ខេត្តសៀមរាប ៖ ព័ត៌មានបឋមបានឲ្យដឹងថា កាលពីវេលាម៉ោង០៦ល្ងាច ថ្ងៃទី០៦ មិថុនា ២០១៨នេះ កម្លាំងសមត្ថកិច្ចនគរបាលខេត្តសៀមរាប បានសហការជាមួយនគរបាលខេត្តបាត់ដំបង បានធ្វើការឃាត់ខ្លួនជនសង្ស័យម្នាក់ នៅចំណុចស្តុបបេនឡានចុងកៅស៊ូ ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ពាក់ព័ន្ធករណីចាប់ក្មេងអាយុ៩ឆ្នាំជំរិតទារប្រាក់។ ជនសង្ស័យឈ្មោះ វ៉ន ទិច ហៅទី ភេទប្រុស អាយុ៣៤ឆ្នាំ មុខរបរជាកម្មករ ស្នាក់នៅមិនពិតប្រាកដ។ ចំណែកជនរងគ្រោះឈ្មោះ ប៉ន ស្រីចាន់សុភាព ភេទស្រី អាយុ៩ឆ្នាំ មានទីលំនៅភូមិដូង ឃុំបឹងរាំង ស្រុកកំរៀង ខេត្តបាត់ដំបង។
សមត្ថកិច្ចឲ្យដឹងថា ជនសង្ស័យបានធ្វើសកម្មភាពចាប់ក្មេងស្រីដែលជាជនរងគ្រោះអាយុ៩ឆ្នាំ ពីខេត្តបាត់ដំបងក្នុងគោលបំណងយកទៅជំរិតទារប្រាក់ពីអាណាព្យាបាល តែដោយការស្រាវជ្រាវ របស់សមត្ថកិច្ចខេត្តបាត់ដំបង ក៏ដឹងពីគោលដៅលាក់ខ្លួនរបស់ជនសង្ស័យ ទើបសមត្ថកិច្ចខេត្តដំបង សហការជាមួយសមត្តកិច្ចខេត្តសៀមរាប តាមចាប់ខ្លួនជនសង្ស័យនៅចំណុចបេនឡានចុងកៅស៊ូ ខេត្តសៀមរាប។ ក្រោយពីឃាត់ខ្លួននគរបាលខេត្តសៀមរាប បានប្រគល់ជនសង្ស័យឲ្យទៅសមត្ថកិច្ច ខេត្តបាត់ដំបង ចាត់ការតាមផ្លូវច្បាប់៕
ចែករំលែកព័តមាននេះ