ខេត្តបន្ទាយមានជ័យ ៖ សិស្សប្រុសម្នាក់បានដួលសន្លប់ពេលកំពុងអង្គុយរៀន ខណៈថ្នាក់រៀនផ្សេងៗទៀតត្រូវបានចាក់សោផ្អាករៀន ព្រោះសិស្សរៀនមិនកើតដោយសាររងការជន់លិចដោយជំនន់ទឹកភ្លៀង គឺសាលាលិចទឹក ។ តាមប្រភពព័ត៌មានបានឱ្យដឹងថា នៅព្រឹកថ្ងៃទី៣១ ឧសភា…
ខេត្តបន្ទាយមានជ័យ ៖ សិស្សប្រុសម្នាក់បានដួលសន្លប់ពេលកំពុងអង្គុយរៀន ខណៈថ្នាក់រៀនផ្សេងៗទៀតត្រូវបានចាក់សោផ្អាករៀន ព្រោះសិស្សរៀនមិនកើតដោយសាររងការជន់លិចដោយជំនន់ទឹកភ្លៀង គឺសាលាលិចទឹក ។
តាមប្រភពព័ត៌មានបានឱ្យដឹងថា នៅព្រឹកថ្ងៃទី៣១ ឧសភា សាលាបឋមសិក្សាបាលិលេយ្យស្ថិតក្នុងភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត និងស្ថិតក្នុងបរិវេណវត្តបាលិលេយ្យត្រូវបានជន់លិចដោយជំនន់ទឹកភ្លៀង ថ្នាក់រៀនស្ទើរទាំងអស់ត្រូវបានបិទទ្វារ ដោយសារសិស្សចូលរៀនក្នុងទឹកមិនកើត គឺមានតែសិស្សថ្នាក់ទី៤មួយប៉ុណ្ណោះ ដែលជាសិស្សធំៗបានបន្តការសិក្សា ។ ចំណែកសិស្សរងគ្រោះ ដែលសន្លប់ គឺរៀននៅថ្នាក់ទី៤(ក) ឈ្មោះ កន សារ័ក្សអាយុ១២ឆ្នាំ មានទីលំនៅភូមិក្បាលកោះ សង្កាត់ប៉ោយ
ប៉ែត ក្រុងប៉ោយប៉ែត ។
សិស្សខាងលើបានដួលសន្លប់ ខណៈកំពុងអង្គុយរៀនក្នុងថ្នាក់ ហើយត្រូវបានអ្នកគ្រូប្រចាំថ្នាក់ និងសិស្សរួមថ្នាក់ នាំគ្នាធ្វើចលនាឱ្យមួយសន្ទុះក្រោយមកទើបដឹងខ្លួនវិញ ។ ទោះជាបែបណា សិស្សរូបនេះហាក់មានសភាពស្លេកស្លាំង ក៏ត្រូវអ្នកគ្រូប្រចាំថ្នាក់នាំទៅឱ្យឪពុកម្តាយភ្លាមៗ ។ យោងតាមការសាកសួរសិស្សរងគ្រោះប្រាប់អ្នកគ្រូរបស់គេថា មុនខ្លួនមកសាលាគឺគេមានជំងឺគ្រុន ហើយម្តាយបានកោសខ្យល់ឱ្យផងដែរ ដូច្នេះបានសេចក្តីថា ការដួលសន្លប់ដោយសារបញ្ហាសុខភាពប៉ុណ្ណោះ មិនទាក់ទងសាលារៀនលិចទឹកទេ ។
សាលាបឋមសិក្សាបាលិលេយ្យមានថ្នាក់រៀនជាង១០បន្ទប់ ប៉ុន្តែសិស្សខកខានមិនបានរៀនព្រោះតែសាលាលិចទឹក ពោលគឺឃើញមានសិស្សរៀនតែ១បន្ទប់ប៉ុណ្ណោះ ។ ពិតជាគួរឱ្យអនិច្ចាណាស់ដែលសាលាមួយនេះសិស្សរៀនទាំងវេទនាជាច្រើនឆ្នាំមកហើយឱ្យតែដល់រដូវវស្សាម្តងៗពេលធ្លាក់ភ្លៀង សាលានេះប្រឈមការជន់លិចដោយចៀសមិនផុតឡើយ និងបានធ្វើឱ្យមានការចោទសួរថា ហេតុអ្វីក៏អាជ្ញាធរក្រុងប៉ោយប៉ែតច្រើនតំណមកនេះមិនជួយស្រោចស្រង់ស្ថានភាពនេះឱ្យបានប្រសើរឡើងផង ហេតុអ្វីក៏សាលានេះនៅតែជាសាលាត្រាំទឹកបែបនេះរាល់ៗឆ្នាំ ? មូលហេតុដែលសាលាលិចទឹកគឺបណ្តាលមកពីនៅតំបន់ជុំវិញសាលាជាលំនៅឋានដែលម្ចាស់គេបានចាក់ដីលើកកំពស់ទីតាំងរស់នៅ ។ ចំណែកសាលាបឋមសិក្សាក្លាយជាទំនាបបាតខ្ទះពេលរដូវវស្សាមកដល់គឺគ្រប់ទឹកតែម្តង លិចរាប់ខែក៏មានដែរ ។
សូម្បីរកកន្លែងកាយប្រឡាយក៏រកអត់បានដែរ ព្រោះជុំវិញជាភូមិឋានដែលចាក់ដីខ្ពស់អស់ទៅហើយ ។
ក្រៅពីស្ថានភាពលិចទឹកសាលានេះសង់ពីឈើដំបូលស័ង្កសី ហើយមានវ័យចំណាស់ជាងគេ និងមានសភាពទ្រុឌទ្រោមណាស់ទៅហើយ ។នៅចំពោះមុខកោះសន្តិភាព លោកនា យកសាលានៅតែសង្ឃឹមនិងប្រាប់ឱ្យដឹងថា ថ្នាក់លើកំពុងគិតគូរហើយៗក៏និងទទួលបានសាលាថ្មកំពស់២ជាន់នៅពេលខាងមុខផងដែរ ៕
ចែករំលែកព័តមាននេះ