រាជធានីភ្នំពេញ ៖ តារាស្រីរាងតូចច្រឡឹង កញ្ញាដួង ម៉ានិច បានត្អូញត្អែរក្រោយការហាត់សមសម្តែងរឿងទាក់ទងទៅនឹងសម័យខ្មែរក្រហមថា នាងឈឺខ្លួនគ្រប់កន្លែង និងជាំសាច់ ព្រោះការហាត់សមគឺតួ នីមួយៗប្រឹងលេងឲ្យអស់ពីលទ្ធភាព និងធ្វើឲ្យដូចការណ៍ពិត ។
សម្រាប់ការសម្តែងរឿងនេះ គឺដួង ម៉ានិចពេញចិត្ត និងក្តុកក្តួលទប់ទឹកភ្នែកមិនជាប់ទេ នៅពេលអ្នកដឹកនាំរឿងតម្រូវឲ្យនាងសម្តែងជាតួស្រីម្នាក់សរសៃខ្ចី ហើយត្រូវគេអូសប្តីទៅសម្លាប់ ។ ពេលនោះនាងបីកូនរត់ទៅសួរ ស្រាប់តែគេឆក់កូនពីដៃនាងទៅបោកនឹងដី ហើយអូសប្តីទៅសម្លាប់ទៀត គឺធ្វើឲ្យនាងស្លុតចិត្តស្រមៃទៅក្នុងរបបនោះថា វេទនា លំបាកយ៉ាងណា បើគ្រាន់តែនាងសម្តែងសោះវេទនាម្ល៉ឹងហើយ ។
តារាស្រីដែលឆក់បានតំណែងជាតួឯកស្រី ជាបន្តបន្ទាប់កញ្ញាដួង ម៉ានិច បានប្រាប់ទៀតថា សាច់នាងត្រូវជាំ និងឈឺគ្រប់កន្លែង ដោយសារតែក្នុងការសម្តែងមានឈុតវាយធ្វើបាប បោចសក់ ដែលអាចនិយាយបានថា នាង និងតួសម្តែងផ្សេងទៀតប្រឹងសម្តែងឲ្យដូចការណ៍ពិត គឺទឹកភ្នែកនាងស្រក់ដោយមិនដឹងខ្លួន ហើយយំមិនឈប់ទេ ព្រោះអារម្មណ៍ឈឺចាប់ ខ្លោចផ្សាបញ្ជាឲ្យនាងយំបែបនេះ ។ «ដូចនេះហើយនាងខ្ញុំអំពាវនាវឲ្យបងប្អូនខ្មែរ ស្រលាញ់ និងសាមគ្គីគ្នា ចៀសឆ្ងាយពីសង្គ្រាម នាងខ្ញុំ និងកូនខ្មែរមិនចង់ជួប មិនចង់យល់ទេ ភ្លើងសង្គ្រាម »។
តារាសម្តែងដួង ម៉ានិច ពិតជារាសីឡើងស្រឺតៗតែម្តង គឺក្រោយពីសម្រេចចិត្តទិញផ្ទះ៣កន្លែងផ្សេងគ្នា ហើយស្រាប់តែពេលនេះនាងបានបោះទុនបើកមុខហាងផឹកស៊ីធំមួយបន្ថែមទៀត ។ នាងថាមុខរបរនេះមិនមែនសម្រាប់តែនាងទេ គឺសម្រាប់សមាជិកក្រុមគ្រួសារនាងទាំងមូលតែម្តង ។ ស្របពេលដែលសន្ទុះការងារសិល្បៈកាន់តែលេចធ្លោរខ្លាំង ប៉ុន្មានខែមុននេះដួង ម៉ានិចទើបតែរៀបចំពិធីឡើងគេហដ្ឋានថ្មីប្រណីតនៅបុរីប៉េងហួតបឹងស្នោ ជាមួយនឹងការកោតសរសើរពីអ្នករួមអាជីព ។
គម្រោងបន្ទាប់សម្រាប់ជួយស្រោចស្រង់លើកស្ទួយជីវភាពគ្រួសារ បងស្រី និងសមាជិកគ្រួសារមួយចំនួនទៀត គឺការរួមគ្នាបង្កើតហាងផឹកស៊ីថ្មីនៅ Jet Container ដែលជាតំបន់ទាក់ទាញ ។ ដួង ម៉ានិចថា ក្រុមគ្រួសារនាងមានជំនាញក្នុងការធ្វើម្ហូបគ្រប់គ្នា ពិសេសបងស្រីនាងដែលកន្លងមកធ្វើអាហារលក់ នៅតំបន់ព្រំដែនកម្ពុជា-ថៃ ៕
ចែករំលែកព័តមាននេះ