រាជធានីភ្នំពេញ ៖ កំណាត់ផ្លូវបេតុងមួយខ្សែត្រូវបានអាជ្ញាធរខណ្ឌសែនសុខណែនាំឲ្យក្រុមហ៊ុនក្រឡុកស៊ីម៉ងត៍ BST ស្ថាបនាឡើងវិញ បន្ទាប់ពីត្រូវបានបំផ្លាញដោយរថយន្តដឹកធ្ងន់របស់ក្រុមហ៊ុននេះ ហើយប្រជាពលរដ្ឋមានប្រតិកម្មនោះ ។ នៅព្រឹកថ្ងៃទី០៨ ខែមិថុនានេះលោកម៉ូវ…
រាជធានីភ្នំពេញ ៖ កំណាត់ផ្លូវបេតុងមួយខ្សែត្រូវបានអាជ្ញាធរខណ្ឌសែនសុខណែនាំឲ្យក្រុមហ៊ុនក្រឡុកស៊ីម៉ងត៍ BST ស្ថាបនាឡើងវិញ បន្ទាប់ពីត្រូវបានបំផ្លាញដោយរថយន្តដឹកធ្ងន់របស់ក្រុមហ៊ុននេះ ហើយប្រជាពលរដ្ឋមានប្រតិកម្មនោះ ។
នៅព្រឹកថ្ងៃទី០៨ ខែមិថុនានេះលោកម៉ូវ ម៉ានិត អភិបាលខណ្ឌសែនសុខក៏បានចុះទៅត្រួតពិនិត្យបន្ទាប់ពីក្រុមហ៊ុនក្រឡុកស៊ីម៉ង់ BST បានដាក់គ្រឿងចាក់ចាប់ផ្តើមស្ថាបនាឡើងវិញ ។ កំណាត់ផ្លូវដែលត្រូវបានស្ថាបនាឡើងវិញនោះមានប្រវែងជាង១០០ម៉ែត្រ និងទទឹង៦ម៉ែត្រ ស្ថិតនៅខាងជើងជាប់សាលាខណ្ឌសែនសុខ ក្នុងភូមិរោងចក្រ១ សង្កាត់គោកឃ្លាង ខណ្ឌសែនសុខ ។ ទោះបីជាយ៉ាងណានៅមានកំណាត់ផ្លូវខាងជើងនោះទៀត និងមួយចំនួនទៀតកំពុងត្រូវបានបំផ្លាញដោយក្រុមហ៊ុនក្រឡុងស៊ីម៉ងត៍មួយនេះដែរ ។
អាជ្ញាធរបានឲ្យដឹងថា កំណាត់ផ្លូវបេតុងនេះពីមុនស្ថាបនាដោយសាលាខណ្ឌសែនសុខ ។ ដោយរថយន្តដឹកដីខ្សាច់ថ្ម និងរថយន្តក្រឡុកស៊ីម៉ងត៍ចេញចូលធ្វើឲ្យកំណាត់ផ្លូវនេះត្រូវបានបំផ្លាញខូចខ្ទេចជាអន្លើរៗ និងក្លាយជារណ្តៅទឹកដក់បង្កការលំបាកដល់ប្រជាពលរដ្ឋក្នុងការធ្វើដំណើរ ។ ទន្ទឹមនោះប្រជាពលរដ្ឋក៏បានធ្វើការរិះគន់ និងមានបណ្តាញព័ត៌មានមួយចំនួនក៏បានផ្សព្វផ្សាយទើបអាជ្ញាធរក៏បានណែនាំឲ្យក្រុមហ៊ុនស្ថាបនាឡើងវិញ ហើយបានដាក់គ្រឿងបើកដំណើរការស្ថាបនានៅពេលនេះ ។ នៅក្នុងការស្ថាបនាកំណាត់ផ្លូវក្រុមហ៊ុនលាយស៊ីម៉ង់ត៍BST ជាអ្នកចំណាយថវិកាទាំងស្រុង ៕
ចែករំលែកព័តមាននេះ