រាជធានីភ្នំពេញ ៖ តាមការបញ្ជាក់ពីសមាគមរោងចក្រកាត់ដេរកម្ពុជា ហៅកាត់ថា (GMAC) ជាតំណាងឲ្យអ្នកផលិតផលិតផលវាយនភ័ណ្ឌកម្ពុជា បានឲ្យដឹងថា បច្ចុប្បន្ននេះ ទីផ្សារផលិតផលវាយនភ័ណ្ឌកម្ពុជា ហាក់បានងាកទៅសហរដ្ឋអាមេរិកច្រើនជាងទ្វីបអឺរ៉ុប…
រាជធានីភ្នំពេញ ៖ តាមការបញ្ជាក់ពីសមាគមរោងចក្រកាត់ដេរកម្ពុជា ហៅកាត់ថា (GMAC) ជាតំណាងឲ្យអ្នកផលិតផលិតផលវាយនភ័ណ្ឌកម្ពុជា បានឲ្យដឹងថា បច្ចុប្បន្ននេះ ទីផ្សារផលិតផលវាយនភ័ណ្ឌកម្ពុជា ហាក់បានងាកទៅសហរដ្ឋអាមេរិកច្រើនជាងទ្វីបអឺរ៉ុប ដែលកាលពីមុន កម្ពុជាត្រូវពឹងផ្អែកលើទីផ្សារអឺរ៉ុបច្រើនជាងសហរដ្ឋអាមេរិក ។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរកម្ពុជា បានឲ្យដឹងថា វិស័យកាត់ដេរសម្លៀកបំពាក់ និងស្បែកជើងកម្ពុជា នៅក្នុងរយៈពេលប៉ុន្មានខែដើមឆ្នាំ២០១៨នេះឃើញថា នៅតែមានស្ថានភាពល្អ និងមានកំណើនដដែល តែមិនច្រើនប៉ុន្មានទេ ។ លោកថា ៖« បើធៀបនឹងឆ្នាំ២០១៧កន្លងមក វិស័យកាត់ដេររបស់យើងមានកំណើនតិចតួច ហើយកំណើននេះ យើងបានមើលឃើញថា ទីផ្សារសហរដ្ឋអាមេរិកមានកំណើនច្រើនជាងទីផ្សារសហគមន៍អឺរ៉ុប ដែលខុសពីឆ្នាំមុនៗ » ។
លោកបន្តថា តាមការប៉ាន់ស្មានជំហានដំបូងអាចនិយាយថា ដោយសារតែស្ថានភាពសេដ្ឋកិច្ចរបស់សហរដ្ឋអាមេរិកល្អប្រសើរ ទើបបានជាគេបញ្ជាទិញផលិតផលវាយនភ័ណ្ឌរបស់យើងកាន់តែច្រើន ដែលខុសពីឆ្នាំមុនៗ ទីផ្សារអាមេរិកចាញ់ទីផ្សារអឺរ៉ុប ។ ម្យ៉ាងទៀត តាមដែលបានដឹង រដ្ឋាភិបាលអាមេរិកក៏គ្រោងបញ្ចេញលុយបន្ថែមទៀត ដើម្បីជំរុញកំណើនសេដ្ឋកិច្ចរបស់ខ្លួន ដែលធ្វើឲ្យការចំណាយរបស់អាមេរិកបានកើនឡើង ។ ម្យ៉ាងទៀត អ្នកមានវណ្ណៈកណ្ដាលនៅអាមេរិកក៏មានកំណើនច្រើន ។ ដូចនេះ ពួកគេមានតម្រូវការខ្ពស់ទៅលើផលិតផលសម្លៀកបំពាក់និងស្បែកជើង ទើបធ្វើឲ្យការបញ្ជាទិញរបស់អាមេរិកមកលើកម្ពុជាមានកំណើនខ្ពស់ ។
លោក កាំង ម៉ូនីកា បានឲ្យដឹងថា នៅក្នុងរយៈពេល៣ខែដើមឆ្នាំ២០១៨នេះ រោងចក្រដែលបានបើក និងចូលជាសមាជិករបស់សមាគមរោងចក្រកាត់ដេរកម្ពុជាមានចំនួន១៥ ក៏ប៉ុន្តែរោងចក្រដែលបានបិទវិញ ក៏មានចំនួន៦រោងចក្រដែរ ។
លោកបញ្ជាក់ថា បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញថា ស្ថាប័នក្រុមប្រឹក្សាអភិវឌ្ឍន៍កម្ពុជាបានចេញអាជ្ញាប័ណ្ណទៅក្រុមហ៊ុនជាច្រើនទៀត ដើម្បីវិនិយោគរោងចក្រកាត់ដេរនៅក្នុងប្រទេសកម្ពុជា ដូចនេះ លោកគិតថា វិស័យរោងចក្រកាត់ដេរនឹងនៅតែល្អប្រសើរដដែល ។
នៅក្នុងឆ្នាំ២០១៨នេះ រាជរដ្ឋាភិបាលកម្ពុជា បានកំណត់ប្រាក់ឈ្នួលគោលថ្មីសម្រាប់កម្មករ -កម្មការិនី ក្នុងនោះប្រាក់ខែគោលបានកើនឡើងពី១៥៣ដុល្លារនៅឆ្នាំ២០១៧ ដល់១៧០ដុល្លារអាមេរិកក្នុង១ខែនៅឆ្នាំ២០១៨នេះ ។
កម្មកររោងចក្រកាត់ដេរម្នាក់នៅរាជធានីភ្នំពេញ លោក ផានិត បានឲ្យដឹងថា ក្នុងឆ្នាំថ្មីនេះ ប្រាក់ខែគោលបានឡើងដល់១៧០ដុល្លារពិតមែន ក៏ប៉ុន្តែបើធៀបនឹងប្រាក់ចំណូលសរុបប្រចាំខែ មិនកើនឡើងទេ គឺប្រហាក់ប្រហែលនឹងឆ្នាំ២០១៧ដែរ ។ លោកថា ៖« កាលពីប្រាក់ខែនៅតិច មានការងារថែមម៉ោងច្រើន អីចឹងហើយទើបប្រាក់ចំណូលពីការងារថែមម៉ោងបានច្រើន ។ ម្យ៉ាងទៀត នៅពេលប្រាក់ខែឡើងភ្លាម តម្លៃប្រើប្រាស់ផ្សេងៗក៏បានកើនឡើងដែរ ដូចជា ថ្លៃឈ្នួលផ្ទះ និងតម្លៃអីវ៉ាន់ផ្សេងទៀត ជាដើម » ។
ពាក់ព័ន្ធនឹងប្រាក់ខែគោលក្នុងវិស័យកាត់ដេរនេះដែរ លោក ខេន លូ អគ្គលេខាធិការសមាគមរោងចក្រកាត់ដេរកម្ពុជា បានឲ្យដឹងថា ការឡើងប្រាក់ខែទៅកម្មករ គឺមិនបានដល់កម្មករ១០០%ទេ ។ ជាក់ស្ដែង នៅពេលឡើងប្រាក់ខែហើយ គឺរាល់សេវាកម្មប្រើប្រាស់របស់កម្មករ ក៏ឡើងថ្លៃដែរ ។ ដូចនេះ ទោះឡើងយ៉ាងណា ក៏មិនបានប្រយោជន៍ផ្ទាល់ដល់កម្មករដែរ ។
លោក កាំង ម៉ូនីកា អគ្គលេខាធិការរងបានបញ្ជាក់ផងដែរថា បច្ចុប្បន្ននេះ ប្រាក់ខែឈ្នួលកម្មករ-កម្មការិនីកម្ពុជា គឺជាការប្រកួតប្រជែងមួយជាមួយបណ្ដាប្រទេសក្នុងតំបន់ក្នុងវិស័យកាត់ដេរ ដូចជា ប្រទេសវៀតណាម និងបង់ក្លាដែស ជាដើម ។ លោកថា ៖« ដើម្បីឲ្យវិស័យនេះកាន់តែមានស្ថិរភាពប្រសើរឡើង យើងត្រូវកែច្នៃទៅរកការផលិតណាមានតម្លៃបន្ថែមខ្ពស់ សម្រាប់នាំចេញទៅកាន់ប្រទេសដែលបញ្ជាទិញ ហើយបច្ចុប្បន្ននេះ ក៏មានរោងចក្រមួយចំនួនកំពុងងាកទៅរកការផលិតសម្ភារមានតម្លៃខ្ពស់ជាបណ្ដើរៗហើយដែរ » ។
យោងតាមរបាយការណ៍ស្ដីពីការបូកសរុបការងារគយ និងរដ្ឋាករ ប្រចាំខែមេសា ឆ្នាំ២០១៨នេះ បង្ហាញថា ការនាំចេញសរុបមានទឹកប្រាក់ចំនួន៤៨៦.៩៤៥.៤៨៦,៣៣ដុល្លារអាមេរិក ។ ចំណែករោងចក្រសហគ្រាសដែលបានមកបំពេញបែបបទគយនៅសាខាគយ និងរដ្ឋាករនាំចេញក្នុងខែមេសា ឆ្នាំ២០១៨នេះ មានចំនួន៥០២ ក្នុងនោះមានរោងចក្រកាត់ដេរសម្លៀកបំពាក់ចំនួន៣៧៩ និងរោងចក្រផលិតស្បែកជើង ចំនួន៥៦ ។ ក្រៅពីនេះមានដូចជា រោងចក្រផលិតតុក្កតា រោងចក្រផលិតខ្សែភ្លើង រោងចក្រផលិតឆ័ត្រ និងរោងចក្រផ្សេងៗទៀត ។
ក្នុងខែមេសាកន្លងមកនេះដែរ កុងតឺន័រផ្ទុកទំនិញនាំចេញមានចំនួន៦.១៤៩ ក្នុងនោះ ការនាំចេញសម្លៀកបំពាក់និងផលិតផលកាត់ដេរសម្រេចៗទៀតមានចំនួន៤.៥៤៤កុងតឺន័រ និងស្បែកជើង មានចំនួន៩២៩កុងតឺន័រ ៕
ចែករំលែកព័តមាននេះ