ក្រុមចោរធា.ក់ប្ល.ន់ម៉ូតូនៅផ្លូវជាតិលេខ៤ គេ.ចខ្លួនមិនដល់១០ម៉ោងផង អស់លក្ខណ៍៣នាក់
- ភ្នំពេញ
រាជធានីភ្នំពេញ ៖ ចោរស្ទាវកាំបិតផ្គាក់វ័យក្រោម១៨ឆ្នាំមួយក្រុមមានគ្នា៤នាក់ បានធ្វើសកម្មភាពធាក់ប្លន់ម៉ូតូ១គ្រឿងពីយុវជនម្នាក់កាលពីវេលាយប់រំលងអាធ្រាត្របានសម្រេច រួចនាំគ្នាយកជិះគេចខ្លួនបាត់ ប៉ុន្តែមិនដល់១០ម៉ោងផងទេ ក៏អស់លក្ខណ៍ចំនួន៣នាក់ ក្រោមកណ្ដាប់ដៃនគរបាលស្រុកអង្គស្នួល ចំណែកបក្ខពួក១នាក់ទៀតកំពុងរត់គេចខ្លួន ។
ហេតុការណ៍ខាងលើនោះបានកើតឡើងវេលាម៉ោង១យប់រំលងអាធ្រាត្រឈានចូលថ្ងៃទី១៦ ខែកញ្ញា ឆ្នាំ២០២៦ នៅតាមផ្លូវជាតិលេខ៤ ស្ថិតនៅក្នុងភូមិពងទឹក ឃុំបែកចាន ស្រុកអង្គស្នួល ខេត្ដកណ្ដាល ។
ជនសង្ស័យដែលត្រូវនគរបាលឃាត់ខ្លួនទាំងអស់នោះមិនមានផ្ទុកសារធាតុញៀនក្នុងខ្លួននោះទេ ក្នុងនោះរួមមាន១-ឈ្មោះ ជាតិ ចាន់ប្រាថ្នា អាយុ១៧ឆ្នាំ មានទីលំនៅភូមិបឹងធំទី២ សង្កាត់បឹងធំ ខណ្ឌកំបូល រាជធានីភ្នំពេញ (អ្នកបើកម៉ូតូ) ។ ២-ឈ្មោះ ពង្ស សីហា អាយុ១៦ឆ្នាំ មានទីលំនៅភូមិបឹងធំទី១ សង្កាត់បឹងធំ ខណ្ឌកំបូល(អ្នកបើកម៉ូតូធ្វើសកម្មភាពធាក់ប្លន់ម៉ូតូជនរងគ្រោះ) ។ ៣-ឈ្មោះ ទូច មិថុនា ភេទប្រុស អាយុ១៤ឆ្នាំ មានទីលំនៅភូមិប្រទះឡាង សង្កាត់ប្រទះឡាង ខណ្ឌកំបូល រាជធានីភ្នំពេញ (អ្នកជិះខាងក្រោយ ) ។ ចំណែកទី៤កំពុងរត់គេចខ្លួននោះឈ្មោះ និត ភេទប្រុស អាយុ១៥ឆ្នាំ មានទីលំនៅភូមិប្រទះឡាង សង្កាត់ប្រទះឡាង ខណ្ឌកំបូល (អ្នកជិះម៉ូតូជនរងគ្រោះក្រោយពេលប្លន់បានសម្រេច)។
នគរបានបានដកហូតវត្ថុតាងពីចោរស្ទាវខាងលើមួយចំនួនមានដូចជា ម៉ូតូម៉ាកHONDA DREAM C125 ពណ៌ទឹកសមុទ្រ ផលិតឆ្នាំ២០២៦ ពាក់ស្លាកលេខភ្នំពេញ 1MU-2126មួយគ្រឿង និងម៉ូតូម៉ាកSUZUKl NEX2 ពណ៌ប្រផេះផលិតឆ្នាំ២០០៩ ពាក់ស្លាកលេខ តាកែវ1R-1042មួយគ្រឿង ដែលម៉ូតូទាំង២គ្រឿងខាងលើគឺជារបស់ជនសង្ស័យជិះធ្វើសកម្មភាពប្លន់ ។ កាំបិតផ្កាក់ដងឫស្សី០១ដើម ,ទូរសព្ទដៃម៉ាក អាយហ្វូន១២ប្រូ ពណ៌ខៀវ០១គ្រឿង និងម៉ូតូ១គ្រឿងទៀតម៉ាក HONDA DREAM C125 ពណ៌ខ្មៅ ផលិតឆ្នាំ២០២៦ ពាក់ស្លាកលេខ ភ្នំពេញ 1MT-1033 ជារបស់ជនរងគ្រោះ ដែលជនសង្ស័យខាងលើប្លន់យកទៅ ។
យុវជនរងគ្រោះក្នុងអំពើធាក់ប្លន់នេះឈ្មោះ លឹម រតនា អាយុ១៩ឆ្នាំ មុខរបរកម្មកររោងចក្រ ស្នាក់នៅបន្ទប់ជួលភូមិចំការឡឹក សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
នគរបាលបានប្រាប់ឲ្យដឹងថា នៅមុនពេលកើតហេតុយុវជនរងគ្រោះបានជិះម៉ូតូរបស់ខ្លួនឌុបមិត្តភក្ដិម្នាក់ ចំណែកមិត្តភក្ដិម្នាក់ទៀតជិះម៉ូតូមួយគ្រឿងផ្សេង ត្រឡប់មកពីលេងមិត្តភក្ដិម្នាក់ដែលស្នាក់នៅក្នុងភូមិសាំងដំរី ឃុំឆក់ឈើនាង ស្រុកអង្គស្នួលខេត្តកណ្តាល ឆ្ពោះទៅផ្ទះជួលនៅភូមិចំការឪឡឹកវិញ ។ លុះពេលទៅដល់កន្លែងកើតហេតុ ស្រាប់តែចោរស្ទាវទាំង៤នាក់នោះ ជិះម៉ូតូចំនួន០២គ្រឿងខាងលើដេញតាមធ្វើសកម្មភាពធាក់ផ្ដួលម៉ូតូជនរងគ្រោះឈ្មោះលឹម រតនា បណ្តាលឲ្យដួល ហើយជនរងគ្រោះ និងមិត្តភក្ដិបាននាំគ្នារត់គេចខ្លួនឆ្ងាយពីម៉ូតូ ។ ព្រោះបានឃើញក្រុមចោរកាន់កាំបិតផ្កាក់នៅក្នុងដៃហើយស្រែកគំរាមកាប់សម្លាប់ថែមទៀត បន្ទាប់មកចោរក៏បានលើកម៉ូតូរបស់ជនរងគ្រោះជិះគេចខ្លួនទៅតាមផ្លូវបេតុងលេខ១៤២ ក្នុងទិសដៅពីទិសពីជើងទៅត្បូងកាត់តាមផ្សារបែកចានបាត់ស្រមោល ។
នគរបាលបានប្រាប់ឲ្យដឹងបន្តទៀតថា ក្រោយពេលកើតហេតុ យុវជនរងគ្រោះបានទៅដាក់ពាក្យបណ្តឹងនៅប៉ុស្ដិ៍នគរបាលរដ្ឋបាលបែកចាន ហើយក្រោយពីទទួលពាក្យបណ្តឹងភ្លាម កម្លាំងប៉ុស្តិ៍ខាងលើ បានសហការជាមួយកម្លាំងផ្នែកជំនាញនគរបាលយុត្តិធម៌ស្រុកអង្គស្នួល ចុះទៅធ្វើការស្រាវជ្រាវដល់ទីកន្លែងកើតហេតុភ្លាមៗ ។ រហូតដល់វេលាម៉ោង០៩ព្រឹកថ្ងៃខែឆ្នាំដដែល ដោយអនុវត្តតាមការដឹកនាំបញ្ជារបស់លោកឧត្តមសេនីយ៍ទោ ឈឿន សុចិត្ត ស្នងការ នៃស្នងការដ្ឋាននគរបាលខេត្តកណ្តាល ។ មានការសម្របសម្រួលពីឯកឧត្តម គុជ គីមឡុង ព្រះរាជអាជ្ញា នៃអយ្យការអមសាលាដំបូងខេត្តកណ្តាល ដឹកនាំចង្អុលបង្ហាញដោយលោកឧត្តមសេនីយ៍ត្រី ឡាក់ ម៉េងធី ស្នងការរងទទួលផែនការងារនគរបាលព្រហ្មទណ្ឌ ។
លោកវរសេនីយ៍ឯក មាន សំណាង អធិការនៃអធិការដ្ឋាននគរបាលស្រុកអង្គស្នួល បានដឹកនាំកម្លាំងផ្នែកនគរបាលយុត្តិធម៌ស្រុក និងកម្លាំងប៉ុស្តិ៍នគរបាលរដ្ឋបាលបែកចាន, ប៉ុស្តិ៍ក្រាំងម្កាក់ ស្រុកអង្គស្នួល ខេត្តកណ្ដាល ។ សហការជាមួយកម្លាំងប៉ុស្តិ៍នគរបាលរដ្ឋបាលបឹងធំ និងប៉ុស្តិ៍ប្រទះឡាង នៃអធិការដ្ឋាននគរបាលខណ្ឌកំបូល ធ្វើការបង្ក្រាបនិងឃាត់ខ្លួនចោរស្ទាវខាងលើបាន៣នាក់ រួមទាំងវត្ថុតាងរួចនាំទៅអធិការដ្ឋាននគរបាលស្រុកអង្គស្នួល ដើម្បីសួរនាំតាមនីតិវិធី ។
នៅចំពោះមុខសមត្ថកិច្ច ជនសង្ស័យ និងបក្ខពួកបានឆ្លើយសារភាពថា ខ្លួនបានធ្វើសកម្មភាពធាក់ទៅលើជនរងគ្រោះប្លន់យកម៉ូតូពិតប្រាកដមែន ៕
ចែករំលែកព័តមាននេះ