រាជធានីភ្នំពេញ ៖ ក្នុងរយៈពេលជាង១ទសវត្សរ៍កន្លងមកនេះ តម្រូវការចក្រយានយន្តនៅប្រទេសកម្ពុជា បានកើនឡើងគួរឲ្យកត់សម្គាល់ ដែលស្ដែងឲ្យឃើញតាមរយៈការចរាចរណ៍លើដងផ្លូវ ការកកស្ទះស្ទើរតែរាល់ថ្ងៃ និងស្ទើរគ្រប់ពេលវេលា ។
បើតាមតួលេខរបស់ក្រុមហ៊ុនដំឡើងម៉ូតូនៅកម្ពុជា ម៉ាកហុងដា បានបង្ហាញថា ក្រុមហ៊ុននេះបានពង្រីកសង្វាក់ផលិតកម្មរបស់ខ្លួនជាបន្តបន្ទាប់ ចាប់តាំងពីបានដំណើរការដំឡើងម៉ូតូនៅក្នុងប្រទេសកម្ពុជា ។
ក្នុងរបាយការណ៍នោះបានបង្ហាញថា ៖«នៅក្នុងឆ្នាំ១៩៩៩ រោងចក្រមួយនេះបានដំឡើងម៉ូតូត្រឹមតែ៥០គ្រឿងប៉ុណ្ណោះក្នុង១ថ្ងៃ ហើយបានពង្រីកជាបន្តបន្ទាប់រហូតដល់បច្ចុប្បន្ននេះ អាចមានសមត្ថភាពដំឡើងបានរហូតដល់១.២០០គ្រឿងក្នុង១ថ្ងៃ ឬប្រមាណជិត៣០ម៉ឺនគ្រឿងក្នុង១ឆ្នាំ » ។
ដោយឡែក តំណាងផ្នែកលក់នៃក្រុមហ៊ុនយ៉ាម៉ាហា ដែលសូមលើកឡើងក្នុងលក្ខខណ្ឌមិនបញ្ចេញឈ្មោះ បានឲ្យដឹងផងដែរថា ក្នុងរយៈពេល៣ឆ្នាំកន្លងទៅនេះ ទីផ្សារម៉ូតូយ៉ាម៉ាហា នៅក្នុងប្រទេសកម្ពុជា មានកំណើន១០០% ស្ទើរតែរៀងរាល់ឆ្នាំ ហើយសម្រាប់ឆ្នាំ២០១៨នេះ ទើបតែពាក់កណ្ដាលឆ្នាំ អាចលក់ចេញបានរហូតដល់ស្មើនឹងបរិមាណឆ្នាំ២០១៧កន្លងទៅបាត់ទៅហើយ ដូចនេះ លោកមើលឃើញថា វាមានតម្រូវការខ្ពស់ពីប្រជាពលរដ្ឋកម្ពុជា ។
តំណាងផ្នែកលក់រូបនេះបាននិយាយថា៖ «មានកត្តាមួយចំនួនដែលធ្វើឲ្យទីផ្សារម៉ូតូនៅកម្ពុជាមានកំណើន ក្នុងនោះកត្តាកំណើនសេដ្ឋកិច្ច និងប្រាក់ចំណូលពលរដ្ឋ គឺជាកត្តាសំខាន់ ។ ជាក់ស្ដែង ក្នុងមួយគ្រួសារៗមានម៉ូតូអាចលើសពី១គ្រឿង ។ ម្យ៉ាងវិញទៀត បើនិយាយពីម៉ូតូ កាលពីជំនាន់មុន គេឃើញថា ភាគច្រើនមានតែមនុស្សចាស់ជាអ្នកប្រើប្រាស់ ហើយក្មេងៗភាគច្រើនប្រើកង់ជាយានជំនិះ តែបច្ចុប្បន្នវិញ ក្មេងៗដែលទើបចូលរៀនត្រឹមអនុវិទ្យាល័យ ក៏ជិះម៉ូតូដែរ ដូចនេះហើយទើបធ្វើឲ្យតម្រូវការម៉ូតូក្នុងប្រទេសកាន់តែកើនឡើងខ្ពស់ » ។
លោកបញ្ជាក់ថា តម្រូវការម៉ូតូនៅក្នុងប្រទេសកម្ពុជា ក្នុង១ឆ្នាំៗ សរុបមានប្រមាណ៣៥ម៉ឺនគ្រឿង ក្នុងនោះការផ្គត់ផ្គង់មានទាំងការនាំចូល និងដំឡើងនៅក្នុងស្រុក ។
សេដ្ឋកិច្ចកម្ពុជាសម្រេចបានកំណើនក្នុងរង្វង់៧%អស់រយៈពេលជាង២ទសវត្សរ៍មកហើយ និងឆ្លងផុតពីប្រទេសក្រីក្រតោកយ៉ាក ថែមទាំងត្រូវបានធនាគារអភិវឌ្ឍន៍អាស៊ីចាត់ទុកថាជា «ខ្លាសេដ្ឋកិច្ចថ្មី» នៅអាស៊ីទៀតផង ។
យោងតាមរបាយការណ៍ស្ដីពីក្របខ័ណ្ឌគោលនយោបាយម៉ាក្រូសេដ្ឋកិច្ចកម្ពុជា បានបង្ហាញថា ប្រាក់ចំណូលរបស់ប្រជាពលរដ្ឋកម្ពុជា ក្នុងមនុស្សម្នាក់បានកើនពី១.០៤២ដុល្លារអាមេរិកក្នុងឆ្នាំ២០១៣ ដល់ប្រមាណ១.៤២៧ដុល្លារអាមេរិកក្នុងឆ្នាំ២០១៧ និង១.៥៦៣ដុល្លារអាមេរិកនៅក្នុងឆ្នាំ២០១៨នេះ ៕
ចែករំលែកព័តមាននេះ