រាជធានីភ្នំពេញ ៖ ស្ត្រីម្នាក់មានប្តីជាជនជាតិបរទេស តែមិនដឹងថាជាតិសាសន៍អីទេ ទើបសម្រាលកូនស្រី បានអាយុ២ខែ ក៏ខូចចិត្តរឿងប្តីលួចមានស្រី ក៏បីឱបកូនខ្ចីប៉ុនប៉ងទៅលោតទឹកលើស្ពានជ្រោយចង្វាថ្មីសម្លាប់ខ្លួន បង្កឲ្យមានការភ្ញាក់ផ្អើលកាលពីវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី៤…
រាជធានីភ្នំពេញ ៖ ស្ត្រីម្នាក់មានប្តីជាជនជាតិបរទេស តែមិនដឹងថាជាតិសាសន៍អីទេ ទើបសម្រាលកូនស្រី
បានអាយុ២ខែ ក៏ខូចចិត្តរឿងប្តីលួចមានស្រី ក៏បីឱបកូនខ្ចីប៉ុនប៉ងទៅលោតទឹកលើស្ពានជ្រោយចង្វាថ្មីសម្លាប់ខ្លួន បង្កឲ្យមានការភ្ញាក់ផ្អើលកាលពីវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី៤ ខែមិថុនា ។
តាមប្រភពព័ត៌មានពីសមត្ថកិច្ចនៅលើស្ពានរៀបរាប់ឱ្យដឹងថា មុនពេលកើតហេតុ មានអ្នកធ្វើដំណើរឆ្លងកាត់លើស្ពានជ្រោយចង្វាថ្មី បានឃើញស្ត្រីម្នាក់បីកូនខ្ចីប៉ាត់ញ៉ាត់ដូចប្រញាប់ណាស់ ដើរឡើងស្ពានជ្រោយចង្វាថ្មីបានបន្តិច ក៏ឈប់ហើយឈរអែបខាងបម្រុងនឹងឡើងលើបង្កាន់ដៃស្ពាន ដើម្បីលោតទឹកសម្លាប់ខ្លួនទាំងកូនខ្ចីបីនៅឱបទ្រូង ។ ឃើញសកម្មភាពបែបនេះ អ្នកធ្វើដំណើរលើស្ពាន និងសមត្ថកិច្ចបានស្ទុះទៅឃាត់ទាន់ពេលវេលា នាំស្ត្រីរូបនោះចុះទៅអង្គុយនៅក្នុងស្ថានីយប្រេងឥន្ធនៈតេលា ក្បែរនឹងរង្វង់មូលកួចកាណុងធ្វើការសួរនាំ ។
តាមស្ត្រីដែលប៉ុនប៉ងសម្លាប់ខ្លួនបានរៀបរាប់ប្រាប់សមត្ថកិច្ចថា ខ្លួនបានរស់នៅជាមួយជនជាតិបរទេសម្នាក់ រហូតបានកូនស្រីម្នាក់អាយុ២ខែ ស្រាប់តែប្តីជាជនជាតិបរទេសនោះ បានធ្វើបាបចិត្តនាងខ្លាំងណាស់ដោយលួចមានស្រីនៅខាងក្រៅ ទើបធ្វើឲ្យនាងសម្រេចចិត្តគិតខ្លីទៅលោតទឹកសម្លាប់ខ្លួនទាំង២នាក់ម្តាយកូនតែម្តង ។ ក្រោយពេលកើតហេតុ លោក គង់ សុភារិទ្ធ អធិការរងខណ្ឌដូនពេញ បានអង្គុយផងឈរផងជួយលួងលោមអស់រយៈពេលជិតកន្លះម៉ោង ទើបស្ត្រីរូបនោះព្រមបោះបង់ចោលគំនិតធ្វើអត្តឃាតនេះ ដោយឡើងជិះម៉ូតូជាមួយសមត្ថកិច្ចត្រឡប់ទៅផ្ទះវិញ ។ នៅចំពោះមុខសមត្ថកិច្ចនាងប្រាប់ថា ឈ្មោះ ខេង ណាវី អាយុ២៧ឆ្នាំ ស្នាក់នៅម្តុំរោងកុនលុច្ស ។ ចំណែកកូនស្រីមានអាយុ២ខែហើយ ៕
ចែករំលែកព័តមាននេះ