ខេត្តប៉ៃលិន ៖ ប្រជាពលរដ្ឋរស់នៅជាប់នឹងតំបន់ព្រំដែនបានលើកឡើងថា រយ:ពេលចុងក្រោយនេះ តម្លៃដីឡូត៍ ដែលក្រុមឈ្មួញពុះអង្កន់លក់នៅជាប់នឹងព្រំដែនកម្ពុជាថៃ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន មានការហក់ស្ទុះឡើងថ្លៃយ៉ាងខ្លាំងគួរឱ្យកត់សម្គាល់ ដោយ១ម៉ែត្រការ៉េឡើងរហូតដល់២៥ ទៅ៣៣ ឬ៤០ដុល្លារ ដែលជាហេតុធ្វើឱ្យក្រុមឈ្មួញមួយចំនួនបានរត់ការសុំច្បាប់គ្រប់មន្ទីរ សា្ថប័នពាក់ព័ន្ធ យកគ្រឿងចក្រទៅជីកកាយដីភ្នំ យកធ្វើជាកម្មសិទ្ធិ និងជីកយកអាចម៌ដីទៅចាក់លុបបំពេញដីទំនាប ឬអូរជ្រៅៗ ដើម្បីពុះលក់យ៉ាងគគ្រឹកគគ្រែង ។
ប្រជាពលរដ្ឋជាច្រើននាក់រស់នៅភូមិផ្សារព្រំ បានឱ្យដឹងថា ដីនៅជាប់នឹងព្រំដែនបច្ចុប្បន្នមានតម្លៃឡើងខ្ពស់ហួសពីធម្មតា ដោយកាលពីមុនគេគ្រាន់តែពុះអង្កន់លក់ក្នុង១ប្លង់ ដែលមានបណ្តោយប្រវែង២០ម៉ែត្រ ទទឹង៥ម៉ែត្រ តម្លៃត្រឹមតែ៤០០០ទៅ៥០០០ដុល្លារ ហើយកន្លែងខ្លះជាប់នឹងផ្លូវជាតិ បណ្តោយប្រវែង២៩ម៉ែត្រ ទទឹង១០ម៉ែត្រ ឈ្មួញលក់ត្រឹមតែ១៤០០០ ទៅ១៥០០០ដុល្លារប៉ុណ្ណោះ ។ ប្រភពបន្តទៀតថា ប៉ុន្តែនៅរយ:ប៉ុន្មានខែចុងក្រោយនេះ ស្រាប់តែ ដីឡូតិ៍កន្លែងខ្លះមានការប្រែប្រួល ដោយត្រូវឈ្មួញចូលទៅទិញគិតជាម៉ែត្រការ៉េទៅវិញ ដោយ១ម៉ែត្រការ៉េឡើងខ្ពស់រហូតដល់២៥ទៅ៣៣ដុល្លារ ខ្លះទៀត១ម៉ែត្រការ៉េ៤០ដុល្លារ ។ ដូច្នេះហើយ ទើបអ្នកមានដីនៅជាប់នឹងភ្នំ ក៏ខិតខំប្រឹងប្រែង រត់ការជីកកកាយពង្រាបដីភ្នំដឹកយកទៅចាក់នៅដីទំនាប ដើម្បីពុះឡូតិ៍លក់ឱ្យឈ្មួញទាំងដីភ្នំដែលពង្រាបរួច និងដីជង្ហុកដែលចាក់បំពេញរួច លក់ចែកលុយគ្នាយ៉ាងសប្បា យតែម្តង ។ ហើយអ្វីដែលប្រជាពលរដ្ឋមានការព្រួយបារម្ភខ្លាំងបំផុតនោះ ខណ:ឃើញមានគ្រឿងចក្រចូលទៅជីកកកាយដីភ្នំ ដឹកលក់យ៉ាងពពាក់ពពូន បណ្តាលឱ្យភ្នំមួយចំនួនទទួលរងការខូចខាតបាត់បង់ទ្រង់ទ្រាយដើមទាំងស្រុង និងភ្នំមួយចំនួនទៀត កំពុងបាត់បង់ជាបណ្តើរៗ ផងដែរ ។
ប្រភពព័ត៌មានពីមេការសំណង់ម្នាក់ ឈ្មោះ ឈុំ ភឿន បានឱ្យដឹងថា រហូតមកដល់ពេល នេះ ដីឡូតិ៍ ដែលគេពុះរួចរាល់កាលពីពេលថ្មីៗ ត្រូវបានក្រុមឈ្មួញចូលទៅទិញយកទាំងអស់ ដោយអ្នកខ្លះទិញបម្រុងនឹងបង្កើតជាអគារកាស៊ីណូបន្ថែមទៀត ខ្លះទិញយកសម្រាប់សាងសង់ផ្ទះបូរីនិងផ្ទះសំណាក់ ដើម្បីលក់ឱ្យភ្ញៀវទិញស្នាក់នៅផងដែរ ។ លោកបន្តទៀតថា អ្នកដែលមានដីនៅត្រង់ម្តុំៗព្រំដែនខាងលើ ពិតជាលក់បានចំណេញលុយរាប់ម៉ឺនដុល្លារឯណោះ ហើយមានអ្នកខ្លះទៀ ត កំពុងតែរៀបចំពុះដីឡូតិ៍ក្បែរគ្នានោះដែរ ដើម្បីលក់បន្ថែមទៀតជាបន្តបន្ទាប់ ។ អ្នកខ្លះទៀតបានលើកឡើងថា ឈ្មួញដែលចូលមកទិញដីឡូតិ៍ និងដីភ្នំ ភាគច្រើនគឺជនជាតិ ថៃ និងជនជាតិចិន ដោយមិនត្រឹមតែទិញដីរាបនោះទេ សូម្បីតែដីភ្នំទាំងប៉ុន្មានក៏គេទិញរួចរាល់អស់ ហើយដែរ រង់ចាំតែថ្ងៃរៀបចំបង្កើតកន្លែងទេសចរជាដើម ។
ពាក់ព័ន្ធទៅនឹងបញ្ហានេះ ភ្នាក់ងារយើងធ្លាប់សួរទៅលោក សំ សារ៉េត អភិបាលស្រុកសាលា ក្រៅដែរ ដោយលោកប្រាប់ថា អត់មានការលក់ដូរដីភ្នំនោះទេ ហើយបើសិនជាមានគ្រឿងចក្រជីកកកាយដីភ្នំលក់ សូមឱ្យទាក់ទងទៅខាងមន្ទីរជំនាញ ព្រោះគេជាអ្នកគ្រប់គ្រងដីភ្នំ ។ ចំណែកលោក គឹម សុខា បានឱ្យដឹងថា អត់មានការលក់ដូរភ្នំនៅតំបន់អភិរក្សខាងលើឡើយ តែមានក្រុមហ៊ុនទឹកស្អាតមួយ បានសុំច្បាប់ ឈូសឆាយព្រៃលើភ្នំសារវ៉ាន់ ដើម្បីដាក់អាងស្តុកទឹក សម្រាប់ផ្គត់ផ្គង់កង្វះ ខាតទឹកដល់ប្រជាពលរដ្ឋរស់នៅក្នុងភូមិផ្សារព្រំប៉ុណ្ណោះ ៕
ចែករំលែកព័តមាននេះ