ខេត្តកោះកុង ៖ ស័ង្កសីចំនួន១២០០០សន្លឹកដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិតតាមរយៈលោកហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ និងជាមេបញ្ជាការរងកងទ័ពជើងគោកត្រូវបានប្រគល់ជូនតំបន់ប្រតិបត្តិការសឹករងកោះកុងនៅថ្ងៃទី១០ ខែមិថុនា…
ខេត្តកោះកុង ៖ ស័ង្កសីចំនួន១២០០០សន្លឹកដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិតតាមរយៈលោកហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ និងជាមេបញ្ជាការរងកងទ័ពជើងគោកត្រូវបានប្រគល់ជូនតំបន់ប្រតិបត្តិការសឹករងកោះកុងនៅថ្ងៃទី១០ ខែមិថុនា ឆ្នាំ២០១៨ ដើម្បីសាងសង់ផ្ទះជូនគ្រួសារយោធិនដែលបច្ចុប្បន្ននេះអង្គភាពបានកសាងផ្ទះជាង១០០០ខ្នងរួចហើយ និងបន្តកសាង បន្ថែម២០០ខ្នងទៀត ។
ឧត្តមសេនីយ៍ទោសុខ សុវត្តិទុមមេបញ្ជាការតំបន់ប្រតិបត្តិការសឹករងកោះកុងបានមានប្រសាសន៍ថា នេះ គឺជាការគិតគូរយកចិត្តទុកដាក់របស់រាជរដ្ឋាភិបាលចំពោះសុខទុក្ខ និងការរស់របស់កងទ័ព និងគ្រួសារកងទ័ពនៅទូទាំងប្រទេស ។
ដោយឡែកសម្តេចតេជោ ហ៊ុន សែនយកចិត្តទុកដាក់ចំពោះសុខទុក្ខ និងការរស់របស់កងទ័ពនិងគ្រួសារកងទ័ពនៅក្នុងតំបន់ប្រតិបត្តិការសឹករងកោះកុងសំដៅលើកតម្កើងកិត្តិយស និងការលើកស្ទួយកម្រិតជីវភាពរស់នៅរបស់កងទ័ព និងគ្រួសារកងទ័ព ។
មេបញ្ជាការតំបន់ប្រតិបត្តិការសឹករងកោះកុងជំនួសមុខឱ្យនាយទាហាន-ទាហានរង និងពលទាហានទាំងអស់នៅក្នុងអង្គភាពតំបន់ប្រតិបត្តិការសឹករងកោះកុង សូមគោរពថ្លែងអំណរគុណយ៉ាងជ្រាលជ្រៅចំពោះសម្តេចតេជោ និងសម្តេចកិត្តិព្រឹទ្ធិបណ្ឌិតតាមរយៈលោកហ៊ុន ម៉ាណែត ដែលជានិច្ចកាលតែងតែយកចិត្តទុក្ខដាក់លើវិស័យការពារជាតិតាមរយៈការគិតគូរយកចិត្តទុកដាក់ចំពោះការហ្វឹកហ្វឺន ការកសាងអង្គភាពទ័ព និងការស្នាក់នៅហូបចុករបស់កងទ័ព គ្រួសារកងទ័ព និងក្នុងអង្គភាពដែលកន្លងមកសម្តេចបានផ្តល់នូវគ្រឿងឧបភោគបរិភោគជាច្រើនទៀត ។
គួររំលឹកផងដែរថា ការប្រគល់អំណោយស័ង្កសីចំនួន១២០០០សន្លឹក ដើម្បីកសាងដើម្បីសាងសង់ផ្ទះជូនគ្រួសារយោធិននៅក្នុងបញ្ជាការសឹករងកោះកុង បានធ្វើឡើងបន្ទាប់ពីលោក ហ៊ុន ម៉ាណែត អគ្គលេខាធិការរងសមាគមអតីតយុទ្ធជនបានប្រកាសផ្តល់ជូននៅក្នុងឱកាសដែលលោកហ៊ុន ម៉ាណែត អញ្ជើញក្នុងពិធីសំណេះសំណាលជាមួយអតីតយុទ្ធជននៅខេត្តកោះកុងកាលពីថ្ងៃទី២២ ខែឧសភា ឆ្នាំ២០១៨ កន្លងទៅនេះ ៕
ចែករំលែកព័តមាននេះ