ខេត្តកំពង់ស្ពឺ ៖ យ៉ាងហោចណាស់ មានកម្មករ-កម្មការិនីរោងចក្រជាច្រើននាក់ បានរងរបួសធ្ងន់-ស្រាល ហើយត្រូវរថយន្តសាមុយដឹកទៅសង្គ្រោះនៅមណ្ឌលសុខភាព ក្រោយរថយន្តសណ្តោងធុនធំដឹកខ្សាច់មួយគ្រឿង បើកលឿនជ្រុលចង្កូតទៅបុករថយន្តទួរីសដឹកក្រុមកម្មករនោះ កើតឡើងកាលពីវេលាម៉ោង០៦ និង៤០នាទីព្រឹកថ្ងៃទី០៩ មិថុនា ស្ថិតលើកំណាត់ផ្លូវជាតិលេខ០៤ ត្រង់ចន្លោះបង្គោលគីឡូម៉ែត្រលេខ៦៦ ទៅលេខ៦៧ ក្នុងភូមិត្រពាំងអត់ទឹក ឃុំគិរីវន្ត័ ស្រុកភ្នំស្រួច ខេត្តកំពង់ស្ពឺ ។
តាមប្រភពពីប្រជាពលរដ្ឋថា នៅមុនពេលកើតហេតុ បានឃើញរថយន្តដឹកកម្មករម៉ាកត្រូពិច ពណ៌ស្លែ ពាក់ស្លាកលេខកំពង់ស្ពឺ2A-0652 ធ្វើដំណើរក្នុងទិសដៅពីលិចទៅកើត ។ លុះមកដល់ចំណុចកើតហេតុស្រាប់តែ មានរថយន្តធុនធំសណ្តោងដឹកខ្សាច់ម៉ាកហ៊ីយ៉ាន់ដាយក្បាលពណ៌.ស ទ្រុងពណ៌ខៀវ ពាក់ស្លាកលេខភ្នំពេញ3A-5619 បើកលឿនបញ្ច្រាសផ្លូវបើកលឿនជ្រុលទៅបុកចំពីមុខយ៉ាងពេញទំហឹង បណ្តាលរថយន្តទាំង២គ្រឿងជ្រុលធ្លាក់ផ្លូវ ហើយមនុស្សរងរបួសរណូករណែលពេញផ្លូវ ។
ភ្លាមៗនោះ រថយន្តសាមុយដឹកយកជនរងគ្រោះទៅព្យាបាលភ្លាមៗផងដែរ ។ ចំពោះក្រុមកម្មករកម្មារិនីរងរបួសមិនទាន់ស្គាល់អត្តសញ្ញាណនោះទេ គ្រាន់តែដឹងថា មានរងរបួសសរុប៤៥នាក់ ។ ក្រោយកើតហេតុគេបានឃើញនគរបាលជំនាញបានធ្វើការវាស់វែងដឹកអូសយករថយន្តទាំង២គ្រឿងយកទៅរក្សាទុករង់ចាំដោះស្រាយនៅពេលក្រោយ ។
ព័ត៌មានលម្អិតនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ