រាជធានីភ្នំពេញ ៖ បុរសចំណាស់ម្នាក់ត្រូវបានសមត្ថកិច្ចប៉ុស្តិ៍រដ្ឋបាលនគរបាលព្រែកឯង ធ្វើការឃាត់ខ្លួនចាត់ការតាមនីតិវិធីច្បាប់ ក្រោយបុរសរូបនេះស្រវឹងស្រាចាប់រំលោភកូនស្រីបង្កើតខ្លួនឯងសម្រេច ហេតុការណ៍នេះកើតឡើងកាលពីល្ងាចថ្ងៃទី៥ មិថុនា ស្ថិតនៅចំណុចខ្ទមទុកចោលមួយកន្លែង ក្នុងខណ្ឌច្បារអំពៅ ។
ជនសង្ស័យឈ្មោះ ឃុន សឺង ភេទប្រុស អាយុ៥០ឆ្នាំ មុខរបរកម្មករសំណង់ ត្រូវជាឪពុកបង្កើតកុមារីរងគ្រោះ អាយុ៩ឆ្នាំ ជាសិស្ស មានទីលំនៅក្នុងខណ្ឌច្បារអំពៅ ។
តាមមន្ត្រីសមត្ថកិច្ចឱ្យដឹងថា នៅវេលាល្ងាចថ្ងៃទី៥ មិថុនា កុមារីរងគ្រោះកំពុងអង្គុយនៅខ្ទមម្នាក់ឯង រង់ចាំ ម្តាយដែលចុះទៅដកក្រអៅឈូកក្នុងបឹង ។ ពេលនោះជនសង្ស័យជាឪពុកផឹកស្រាស្រវឹងជោកជាំបានដើរមកដល់ខ្ទមឃើញកូនស្រីអង្គុយម្នាក់ឯង ក៏ដឹកដៃចូលទៅក្នុងផ្ទះទុកចោលក្បែរខ្ទម រួចធ្វើចាប់រំលោភ កូនស្រីបង្កើតរហូតបានសម្រេចតែម្តង ។ ខណៈនោះកុមារីរងគ្រោះព្យាយាមរើបំរះ និងស្រែកឱ្យគេឯងជួយ តែគ្មានអ្នកណាលឺឡើយ ព្រោះតំបន់នេះជាតំបន់ព្រៃគ្មានអ្នកភូមិឡើយ ។ ក្រោយបានសម្រេចនៅល្ងាចថ្ងៃដដែល កុមារីរងគ្រោះបានរៀបរ៉ាប់ដំណើររឿងប្រាប់ម្តាយទាំងទឹកភ្នែក និងទឹកមុខក្រៀមបំផុត ។ លុះមកទល់នឹងព្រឹកថ្ងៃទី៦ ស្ត្រីជាម្តាយបាននាំកូនទៅដាក់ពាក្យបណ្តឹងនៅប៉ុស្តិ៍នគរបាលមូលដ្ឋាន ។
បើតាមការរៀបរាប់របស់កុមារីរងគ្រោះបានបញ្ជាក់ថា កន្លងមក បុរសជាឪពុកធ្លាប់ប្រើដៃលេងប្រដាប់ភេទនាងចំនួន៣លើករួចមកហើយ តែបុរសជាឪពុកគំរាមមិនអោយប្រាប់ម្តាយទេ ។
ក្រោយមកសមត្ថកិច្ចក៏ចុះទៅឃាត់ខ្លួនជនសង្ស័យជាឪពុកដល់ផ្ទះតែម្តង ហើយនៅមុខសមត្ថកិច្ច បុរសជាឪពុកនោះទទួលស្គាល់ទង្វើដែលបានប្រព្រឹត្តិលើកូនស្រីបង្កើតពិតប្រាកដមែន ។ យ៉ាងណាមិញ បច្ចុប្បន្នជនសង្ស័យត្រូវបានបញ្ចូនខ្លួនទៅកាន់អធិការដ្ឋាននគរបាលខណ្ឌច្បារអំពៅ រង់ចាំកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ