ខេត្តបាត់ដំបង ៖ សមត្ថកិច្ចបានរាយការណ៍ថា សត្វគោចំនួន៣ក្បាលត្រូវចរន្តអគ្គីសនីឆក់ងាប់នៅក្បែរបង្គោលអគ្គីសនីមួយកន្លែង កាលពីវេលាម៉ោង៤និង២៥នាទីរសៀលថ្ងៃទី២៦ ឧសភា នៅចំណុចភូមិស្រះទឹកថ្មី ឃុំតាក្រី ស្រុកកំរៀង ក្រោយពីមានភ្លៀងធ្លាក់។
សេចក្ដីរាយការណ៍បានឲ្យដឹងទៀតថា ហេតុការណ៍នោះបានកើតឡើងត្រង់ចំណុចបង្គោលភ្លើងប្រអប់លេខ៥៩៤ ដែលមានតខ្សែប្រអប់កុងទ័រភ្លើងខ្វាត់ខ្វែងផង។ ប្រភពដដែលបានឲ្យដឹងថា ទំនងខ្សែភ្លើងដែលតចេញពីប្រអប់កុងទ័រនោះឆ្លងចរន្ត ទើបបានជាឆក់សត្វគោបែបនេះ។
អ្នកភូមិបានប្រាប់សមត្ថកិច្ចថា មុនកើតហេតុមានភ្លៀងធ្លាក់ ហើយសត្វគោបានដើរទៅស៊ីស្មៅក្បែរបង្គោលភ្លើងនោះ ក៏ស្រាប់តែត្រូវចរន្តភ្លើងឆក់បណ្តាលឲ្យដួលប្រកាច់ងាប់ចំនួន៣ក្បាលដែលនៅក្បែគ្នាជាបន្តបន្ទាប់តែម្ដង។ អ្នកភូមិបានស្នើឲ្យមានការអន្តរាគមន៍ពីសំណាក់អាជ្ញាធរចំពោះបញ្ហាបង្គោលភ្លើងដែលមានឆ្លងចរន្តនេះ ដើម្បីឲ្យក្រុមហ៊ុនអគ្គីសនីចុះពិនិត្យបង្គោលភ្លើងនេះ និងត្រូវចេញសំណងការខាតបង់គោចំនួន៣ក្បាល។
បើតាមសមត្ថកិច្ចបានឲ្យដឹងថា អ្នកបំរើការអគ្គីសនីបានចុះពិនិត្យបង្គោលភ្លើងនោះ និងកំពុងដោះស្រាយហើយ៕
ចែករំលែកព័តមាននេះ