ខេត្តព្រៃវែង ៖ បន្តបន្ទាប់គ្នាប្រមាណជា៤ម៉ោង ចោរលួចម៉ូតូ២នាក់ត្រូវបានចាប់ខ្លួន ខណៈម្នាក់ជិះម៉ូតូរកកន្លែងលក់ និងម្នាក់ទៀត រត់មិនរួច ។ តាមសេចក្តីរាយការណ៍ទាក់ទិននឹងអំពើចោរកម្មខាងលើ បានឱ្យដឹងថា យុវជនម្នាក់ត្រូវបានកម្លាំងនគរបាលស្រុកស្វាយអន្ទរចាប់វ៉ៃខ្នោះភ្លាមៗ កាលពីថ្ងៃទី២៩ ឧសភា វេលាម៉ោង៥ និង២០នាទីព្រឹក នៅចំណុចរង្វង់មូលស្វាយអន្ទរ ។
បើតាមនគរបាលស្រុកស្វាយអន្ទរបានឲ្យដឹងថា ជនសង្ស័យក្នុងករណីលួចម៉ូតូខាងលេីឈ្មោះ អីុម ពិសិដ្ឋ ភេទប្រុស អាយុ២៩ឆ្នាំ មានទីលំនៅស្រុកកំចាយមារ ដែលកាលពីថ្ងៃទី២៨ ឧសភា ជននេះបានធ្វេីសកម្ម ភាពលួចម៉ូតូមួយគ្រឿង ម៉ាកស្មាស់ ពណ៌ខ្មៅ ជារបស់ឈ្មោះ ឡាត់ លីន ភេទប្រុស អាយុ៤៦ឆ្នាំ រស់នៅភូមិពោធិចិន្តាំ ឃំុស្វាយបន្ទរ ស្រុកស្វាយអន្ទរ។ នៅពេលលួចបានក៏ជិះម៉ូតូនោះយកមកលាក់ទុកនៅក្នុងដេប៉ូលក់គ្រឿងសង្ហារិមមួយកន្លែង ដែលស្ថិតក្នុងភូមិក្រចាប១ ឃំុព្រៃព្នៅ ស្រុកពារាំង រហូតដល់ម៉ោង៥និង២០នាទីព្រឹក ថ្ងៃបន្ទាប់ពេលដែលជននេះកំពុងជិះម៉ូតូដែលលួចបានប្រុងយកទៅលក់ ក៏ត្រូវសមត្ថកិច្ចស្ទាក់ចាប់បានតែម្តង ។
ករណី១ទៀតចោរលួចម៉ូតូម្នាក់ក្នុងចំណោមបក្សពួក២នាក់ត្រូវកម្លាំងនគរបាលស្រុកពោធិ៍រៀងស្ទាប់ចាប់បាន បន្ទាប់ពីពួកគេធ្វើសកម្មភាពលួចម៉ូតូបានសម្រេច តែរត់មិនរួចពីកណ្តាប់ដៃសមត្ថកិច្ច ។ហេតុការណ៍នេះបានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី២៩ ឧសភា នៅចំណុចទួលសំរោង ដែលស្ថិតក្នុងភូមិវាលព្រៅ ឃុំពោធិ៍រៀង ស្រុកពោធិ៍រៀង ។ ជនសង្ស័យដែលត្រូវបានចាប់ខ្លួនឈ្មោះ ប៊ុត សារ៉ា ភេទប្រុស អាយុ១៩ឆ្នាំ ចំណែកបក្សពួកម្នាក់ទៀតដែលរត់គេចខ្លួនបាត់ មិនត្រូវបានសមត្ថកិច្ចប្រាប់ពី អត្ត សញ្ញាណទេ តែកំពុងតាមប្រមាញ់ ។
សមត្ថកិច្ចបានឱ្យដឹងថា នៅវេលាម៉ោង៩និង៣០នាទីព្រឹក ថ្ងៃទី២៩ ឧសភា ជនសង្ស័យ២នាក់ជិះម៉ូតូមួយគ្រឿងឌុបគ្នា បានធ្វើសកម្មភាពលួចយកម៉ូតូមួយគ្រឿងម៉ាកវ៉េវ ពណ៌ខ្មៅ គ្មានស្លាកលេខ ដែលជាកម្មសិទ្ធិរបស់ឈ្មោះ ឡុង ណុំ ភេទប្រុស អាយុ២៩ឆ្នាំ ពីចំណុចទួលសំរោង។ ក្រោយពីលួចបានសម្រេចហើយនោះ ជនសង្ស័យក៏ជិះម៉ូតូម្នាក់មួយគ្រឿង ប្រុងគេចខ្លួន ប៉ុន្តែភ្លាមៗនោះម្ចាស់ម៉ូតូបានដឹងថាម៉ូតូត្រូវចោរលួច ក៏រាយការណ៍ប្តឹងសមត្ថកិច្ចជួយស្ទាក់ចាប់ ។
ប្រភពដដែលបានបញ្ជាក់ថា ក្រោយពីទទួលបានព័ត៌មានភ្លាម លោកអធិការនគរបាលស្រុកបានបញ្ជាកម្លាំងចេញស្ទាក់នៅគ្រប់ផ្លូវ ក៏ប្រទះឃើញជនសង្ស័យកំពុងជិះម៉ូតូដែលលួចបាននៅតាមផ្លូវបឹងចាកៃសំដៅទៅផ្លូវព្រែកអន្ទះ ដើម្បីឆ្លងដព្រែកជ្រៃ ទើបសមត្ថកិច្ចទំនាក់ទំនងទៅម្ចាស់ដផ្អាកចម្លងមនុស្សបន្តិចសិន ឯសមត្ថកិច្ចតាមទៅពីក្រោយ នៅពេលចោរពីរនាក់នោះជិះម៉ូតូទៅដល់កំពង់ដឃើញគេមិនចម្លង ក៏បកត្រឡប់ក្រោយវិញត្រូវសមត្ថកិច្ចក្របួចជាប់ម្នាក់ ចំណែកបក្សពួកម្នាក់ទៀតជិះម៉ូតូគេចខ្លួនបាត់ស្រមោល ៕
ចែករំលែកព័តមាននេះ