រាជធានីភ្នំពេញ ៖ ការផ្ដល់ឥណទានក្នុងវិស័យមីក្រូហិរញ្ញវត្ថុកម្ពុជាប៉ុន្មានឆ្នាំកន្លងមកនេះ ភាគច្រើនគឺផ្តោតសំខាន់ទៅលើឥណទានជាលក្ខណៈខ្នាតតូចៗ និងមានទំហំតិច ប៉ុន្តែបច្ចុប្បន្ននេះ ការផ្ដល់សេវាក្នុងវិស័យនេះបានងាកទៅរកអតិថិជនថ្នាក់កណ្ដាលវិញ ពិសេស សហគ្រិនខ្នាតតូច និងមធ្យម…
រាជធានីភ្នំពេញ ៖ ការផ្ដល់ឥណទានក្នុងវិស័យមីក្រូហិរញ្ញវត្ថុកម្ពុជាប៉ុន្មានឆ្នាំកន្លងមកនេះ ភាគច្រើនគឺផ្តោតសំខាន់ទៅលើឥណទានជាលក្ខណៈខ្នាតតូចៗ និងមានទំហំតិច ប៉ុន្តែបច្ចុប្បន្ននេះ ការផ្ដល់សេវាក្នុងវិស័យនេះបានងាកទៅរកអតិថិជនថ្នាក់កណ្ដាលវិញ ពិសេស សហគ្រិនខ្នាតតូច និងមធ្យម និងអ្នកបង្កើតអាជីវកម្មថ្មីៗ ឬឥណទានទិញលំនៅឋាន ជាដើម ដែលធ្វើឲ្យចំនួនអតិថិជនធ្លាក់ចុះបន្ដិច តែទំហំឥណទានបានកើនឡើងខ្ពស់គួរឲ្យកត់សម្គាល់ ។
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា បានមានប្រសាសន៍ថា ជាការពិតណាស់ បច្ចុប្បន្ននេះ ការផ្ដល់ឥណទានទៅអតិថិជនដែលមានលក្ខណៈតូចៗបានធ្លាក់ចុះគួរឲ្យកត់សម្គាល់ តែឃើញថា ការផ្ដល់ឥណទានដែលមានទំហំធំបានកើនឡើងខ្ពស់ទៅវិញ ។ លោកថា ៖« សកម្មភាពបែបនេះ ក៏វាអាចបណ្ដាលមកពីកំណើនសេដ្ឋកិច្ចរបស់ប្រទេស ហើយអតិថិជនដែលខ្ចីប្រាក់ពីមីក្រូហិរញ្ញវត្ថុ ជាអតិថិជនមានមុខរបរធំជាងមុនដែរ ដែលខុសកាលពីប៉ុន្មានឆ្នាំមុន គឺអតិថិជនភាគច្រើនជាកសិករ និងអ្នកមានចំណូលទាប ។ អីចឹងហើយពួកគាត់ក៏មិនហ៊ានខ្ចីប្រាក់ច្រើនប៉ុន្មានដែរ » ។
លោកបន្តថា ការផ្ដល់ប្រាក់កម្ចីទៅឲ្យអតិថិជនក្នុងវិស័យកសិកម្ម ក៏នៅតែមានដែរ ហើយគ្រប់គ្រឹះស្ថានមីក្រូហិរញ្ញវត្ថុទាំងអស់មិនចោលអតិថិជនក្នុងវិស័យនេះទេ ក៏ប៉ុន្តែដូចដែលបានឃើញស្រាប់ហើយនៅក្នុងវិស័យកសិកម្មនេះមានការធ្លាក់ចុះជាបន្តបន្ទាប់ ។ ជាក់ស្ដែង កម្លាំងពលកម្មក្នុងវិស័យនេះបានធ្លាក់ចុះគួរឲ្យកត់សម្គាល់ បើធៀបនឹងប៉ុន្មានឆ្នាំកន្លងមក ក៏ប៉ុន្តែអ្វីដែលជាការកត់សម្គាល់នោះឃើញថា កម្ចីសម្រាប់អាជីវកម្មបានកើនឡើងខ្ពស់ទៅវិញ ។
លោក គា បូរាណ បានបញ្ជាក់ដោយយោងតាមរបាយការណ៍របស់សមាគមមីក្រូហិរញ្ញវត្ថុកម្ពុជាថា ចំនួនអ្នកខ្ចីប្រាក់ពីមីក្រូហិរញ្ញវត្ថុ បានធ្លាក់ចុះច្រើនចាប់តាំងពីចុងឆ្នាំ២០១៧ និងបន្តរហូតដល់ដើមឆ្នាំ២០១៨នេះ ក៏ប៉ុន្តែផ្ទុយទៅវិញ សាច់ប្រាក់ដែលបានផ្ដល់ទៅអតិថិជន គឺបានកើនឡើងខ្ពស់គួរឲ្យកត់សម្គាល់ រហូតដល់គ្រឹះស្ថាននីមួយៗដាក់ចេញនូវគោលនយោបាយគ្រប់គ្រងបំណុលរបស់ខ្លួនទៀតផង ។
លោកថា ៖« ការកើនឡើងនៃឥណទានក្នុងវិស័យមីក្រូហិរញ្ញវត្ថុនេះដែរ ដូចអ្វីដែលបានលើកឡើងអីចឹង គឺអតិថិជនបានប្រើប្រាស់ទំហំឥណទានធំៗជាងមុន ដូចជា ឥណទានសម្រាប់ទិញផ្ទះ និងឥណទានសម្រាប់សហគ្រាសខ្នាតតូច និងមធ្យម ជាដើម ។ ដោយឡែក ការធ្លាក់ចុះចំនួនអតិថិជនប្រើប្រាស់ឥណទាននេះដែរ ខ្ញុំយល់ឃើញថា អាចបណ្ដាលមកពីគោលនយោបាយពិដានការប្រាក់របស់រដ្ឋាភិបាល ដែលកំណត់ត្រឹមខ្ពស់បំផុត១៨% ដែលធ្វើឲ្យគ្រឹះស្ថានមីក្រូហិរញ្ញវត្ថុមួយចំនួនបង្ខំចិត្តឈប់ផ្ដល់ឥណទានខ្នាតតូចៗទៅអតិថិជន ហើយងាកទៅរកអតិថិជនដែលប្រើប្រាស់ឥណទានខ្នាតធំៗវិញ » ។
លោកស្រី សូ ផនណារី អនុប្រធានប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ផងដែរថា កាលពីមុន ធនាគារក៏បានផ្ដល់កម្ចីឥណទានជាលក្ខណៈតូចៗដែរ ក៏ប៉ុន្តែសព្វថ្ងៃនេះ ការផ្ដល់កម្ចីងាកទៅរកទំហំធំៗវិញ ហើយ វាក៏គ្មានអ្វីប្លែកទេ ដែលពីមុនអតិថិជនខ្ចីតូច ពីព្រោះអាជីវកម្មគាត់តូច ហើយនៅពេលអាជីវកម្មគាត់កាន់តែធំ ពួកគាត់នឹងរកកម្ចីធំសម្រាប់ពង្រីកឲ្យធំបន្ថែមទៀត ។
លោកស្រីនិយាយថា ៖« ការផ្លាស់ប្តូរពីការប្រើប្រាស់ឥណទានពីទំហំតូចមកទំហំធំនេះដែរ ក៏ជាការបញ្ជាក់ពីកំណើនសេដ្ឋកិច្ច និងការរីកលូតលាស់អាជីវកម្មរបស់អតិថិជនយើងដែរ ហើយវាក៏ជាអ្វីដែលយើងចង់បានផងដែរ » ។
លោកស្រីបន្តថា ចំពោះទំហំឥណទាន និងចំនួនអ្នកប្រើប្រាស់ឥណទាន គឺបានកើនឡើងស្របជាមួយគ្នា ហើយប្រាក់បញ្ញើក៏បានកើនឡើងដែរ បើទោះបីជាជិតដល់រដូវកាលបោះឆ្នោតថ្នាក់ជាតិក៏ដោយ ក្នុងនោះអតិថិជនបានយកប្រាក់មកដាក់កាន់តែច្រើន ហើយបើតាមរបាយការណ៍ឃើញថា ក្នុង១ខែបានកើនឡើងប្រមាណ២% ។
ទោះយ៉ាងនេះក្ដី ដោយសារតែបំណុល ឬឥណទានក្នុងវិស័យហិរញ្ញវត្ថុ បានកើនឡើងខ្ពស់ សមាគមមីក្រូហិរញ្ញវត្ថុកម្ពុជា បានចេញនូវគោលការណ៍មួយសម្រាប់ណែនាំសមាជិកឲ្យប្រុងប្រយ័ត្នខ្ពស់ចំពោះការផ្ដល់ឥណទានទៅអតិថិជនរបស់ខ្លួន ហើយគ្រឹះស្ថានមីក្រូហិរញ្ញវត្ថុក៏បានត្រៀម និងតាមដានជាប្រចាំទៅលើឥណទានដែលផ្ដល់ទៅឲ្យអតិថិជន ព្រមទាំងមានការសួរនាំច្បាស់លាស់ជាងមុន មុនពេលផ្ដល់ឥណទានទៅអតិថិជនរបស់ខ្លួន ។
យោងតាមរបាយការណ៍សមាគមមីក្រូហិរញ្ញវត្ថុកម្ពុជា ក្នុងត្រីមាសទី១ដើមឆ្នាំនេះ ការផ្តល់ឥណទានមានទឹកប្រាក់ប្រមាណ៤,៦ប៊ីលានដុល្លារ ពោលគឺកើនឡើងប្រមាណ៧,៦% និងអតិថិជនដាក់ប្រាក់បញ្ញើនៅតាមគ្រឹះស្ថាន មានប្រមាណ២,១២ប៊ីលានដុល្លារ កើនឡើង៦,៣% បើធៀបនឹងត្រីមាសទី៤ ឆ្នាំ២០១៧ ៕
ចែករំលែកព័តមាននេះ