ខេត្តព្រៃវែង ៖ យ៉ាងហោចណាស់មានមនុស្ស២នាក់បានស្លាប់ និង៤នាក់ផ្សេងទៀតបានរងរបួសធ្ងន់ នៅក្នុងហេតុការណ៍គ្រោះថ្នាក់ចរាចរណ៍៤ករណីផ្សេងគ្នា ដែលបានកើតឡើងក្នុងថ្ងៃតែមួយ ក្នុងរយៈពេលតែ៤ម៉ោងប៉ុណ្ណោះ ។
ករណីទី១ – បានកើតឡើងនៅលើកំណាត់ផ្លូវលំ ក្នុងភូមិអង្គរស ឃុំអង្គរស ស្រុកមេសាង រវាងម៉ូតូបុកជាមួយគោយន្តតាឡេថង បណ្តាលឲ្យអ្នកបើកម៉ូតូរងរបួសធ្ងន់ កាលពីវេលាម៉ោង៤និង៣នាទីល្ងាច ថ្ងៃទី២៦ ឧសភានេះ ។
ករណីនេះសមត្ថកិច្ចមូលដ្ឋានបានបញ្ជាក់ប្រាប់ថា មុនពេលកើតហេតុគេឃើញជនរងគ្រោះឈ្មោះ សិន ធី ភេទប្រុស អាយុ១៩ឆ្នាំ មានទីលំនៅក្នុងភូមិ និងឃុំស្រម៉ ស្រុកមេសាង ជិះម៉ូតូមួយគ្រឿងម៉ាកឃ្លិច ពណ៌ក្រហម គ្មានស្លាកលេខ ធ្វើដំណើរពីលិចទៅកើត ពេលមកដល់ចំណុចកើតហេតុក៏ស្រាប់តែមានគោយន្តតាឡេថងមួយគ្រឿងបើកបរដោយឈ្មោះ ទួន ទ័រ ភេទប្រុស អាយុ៣២ឆ្នាំ បើកឆ្លងកាត់ទទឹងថ្នល់ពីមុខ ម៉ូតូជនរងគ្រោះ ហើយជនរងគ្រោះចាប់ហ្វ្រាំងមិនទាន់ក៏បុកគោយន្តនោះពេញទំហឹង បណ្តាលឲ្យរងរបួសបាក់ស្មងជើងខាងឆ្វេង និងត្រូវបានក្រុមគ្រួសារនាំយកទៅព្យាបាល នៅមន្ទីរពេទ្យភ្លាមៗបន្ទាប់ពីកើតហេតុ ។
ករណីទី២- បានកើតឡើងកាលពីវេលាម៉ោង៦និង៣៥នាទីព្រលប់ថ្ងៃទី២៦ ឧសភា នៅលើកំណាត់ផ្លូវជាតិលេខ៨អា ស្ថិតក្នុងភូមិព្រៃទួលថ្មី ឃុំក្របៅ ស្រុកកំចាយមារ រវាងម៉ូតូបុកជាមួយរថយន្តយីឌុបភ្លៅ៥ បណ្តាលឲ្យជនរងគ្រោះជាអ្នកបើកម៉ូតូឈ្មោះ ស៊ា មករា ភេទប្រុស អាយុជាង៣០ឆ្នាំ មានទីលំនៅក្នុងភូមិបេង ឃុំថ្មពូន ស្រុកកញ្ជ្រៀក ស្លាប់បាត់បង់ជីវិតភ្លាមៗនៅហ្នឹងកន្លែងកើតហេតុ ។
ប្រភពពីសមត្ថកិច្ចបានឲ្យដឹងថា មុនពេលកើតហេតុ ជនរងគ្រោះបានជិះម៉ូតូមួយគ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខរាជកា 5050 ធ្វើដំណើរក្នុងទិសដៅពីលិចទៅកើត លុះមកដល់ចំណុចកើតហេតុ ក៏បានបុកពីក្រោយគូថរថយន្តយីឌុបភ្លៅ៥ ពាក់ស្លាកលេខ3A- 5930 ដែលម្ចាស់ចតទុកចោលនៅលើចិញ្ចើមផ្លូវ ដោយមិនមានដាក់សញ្ញាសម្គាល់ បណ្តាលឲ្យអ្នកបើកម៉ូតូស្លាប់ភ្លាមៗនៅហ្នឹងកន្លែង ។
ករណីទី៣- បានកើតឡើងកាលពីវេលាម៉ោង៧និង៤៥នាទីយប់ ថ្ងៃទី២៦ ខែឧសភា នៅលើកំណាត់ផ្លូវជាតិលេខ១ ត្រង់ចំណុចភូមិស្វាយចេក ឃុំព្រៃឈរ ស្រុកកំពង់ត្របែក បង្កឡើងដោយរថយន្តមួយគ្រឿងម៉ាកលុចស៊ីសRX-300 ពាក់ស្លាកលេខភ្នំពេញ 2AQ-7961 បើកបរដោយជនមិនស្គាល់អត្តសញ្ញាណ បានបើកឆ្លងទ្រូងថ្នល់ចូលទៅបុកម៉ូតូមួយគ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខព្រៃវែង 1A-4769 ដែលបើកមកបញ្ច្រាសទិសគ្នា បណ្តាលឲ្យអ្នកជិះម៉ូតូចំនួន២នាក់ ម្នាក់ឈ្មោះ សួន សុណា ភេទប្រុស អាយុ២៦ឆ្នាំ រងរបួសធ្ងន់ និងម្នាក់ទៀតឈ្មោះ ផុន វ៉ាន់សូនី ភេទប្រុស អាយុ៥ឆ្នាំ ស្លាប់បាត់បង់ជីវិតភ្លាមៗនៅហ្នឹងកន្លែង។ ជនរងគ្រោះទាំង២នាក់ មានទីលំនៅក្នុងភូមិចាម ឃុំចាម ស្រុកកំពង់ត្របែក ។
ករណីទី៤- បានកើតឡើងកាលពីវេលាម៉ោង៨និង១៥នាទីយប់ ថ្ងៃទី២៦ ខែឧសភានេះ នៅលើកំណាត់ផ្លូវជាតិលេខ៣១០ ក្នុងភូមិកោះចេក ឃុំកោះចេក ស្រុកពាមជរ រវាងម៉ូតូបុកជាមួយនឹងម៉ូតូបញ្ជ្រាសទិសគ្នា បណ្តាលឲ្យអ្នកជិះម៉ូតូទាំងសងខាងចំនួន៣នាក់ រងរបួសធ្ងន់ដូចគ្នា ។
ជនរងគ្រោះទី១ ឈ្មោះ សុត អ៊ឹម ភេទប្រុស អាយុ២១ឆ្នាំ ជាអ្នកបើកបរម៉ូតូម៉ាកឌ្រីមសង់C125 ពណ៌ខ្មៅ ពាក់ស្លាកលេខភ្នំពេញ 1CW- 0031 និងរួមដំណើរដោយឈ្មោះ ជី រស្មី ភេទប្រុស អាយុ២២ឆ្នាំ អ្នកទាំង២មានទីលំនៅក្នុងភូមិកើតហេតុ បានជិះម៉ូតូទៅបុកជាមួយម៉ូតូមួយគ្រឿងផ្សេងទៀតម៉ាកឌ្រីមសង់C125 ពណ៌ខ្មៅ ពាក់ស្លាកលេខភ្នំពេញ 1CE- 8581 បើកបរដោយឈ្មោះ ឌួង សង់ ភេទប្រុស អាយុ១៩ឆ្នាំ ដែលបើកមកបញ្ច្រាសទិសគ្នា បណ្តាលឲ្យរងរបួសធ្ងន់ទាំងសងខាង ហើយក្រោយកើតហេតុក្រុមគ្រួសារក៏បានទាក់ទងហៅឡានពេទ្យដឹកយកទៅព្យាបាលនៅមន្ទីរពេទ្យបង្អែកស្រុកពាមជរទាំងអស់គ្នា ៕
ចែករំលែកព័តមាននេះ