ខេត្តព្រះសីហនុ ៖ លោកអនុសេនីយ៍ឯក ញា វិសិទ្ធ អនុប្រធានមន្ទីរស្រាវជ្រាវយុត្តិធម៌ នៃបញ្ជាការដ្ឋានកងរាជអាវុធហត្ថខេត្តបានរងរបួសធ្ងន់ នៅក្នុងពេលចុះបំពេញការងារតាមបទបញ្ជារបស់គណ:បញ្ជាការឯកភាពខេត្ត ក៏ដូចជាចុះអនុវត្តតាមបទបញ្ជារបស់មេបញ្ជាការកងរាជអាវុធហត្ថខេត្ត ទាក់ទងទៅនឹងពាក្យ
បណ្តឹងរបស់ប្រជាពលរដ្ឋអំពីបទល្មើសព្រហ្មទណ្ឌ ដែលកើតឡើងនៅចំណុចពយម៉ាចូវក្នុងភូមិគគីរ ឃុំរាម ស្រុកព្រៃនប់ ។
តាមការរៀបរាប់របស់លោក ញា វិសិទ្ធ ដែលស្ថិតនៅក្នុងមន្ទីរពេទ្យថា មានពាក្យបណ្តឹងរបស់ប្រជាពលរដ្ឋជាកម្មករចាំចម្ការនៅចំណុចខាងលើថា មានករណីជម្លោះកើតឡើងរវាងកម្មករចាំចម្ការ ជាមួយកម្មករចាំចម្ការឱ្យអ្នកស្រី មឿង ស្រីទូច ដែលកន្លងមកបានអះអាងថា ជាក្មួយថ្នាក់ដឹកនាំម្នាក់នៅភ្នំពេញបានបញ្ជា
ឱ្យកម្មកររបស់ខ្លួនដុតបំផ្លាញម៉ូតូកម្មករចាំចម្ការភាគីម្ខាងទៀត ។
ក្រោយពីទទួលបានពាក្យបណ្តឹងនេះ និងទទួលបានបទបញ្ជាពីប្រធានគណៈបញ្ជាការឯកភាពខេត្ត និងបទបញ្ជារបស់លោកមេបញ្ជាការកងរាជអាវុធហត្ថខេត្ត នៅវេលាម៉ោងជិត១១ព្រឹកថ្ងៃទី៩ ខែមិថុនា កម្លាំងកងរាជអាវុធហត្ថមន្ទីរស្រាវជ្រាវយុត្តិធម៌ បានចុះដល់កន្លែងកើតហេតុនិងទីតាំងដីអ្នកស្រី មឿង ស្រីទូច ក្នុងគោលបំណងពិនិត្យនិងអញ្ជើញអ្នកស្រី និងបក្សពួកមកសួរនាំ ដើម្បីកសាងសំណុំរឿងទៅតាមនីតិវិធី ។
ប្រភពដដែលបន្តថា នៅពេលសមត្ថកិច្ចកងរាជអាវុធហត្ថទៅដល់ភ្លាម អ្នកស្រី មឿង ស្រីទូច បានលើកទូរស័ព្ទទាក់ទងខ្វែងខ្វាត់ទំនង ជាការរកការជួយអន្តរាគមន៍ ពេលនោះលោកបានអញ្ជើញអ្នកស្រី និងបក្សពួកដែលគេអះអាងថា ជាអង្គរក្ស ឱ្យមកកាន់បញ្ជាការដ្ឋានដើម្បីសួរនាំ ហើយអ្នកស្រីសុខចិត្តមកដោយជិះរថយន្តឡិចស៊ីស៥៧០ ហើយលោកក៏ឡើងជិះរថយន្តជាមួយដែរ ។ បន្ទាប់ពីលោកឡើងជិះក្នុងរថយន្តហើយអ្នកស្រី មឿង ស្រីទូច ឡើងទៅកាន់ចង្កូតបើកចេញមក និងបានប្តូរឱ្យអង្គរក្សដែលបើករថយន្តមកអង្គុយជិតលោកវិញ ។
តាមការចោទប្រកាន់របស់លោកអនុសេនីយ៍ឯកថា ទិដ្ឋភាពនេះហាក់បីដូចជាមានគម្រោងក្នុងការធ្វើសកម្មភាពអ្វីមួយ ។ ប៉ុន្តែលោក ញា វិសិទ្ធ យល់ឃើញថា កម្លាំងសមត្ថកិច្ចរបស់លោកមាននៅក្នុងរថយន្តសុីរ៉ែន ដែលបើកតាមពីក្រោយ ទំនងជាមិនមានរឿងអ្វីកើតឡើងបានទេ ។ ប៉ុន្តែមិនដូចការគិតទុកជាមុនរបស់លោកឡើយ គ្រាន់តែឡើងទៅអង្គុយនៅក្នុងរថយន្តភ្លាម អ្នកស្រី មឿង ស្រីទូច និងអង្គរក្សបានបញ្ជាឱ្យលោកបិទទូរស័ព្ទ មិនឱ្យធ្វើការទាក់ទង មិនខុសពីក្លាយខ្លួនពីសមត្ថកិច្ចមកជាចំណាប់ខ្មាំងវិញនោះទេ ។ ពួកគេបានបើករថយន្តក្នុងល្បឿនលឿនដូចហោះសំដៅមកភ្នំពេញ ធ្វើឱ្យរថយន្តរបស់កម្លាំងសមត្ថកិច្ចរបស់លោកតាមមិនទាន់។
ឃើញទិដ្ឋភាពមិនស្រួល លោកក៏សម្រេចចិត្តបើកទ្វាររថយន្ត រួចលោតចុះទាំងបង្ខំទៅខាងឆ្វេងដៃបណ្តាលឱ្យរងរបួសដាច់រយះស្លឹកត្រចៀកខាងស្តាំ ស្ទើរតែដាច់ទាំងស្រុង និងមានស្នាមជាំឈឺចុកចាប់ពេញខ្លួនប្រាណ ។ បន្ទាប់មក រថយន្តកម្លាំងសមត្ថកិច្ចដែលបើកដេញតាមពីក្រោយ បានដឹករូបលោកមកកាន់គ្លីនិកមិត្តភាពឃ្លាំងលើ ដើម្បីសង្គ្រោះ ។ ដោយឡែក អ្នកស្រី មឿង ស្រីទូច និងអង្គរក្សនៅក្នុងរថយន្តចំនួន២នាក់ទៀត បានបើករថយន្តគេចខ្លួនបាត់ទៅ ។
ក្រោយហេតុការណ៍កើតឡើង ក៏មានវត្តមានលោក យន្ត មីន អភិបាលខេត្តចុះសួរសុខទុក្ខ និងពិនិត្យមុខរបួសដល់គ្លីនិកផងដែរ ដែលជាការយកចិត្តទុកដាក់ខ្ពស់ និងលើកទឹកចិត្តពីថ្នាក់ដឹកនាំប្រធានគណៈបញ្ជាការឯកភាពខេត្ត ។
តាមការលើកឡើងរបស់អ្នកច្បាប់ថា សកម្មភាពរបស់អ្នកស្រី មឿង ស្រីទូច និងបក្សពួកជាអង្គរក្ស គឺជាសកម្មភាពប៉ុនប៉ងធ្វើឃាតគិតទុកជាមុនមកលើមន្ត្រីកងរាជអាវុធហត្ថ ។ លោកអនុសេនីយ៍ឯក ញា វិសិទ្ធ បានឱ្យដឹងថា ជុំវិញ ហេតុការណ៍ខាងលើ ថ្នាក់ដឹកនាំបញ្ជាការដ្ឋានកងរាជអាវុធហត្ថខេត្ត បានដាក់ពាក្យបណ្តឹងទៅសាលាដំបូងខេត្តហើយ ដើម្បីចាត់ការបន្តទៅតាមនីតិវិធីច្បាប់ ។
ទាក់ទងនឹងព័ត៌មានចោទប្រកាន់ខាងលើនេះ មិនអាចស្វែងរកការបំភ្លឺពីអ្នកស្រី មឿង ស្រីទូច បានទេ ៕
ចែករំលែកព័តមាននេះ