ខេត្តកណ្តាល ៖ បុរសម្នាក់បានស្លាប់ខណៈទៅមើលស្រែ ក្រោយដើរជាន់ខ្សែលួសបង្កៃប្រើចរន្តអាគុយដែលអ្នកធ្វើស្រែជាប់គ្នារាយឆក់កណ្ដុរនៅដីស្រែប្រាំងរបស់ឈ្មោះ សុឹម ម៉ាប់ក្រោយភូមិឈើទាលភ្លោះ ឃុំស្វាយអំពារ ស្រុកមុខកំពូល ។ មន្ត្រីនគរបាលស្រុកមុខកំពូលបានឱ្យដឹងថា ជនរងគ្រោះឈ្មោះ វ៉ាយ ទឹម អាយុ៥៦ឆ្នាំ នៅក្នុងភូមិឃុំខាងលើ បានត្រូវឆក់ស្លាប់ កាលពីវេលាទៀបភ្លឺថ្ងៃទី៣១ ខែឧសភា ។ ចំណែកអ្នករាយខ្សែលួសឆក់កណ្ដុរ គឺឈ្មោះសុឹម ម៉ាប់ ភេទប្រុស អាយុ៤៧ឆ្នាំ ដែលជាម្ចាស់ស្រែប្រាំងនៅជាប់គ្នានោះ និងរស់នៅក្នុងភូមិជាមួយគ្នា ។
វត្ថុតាងដែលសមត្ថកិច្ចរឹបអូសក្រោយកើតហេតុមាន អាគុយ១ អាំងវែរទរ័១គ្រឿង ខ្សែលួសប្រវែង១២០ម៉ែត្រ និងចន្ទល់ឫស្សីខ្លីៗមួយចំនួន ។មន្ត្រីនគរបាលឱ្យដឹងទៀតថា ម្ចាស់ស្រែខាងលើក្រោយពីព្រោះស្រូវហើយបានរយៈពេល១ខែ ស្រូវដុះបានកម្ពស់ប្រមាណ៣តឹក ក៏ចាប់ផ្ដើមរាយខ្សែលួសបង្កៃឆក់កណ្ដុរជុំវិញដីស្រែទំហំ១២ម៉ែត្រគុណនឹង១៨០ម៉ែត្រ ក្នុងគោលបំណងការពារកុំឱ្យកណ្តុរចូលសុីស្រូវ ដោយមានដាក់ឈើខ្វែង និងស្បោងកៅស៊ូជាសម្គាល់ឱ្យគេដឹងផង ។
ក្នុងការរាយខ្សែលួសឆក់កណ្ដុរនេះ ម្ចាស់ស្រែតភ្ជាប់ចរន្តភ្លើងអាគុយតែនៅពេលយប់ចាប់ពីម៉ោង៧ដល់ម៉ោង៥ភ្លឺ ដោយនៅដេកចាំផងដែរ ។ នៅថ្ងៃ៣០ ខែឧសភា វេលាម៉ោង៧យប់ ម្ចាស់ស្រែបានយកអាគុយ៧០អំពែរនិងអាំងវែរទ័រ ទៅរាយខ្សែលួសឆក់កណ្ដុរនៅស្រែខាងលើដូចសព្វដង លុះដល់ម៉ោង១០យប់ មេឃភ្លៀងក៏ឈប់ឆក់ហើយមកផ្ទះវិញ។ប្រភពព័ត៌មានបន្តថា លុះនៅវេលាម៉ោង២រំលងអធ្រាត្រឈានចុលថ្ងៃទី៣១ ខែឧសភា ក៏យកខ្សែលួសទៅរាយឆក់កណ្ដុរបន្តទៀត ។ ក្រោយពីរាយរួចបានប្រហែល១ម៉ោង និងកំពុងដើររើសកណ្ដុរ ស្រាប់តែឃើញជនរងគ្រោះដើរមកមើលសន្ទូងរបស់ខ្លួនដែលនៅជាប់ព្រំដីគ្នា។
ពេលឃើញជនរងគ្រោះដើរចូលមកក៏ស្រែកប្រាប់ថា«ខ្ញុំមិនទាន់ដោះអាគុយទេ» តែជនរងគ្រោះមិនឮនៅតែដើរចូលមកទៀតជិតដល់ខ្សែលួស អ្នករាយខ្សែលួសក៏រត់ទៅដោះតង្កៀបចេញពីក្បាកអាគុយ រួចងាកទៅមើលអ្នកដើរចូលមកមុននេះ ស្រាប់តែឃើញឆក់ដួលបាត់ទៅហើយ ។ បន្ទាប់មក បានមកជួយធ្វើចលនាឱ្យជនរងគ្រោះ តែហួសពេលទៅហើយ ។នៅវេលាម៉ោង៦ព្រឹក កូនជនរងគ្រោះនិងបងប្អូនក្នុងភូមិ បាននាំគ្នាយកសពជនរងគ្រោះមកតម្កល់នៅនឹងផ្ទះ ហើយរាយការណ៍ប្រាប់ទៅនគរបាលប៉ុស្តិ៍ស្វាយអំពារ ។ ក្រោយពេលទទួលបានដំណឹងនេះ មន្ត្រីជំនាញសហការជាមួយនគរបាលប៉ុស្តិ៍និងអាជ្ញាធរមូលដ្ឋាន បានចុះដល់ ដើម្បីពិនិត្យកន្លែងកើតហេតុនិងសព ។
ការសន្និដ្ឋាននិងវាយតម្លៃឃើញថា ជនរងគ្រោះពិតជាស្លាប់ដោយសារចរន្តបង្កៃឆក់កណ្ដុរមែន ហើយអ្នករាយខ្សែលួសឆក់កណ្តុរបណ្ដាលឲ្យឆក់មនុស្សស្លាប់នេះ ក៏ត្រូវនគរបាលឃាត់ខ្លួនដើម្បីកសាងសំណំុរឿងចាត់ការតាមនីតិវិធី ៕
ចែករំលែកព័តមាននេះ