ខេត្តរតនគិរី ៖ ក្រុមឈ្មួញរកស៊ីឈើខុសច្បាប់ នៅតែបន្តសកម្មភាពបំផ្លាញធនធានធម្មជាតិដដែលនៅខេត្តភាគឦសាន ។ នៅក្នុងការបង្ក្រាបបទល្មើសព្រៃឈើនេះ នគរបាលបានចាប់មេឈ្មួញធំម្នាក់ ជាជនជាតិវៀតណាម កាលពីថ្ងៃទី១៥ ខែមិថុនា…
ខេត្តរតនគិរី ៖ ក្រុមឈ្មួញរកស៊ីឈើខុសច្បាប់ នៅតែបន្តសកម្មភាពបំផ្លាញធនធានធម្មជាតិដដែលនៅខេត្តភាគឦសាន ។ នៅក្នុងការបង្ក្រាបបទល្មើសព្រៃឈើនេះ នគរបាលបានចាប់មេឈ្មួញធំម្នាក់ ជាជនជាតិវៀតណាម កាលពីថ្ងៃទី១៥ ខែមិថុនា វេលាម៉ោង៨ព្រឹក ខណៈក្រុមឈ្មួញបានយកឈើរាប់រយកំណាត់ សុទ្ធតែខ្នាតធំៗទៅលាក់ទុកនៅភូមិកាចូនលើ ឃុំកាចូនស្រុកវើនសៃ ។
តាមព័ត៌មានឱ្យដឹងថា គំនរឈើទាំងអស់នេះ ត្រូវបាននគរបាលការិយាល័យសេដ្ឋកិច្ចខេត្តចុះបង្ក្រាប ដឹកនាំដោយលោក ជា ដារ៉ា នាយការិយាល័យ ដោយមានការចង្អុលបង្ហាញពីលោកឧត្ដមសេនីយ៍ នួន គឿន ស្នងការនគរបាលខេត្ត និងលោកឧត្តមសេនីយ៍ វ៉ាន់ សង្វាត ស្នងការរងទទួលបន្ទុកផែនសេដ្ឋកិច្ច និងបង្ក្រាបបទល្មើស ។ លោកស្នងការរង វ៉ាន់ សង្វាត បានឱ្យដឹងថា ឈើដែលសមត្ថកិច្ចបង្ក្រាបនេះ មាន៣ប្រភេទគឺកកោះ គគីរ និងសុក្រំ ។
ឈើទាំងនេះ ត្រូវបានឈ្មួញអារនិងច្រៀកជាប្រភេទក្តារងឿ មានមុខកាត់ពី៨០ទៅ១០០សង្ទីម៉ែត្រ និងកម្រាស់១តឹកកន្លះ ប្រវែងពី៣ម៉ែត្រ ទៅ៤ម៉ែត្រ និងជាប្រភេទសសរ មានមុខកាត់៣០ទៅ៥០សង្ទីម៉ែត្រ ប្រវែងពី៤ម៉ែត្រទៅ៦ម៉ែត្រ ហើយឈើដែលបង្ក្រាបបាននេះ មានជាង១០០ដុំ ។ មន្ត្រីសមត្ថកិច្ចបញ្ជាក់ថា ឈើទាំងអស់នោះ ត្រូវបានយកមករក្សាទុកនៅខណ្ឌរដ្ឋបាលព្រៃឈើស្ទឹងត្រែង តែមិនទាន់បានធ្វើការវាស់វែងដឹងចំនួនច្បាស់លាស់នៅឡើយទេ ។
ជាមួយនេះ សមត្ថកិច្ចក៏បានឃាត់ខ្លួនបុរសជនជាតិវៀតណាមម្នាក់ជាមេឈ្មួញរកស៊ីឈើខុសច្បាប់នៅក្នុងទឹកដីខ្មែរ ដែលយកឈើមកគរទុកនៅចំណុចខាងលើ ។ លោក មឿង ខែម ទទួលបន្ទុកផែនអន្តោប្រវេសន៍បានឱ្យដឹងថា បុរសជនជាតិវៀតណាមនោះឈ្មោះ ផាម ថេគឿង អាយុ៤១ឆ្នាំ នៅខេត្តហាយផុង ប្រទេសវៀតណាម អត់ចេះនិយាយខ្មែរទេ ។
ជននេះត្រូវបានឃាត់ខ្លួននៅត្រង់ចំណុចគំនរឈើនោះតែម្តង កាលពីរសៀលថ្ងៃទី១៤ ខែមិថុនា ពីបទប្រមូលទិញផល-អនុផលព្រៃឈើដោយខុសច្បាប់ ប្រព្រឹត្តនៅស្រុកវើនសៃ និងបានបញ្ជូនទៅសាលាដំបូងខេត្តចាត់ការតាមច្បាប់ ។ ឈ្មួញឈើជនជាតិវៀតណាមនេះគឺសមត្ថកិច្ចបានតាមដានជាយូរខែមកហើយ និងមានវត្ថុតាងជារូបថតឈរថតក្បែរគំនរឈើនោះផងដែរ ។
ខេត្តមណ្ឌលគិរី ៖ ក្នុងហេតុការណ៍ដាច់ដោយឡែកមួយទៀត រថយន្តសាំយ៉ុងមួយគ្រឿងដែលដឹកសុទ្ធតែឈើខុសច្បាប់រាប់សិបកំណាត់ ត្រូវបានគេប្រទះឃើញបើកធ្លាក់ស្នាមភ្លោះផ្លូវជាតិលេខ៧៦ ត្រង់ចន្លោះគីឡូម៉ែត្រលេខ៦៤ និងលេខ៦៥ កាលពីវេលាថ្ងៃត្រង់ថ្ងៃទី១៥ ខែមិថុនា ក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំង តែមិនមានមនុស្សណាម្នាក់រងរបួសឡើយ ។
ប្រភពព័ត៌មានឱ្យដឹងថា រថយន្តសាំយ៉ុងខាងលើ ពណ៌ទឹកប្រាក់ ពាក់ផ្លាកលេខ ភ្នំពេញ ២A-៤៩៩៤ បើកបរចេញពីក្រុងសែនមនោរម្យឆ្ពោះទៅស្រុកកែវសីមា ។ លុះធ្វើដំណើរដល់ចំណុចខាងលើ ស្រាប់តែរេចង្កូតធ្លាក់ទៅខាងឆ្វេងដៃ បណ្តាលឱ្យរថយន្តខូចខាតស្ទើរទាំងស្រុង ដោយសារតែដឹកឈើលើសចំណុះ ។ក្រោយកើតហេតុ រថយន្តដឹកឈើខាងលើត្រូវបានមន្ត្រីឧទ្យានុរក្សដែនជម្រកការពារសត្វព្រៃកែវសីមា ដែលប្រចាំការនៅជិតនោះអូសយកទៅរក្សាទុកនៅស្នាក់ការរបស់ខ្លួន ។
ប្រភពដាច់ដោយឡែកមួយទៀតបានឱ្យដឹងថា ការដឹកជញ្ជូនឈើតាមរថយន្តសាំយ៉ុងចេញពីខេត្តមណ្ឌលគិរី ទៅកាន់ខេត្តនានា ត្រូវបានគេដឹងថាមាន ១-ឈ្មោះ ចែខុម ២-ឈ្មោះ ចែរឿន ៣-ឈ្មោះ រ៉ាន់ និង៤-ឈ្មោះ ក្តី ។ អ្នកទាំង៤នាក់នេះ ធ្វើសកម្មភាពដឹកឈើដែលលួចកែច្នៃខុសច្បាប់ចេញពីតំបន់ព្រៃស្រែពក ស្រុកពេជ្រាដា តាមរយៈរថយន្តសាំយ៉ុង រថយន្តកូរ៉េ រថយន្តប្រភេទមួយបាំងកន្លះជាដើម។
ទោះជាយ៉ាងណា រថយន្តរបស់ថៅកែឈើដុះស្នឹមទាំងនោះ មិនដែលត្រូវរំខានដោយសមត្ថកិច្ចឡើយ ព្រោះមានការរត់ការផ្លូវជាមុនទើបធ្វើការដឹកជញ្ជូនតាមក្រោយ ចៀសវាងការចាប់បង្ក្រាប លុះត្រាតែរថយន្តដឹកឈើទាំងនោះជួបគ្រោះថ្នាក់តាមផ្លូវដូចហេតុការណ៍ខាងលើទើបបែកធ្លាយ ៕
ចែករំលែកព័តមាននេះ