ខេត្តក្រចេះ ៖ បុរសជនជាតិខ្មែរ៤នាក់សុទ្ឋសឹងជាកម្មករឡធ្យូងរបស់ក្រុមហ៊ុនចិនមួយឈ្មោះ ហ្គ្រីន អាយ លែន អេហ្គ្រីខលឈើរ៉ល បានដួលសន្លប់ជាបន្តបន្ទាប់នៅក្នុងរណ្តៅឡ ធ្យូងមានជម្រៅជាង៣មែត្រ។
ក្រុមកម្មករខ្មែរទាំង៤នាក់ត្រូវបានក្រុមការងាររបស់ក្រុមហ៊ុនចិនបានបញ្ជូនមកសង្គ្រោះភ្លាមៗនៅមន្ទីរពេទ្យខេត្ត ក្រោយជួបហេតុការណ៍ដួលសន្លប់កាលពីព្រលប់ថ្ងៃទី៣១ ឧសភា ក្នុងទីតាំងរោងឡធ្យូងរបស់ក្រុមហ៊ុនចិន នៅចំណុចឃុំក្បាលដំរី ស្រុកសំបូរ។
ជាមួយនឹងការដួលសន្លប់របស់ក្រុមកម្មករខ្មែរទាំងចំនួន៤នាក់នេះ ក៏ត្រូវបានអាជ្ញាធរសន្និដ្ឋានថាអាចនៅក្នុងរណ្តៅឡធ្យូង ដែលពួកគេបានចុះទៅកើបយកធ្យូងនោះខ្វះសម្ពាធអុកស៊ីហ្សែន។
ក្រុមកម្មករដែលបានដួលសន្លប់នេះមានទីលំនៅឃុំជ្រោយ បន្ទាយ ស្រុកព្រែប្រសព្វ។
បើតាមការបញ្ជាក់ពីក្រុមកម្មករដូចគ្នាបានឲ្យដឹងថា កន្លងមក ក្នុងរោងធ្យូងនេះ មិនធ្លាប់មានហេតុការណ៍កម្មករដួលសន្លប់បែបនេះនោះទេ ហើយថ្ងៃកើតហេតុ ដោយសារមេការជនជាតិចិនបានបង្ខំឲ្យកម្មករចុះទៅបាយកធ្យូងមុនពេលកំណត់ ទើបមានកម្មករម្នាក់ដែលចុះទៅមុនបានសន្លប់ និងបានស្រែកឲ្យគេជួយ ហើយមានកម្មករ៣នាក់ទៀតបានចុះទៅជួយ និងបានសន្លប់ដូចគ្នាទាំង៤នាក់តែម្តង។
បើទោះជាបែបណា ក្រោយហេតុការណ៍ភ្លាមៗ ក្រុមហ៊ុនចិនហាក់ដូចចង់បិទបាំងព័ត៌មានមិនឲ្យអាជ្ញាធរដឹងនោះទេ។ ក្រុមកម្មករខ្មែរទាំង៤នាក់ត្រូវបានគេបញ្ជូនមកសង្គ្រោះ មិនបានបញ្ជាក់អត្តសញ្ញាណឲ្យខាងអាជ្ញាធរដឹងនោះឡើយ គឺហាក់ដូចចង់បិទបាំងព័ត៌មាន ៕
ចែករំលែកព័តមាននេះ