រុមហ៊ុន​ក្នុងស្រុក Vingroup បាន​ផ្តល់​កញ្ចប់​ថវិកា៥លាន​ដុល្លារ​ដើម្បី​ជួយ​ទិញ​សិទ្ធិ​ផ្សាយ​មួយ​នេះទេ ។ តែ​លោក Nguyen Viet Quang អគ្គនាយក​នៃVingroup ប្រាប់​សារព័ត៌មាន Tuoi Tre ថា ក្រុមហ៊ុន «​មិន​ស្ទាក់ស្ទើរ​» ក្នុងការជួយ​នៅ​ពេល​ទូរទស្សន៍​រដ្ឋ VTV ស្នើ​សុំ​ជំនួយ​សម្រាប់​ទិញ​សិទ្ធិ​ផ្សព្វផ្សាយ​នោះ​ទេ ។

អគ្គនាយក​ដដែល​រូប​នេះ​បន្ត​ថា ទំហំ​ទឹក​លុយ​ត្រូវ​បាន​ប្រគល់​ឱ្យ​ដោយ​គ្មាន​លក្ខខណ្ឌ​ហើយ Vingroup នឹង​ចំណាយ១ លាន​ដុល្លារ​ទៀត​សម្រាប់​ការ​ផ្សាយពាណិជ្ជកម្ម​លើ​ទូរទស្សន៍ VTV ពោល​គឺ​ដូច​ជា​អ្នក​ផ្សព្វផ្សាយ​ដទៃ​ទៀត​ដែរ ៕