រាជធានីភ្នំពេញ ៖ ក្នុងនាមប្រមុខរាជរដ្ឋាភិបាលកម្ពុជាលោកស្រីកត្តិសង្គហបណ្ឌិតម៉ែន សំអនបានស្នើឲ្យគ្រប់ភាគីពាក់ព័ន្ធទាំងអស់រួមសហការគ្នាទប់ស្កាត់ការប្រើប្រាស់កម្លាំងពលកម្មលើកកុមារ ការប្រើអំពើហិង្សា ការជួញដូរ ការប្រើប្រាស់ និងការធ្វើទារុណកម្មលើកកុមារ ។ លោកស្រីកិត្តិសង្គហបណ្ឌិត…
រាជធានីភ្នំពេញ ៖ ក្នុងនាមប្រមុខរាជរដ្ឋាភិបាលកម្ពុជាលោកស្រីកត្តិសង្គហបណ្ឌិតម៉ែន សំអនបានស្នើឲ្យគ្រប់ភាគីពាក់ព័ន្ធទាំងអស់រួមសហការគ្នាទប់ស្កាត់ការប្រើប្រាស់កម្លាំងពលកម្មលើកកុមារ ការប្រើអំពើហិង្សា ការជួញដូរ ការប្រើប្រាស់ និងការធ្វើទារុណកម្មលើកកុមារ ។
លោកស្រីកិត្តិសង្គហបណ្ឌិត ម៉ែន សំអនឧបកនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ចបានលើកឡើងក្នុងពិធិអបអរសារទខួបលើកទី៦ ទិវាកុមារអន្តរជាតិ ១មិថុនា ឆ្នាំ២០១៨ នាព្រឹកថ្ងៃទី៣១ ឧសភា នៅសាលសន្និបាតកោះពេជ្រថា ទិវាកុមារអន្តរជាតិក្រោមប្រធានបទទិវាពិភពលោកប្រឆាំងពលកម្មកុមារ១មិថុនា គឺដើម្បីទប់ស្កាត់គ្រោះថ្នាក់ការងារ និងភាពងាយរងគ្រោះផ្នែកសុខភាពសម្រាប់កម្មករ និយោជិតវ័យក្មេង ដើម្បីលុបបំបាត់ពលកម្មកុមារពិតជាមានអត្ថន័យសមស្របតាមសភាពការណ៍នៅកម្ពុជា ។
ពលកម្មកុមារ គឺជាបាតុភូតសង្គមដ៏ស្មុគស្មាញដែលមានទំនាក់ទំនងទៅនឹងទិដ្ឋភាពសេដ្ឋកិច្ចសង្គមកម្ពុជា និងឥរិយាបថសហគមន៍ និងគ្រួសារ ។
តំណាងសម្តេចតេជោហ៊ុនសែននាយករដ្ឋមន្ត្រី លោកស្រីម៉ែន សំអនបានគូសបញ្ជាក់ថា «ភាពក្រីក្រ និងការយល់ដឹងរបស់សហគមន៍ដែលមានកម្រិតទាប គឺជាមូលហេតុចម្បងដែលនាំឱ្យមានពលកម្មកុមារ ។ ម្យ៉ាងទៀតក្រុមគ្រួសារក្រីក្រដែលខ្វះធនធាន ខ្វះជំនាញ មានការអប់រំទាប និងមានប្រាក់ចំណូលតិចជាមុខសញ្ញាក្នុងការប្រើប្រាស់ពលកម្មកុមារ ដើម្បីទ្រទ្រង់ជីវភាពរស់នៅប្រចាំថ្ងៃរបស់ពួកគេ ។ ដោយសារមូលហេតុនេះគេសង្កេតឃើញពលកម្មកុមារនៅតែមានក្នុងតំបន់មួយចំនួនកម្ពុជា» ។
លោកស្រីបន្ថែមរាជរដ្ឋាភិបាលបានចាត់ទុកការលុបបំបាត់ពលកម្មកុមារជាបញ្ហាអាទិភាពមួយ ។ ដើម្បីចាត់វិធានការឱ្យមានប្រសិទ្ធភាពក្រសួងការងារ និងបណ្តុះបណ្តាលវិជ្ជាជីវៈបានពង្រឹងការទប់ស្កាត់ ការប្រើប្រាស់ពលកម្មកុមារ ដោយផ្តោតលើគោលការណ៍ចម្បង៣គឺ ៖ ការដកហូតកុមារពីទម្រង់ធ្ងន់ធ្ងរនៃពលកម្មកុមារ ដើម្បីឱ្យកុមារទទួលបានការអប់រំបណ្តុះបណ្តាលវិជ្ជាជីវៈ និងសមាហរណកម្មកុមារទៅក្នុងសង្គម ។ កិច្ចសហការជាមួយសង្គមស៊ីវិល និងការប្រយុទ្ធប្រឆាំងការជួញដូរស្ត្រី និងកុមារ ។ លើកកម្ពស់ការងារសមរម្យ និងសុវត្ថិភាពការ ងារកុមារ។
ជាមួយគ្នានេះដែររាជរដ្ឋាភិបាលបានអនុម័តផែនការសកម្មភាពជាតិស្តីពីការកាត់បន្ថយពលកម្មកុមារ និងការលុបបំបាត់ទម្រង់ធ្ងន់ធ្ងរនៃពលកម្មកុមារ (២០១៦ -២០២៥ ) កាលពីថ្ងៃទី០៨ ខែវិច្ឆិកា ឆ្នាំ២០១៦ ដែលជាផែនទីបង្ហាញផ្លូវ និងជាឯកសារបច្ចុប្បន្នកម្មទៅលើផែនការសកម្មភាពជាតិ ស្តីពីការលុបបំបាត់ទម្រង់ធ្ងន់ធ្ងរបំផុតនៃពលកម្មកុមារ(២០០៨-២០១២) ។
រាជរដ្ឋាភិបាលបានបង្កើតគណៈកម្មាធិការជាតិប្រឆាំងពលកម្មកុមារកាលពីថ្ងៃទី១៧ ខែវិច្ឆិកា ឆ្នាំ២០១៦ ដែលដឹកនាំដោយក្រសួងការងារ និងបណ្តុះបណ្តាលវិជ្ជាជីវៈដើម្បីជំរុញការអនុវត្តគោលនយោបាយផែនការសកម្មភាពជាតិ បទដ្ឋានច្បាប់ បទប្បញ្ញត្តិទាំងឡាយដែលពាក់ព័ន្ធ នឹងការលុបបំបាត់ទម្រង់ធ្ងន់ធ្ងរបំផុតនៃពលកម្មកុមារ ពិនិត្យតាមដាន និងវាយតម្លៃលើការអនុវត្តអនុសញ្ញានៃអង្គការពលកម្មកុមារ និងសហការជាមួយក្រុមប្រឹក្សាជាតិកម្ពុជា ដើម្បីកុមារអនុវត្តអនុសញ្ញាស្តីពីសិទ្ធិកុមារ ។
លោកជំទាវម៉ែន សំអនក៏បានទទួលថា បច្ចុប្បន្ននេះបញ្ហាការរំលោភសិទ្ធិកុមារការប្រើប្រាស់អំពើហិង្សា ការប្រើប្រាស់គ្រឿងញៀន ប៉ុន្តែករណីនេះត្រូវបានក្រសួងពាក់ពន្ធបានកំពុងតែដុតដៃដុតជើងក្នុងទប់ស្កាត់ ដើម្បីឈានដល់លុបបំបាត់ទាំងស្រុង និងចាប់ជនដែលធ្វើកម្មភាពមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ