ខេត្តក្រចេះ ៖ ពលរដ្ឋជាច្រើនគ្រួសាររស់នៅសង្កាត់កោះទ្រង់ ក្រុងក្រចេះដែលមានរបរ លក់ផ្លែក្រូចថ្លុងជារបរអាជីពប្រចាំគ្រួសារ ហើយព្រួយបារម្ភពីទិន្នផលរបស់ក្រូចធ្លាក់ចុះនៅពេលដែល ស្ថានភាពដើមក្រូចថ្លុងដែលបានដាំដុះ និងកំពុងតែហុចផលទៅហើយនោះកំពុងតែជួបប្រទះ នូវជំងឺជាច្រើនមុខ ។…
ខេត្តក្រចេះ ៖ ពលរដ្ឋជាច្រើនគ្រួសាររស់នៅសង្កាត់កោះទ្រង់ ក្រុងក្រចេះដែលមានរបរ លក់ផ្លែក្រូចថ្លុងជារបរអាជីពប្រចាំគ្រួសារ ហើយព្រួយបារម្ភពីទិន្នផលរបស់ក្រូចធ្លាក់ចុះនៅពេលដែល ស្ថានភាពដើមក្រូចថ្លុងដែលបានដាំដុះ និងកំពុងតែហុចផលទៅហើយនោះកំពុងតែជួបប្រទះ នូវជំងឺជាច្រើនមុខ ។
ជំងឺដើមក្រូចថ្លុងដែលពលរដ្ឋព្រួយបារម្ភថា កំពុងតែយាយីដល់ដំណាំក្រូចថ្លុងគ្រប់ដើមតូចធំ និងក៏អំពាវនាវឲ្យមន្ត្រីជំនាញជួយមានវិធានការទប់ស្កាត់ផងដែរនោះ មានដូចជា ជំងឺងាប់មែក ជំងឺដួងស៊ីឬស ជំងឺផ្សិតដើម ជំងឺក្រាលស្លឹក និងជំងឺចេញជ័រដើមដែលពពួកជំងឺទាំងនេះ បានយាយីដល់ដើមក្រូចមិនឲ្យលូតលាស់ ហើយកន្លងមកក៏មិនធ្លាប់ជួបប្រទះនោះទេ ។
ពលរដ្ឋលើកឡើងថា ប្រសិនបើជំងឺនេះតែបន្តរីករាលដាលលើដំណាំក្រូចដោយមិនមាន វិធានការបង្ការទប់ស្កាត់ទេនោះការប្រមូលផលក្រូចឆ្នាំនេះ និងមានការធ្លាក់ចុះស្របគ្នា នោះ លំហូរសេដ្ឋកិច្ចប្រចាំគ្រួសាររបស់ពួកគាត់ និងធ្លាក់ចុះដូចគ្នា ។
លោកតី ទន វ័យជាង៤០ឆ្នាំ ដែលជាប្រជាកសិករម្នាក់ ក្នុងចំណោមប្រជាកសិករជាច្រើនរយនាក់ដែលមានរបរដាំដំណាំដើមក្រូចថ្លុងជារបរអាជីព បាននិយាយថា សព្វថ្ងៃនេះនៅក្នុងដីភូមិរបស់គាត់បានដាំដើមក្រូចថ្លុងជាង៥០ដើម និងកំពុង ទទួលបានផលបណ្តើរៗហើយ ។ គាត់ថា ក្រូចថ្លុង១ដើមបានផ្តល់ប្រាក់ចំណូលឲ្យទៅគ្រួសារ គាត់ចំនួនជាង២លានរៀលក្នុង១ឆ្នាំ ស្របពេលដែលដំណាំក្រូចថ្លុងកំពុងតែមានទីផ្សារខ្ពស់ សម្រាប់អ្នកនិយមទិញទៅទទួលទាន ។
បុរសរូបនេះបានប្រៀបធៀបថា គ្មានដំណាំអ្វីដែលទទួលបានផលដូចក្រូចថ្លុងនោះទេ បើសិនជា ផ្ទៃដីនោះមានទំហំប៉ុនគ្នា ។លើកឡើងឲ្យដឹងស្រដៀងគ្នានេះ ពលរដ្ឋដែមានរបរដាំក្រូចថ្លុងនៅលើដីកោះទាំងនោះបាន រៀបរាប់ថា ជីវភាពគ្រួសាររបស់ពួកគាត់មានភាពធូរធារច្រើន ដោយពឹងផ្អែកលើការដាំក្រូចថ្លុង សម្រាប់បេះផ្លែលក់ ។ តែយ៉ាងណាក្រោយពីដំណាំក្រូចរបស់ពួកគាត់ កំពុងប្រឈម និងស្ថានភាពជំងឺឆ្លងដែលពុំធ្លាប់ជួបប្រទះបែបនេះ ហើយបើទោះជាបានរិះរក វិធានការប្រើថ្នាំសង្កូវបង្ការទប់ស្កាត់យ៉ាងណាក៏នៅមិនឈ្នះដែរនោះ គឺពួកគាត់មានក្តីបារម្ភថា ទិន្នផលផ្លែក្រូចនឹងធ្លាក់ចុះ ។ ពួកគាត់អំពាវនាវឲ្យមន្ត្រីជំនាញខាងកសិកម្មជួយមានវិធីសាស្ត្រ បែបណាសម្រាប់ជួយបង្ការទប់ស្កាត់នូវជំងឺកំពុងតែបំផ្លាញរុក្ខជាតិនេះ ។
ប្រធានសហគមន៍កោះទ្រង់លោកប៊ុន បាន បាននិយាយថា សព្វថ្ងៃក្រូចថ្លុងត្រូវបាន សហគមន៍ដាក់លក់ក្នុង១ផ្លែចាប់ពី១ម៉ឺនដល់១ម៉ឺន៥ពាន់រៀល ហើយនៅលើដីកោះមានពលរដ្ឋ ប្រមាណជាង៧០% បានចាប់យករបរដាំក្រូចថ្លុង ។
លោកថា ក្រោយពីដើមក្រូចបានជួបប្រទះ និងស្ថានភាពជំងឺប្រភេទនេះខាងសហគមន៍ ក៏បានយកផ្លែក្រូច ស្លឹកក្រូច និងសំបក ដើមក្រូចថ្លុងយកមកឱ្យខាងមន្ទីរកសិកម្មខេត្ត ដើម្បីរក វិធីសាស្ត្រព្យាបាល តែរហូតមកដល់ពេលនេះខាងមន្ទីរកសិកម្មមិនទាន់បានឆ្លើយតបមកវិញ នោះទេ ។
កោះទ្រង់ជាកោះមួយមានទីតាំងនៅកណ្តាលទន្លេមេគង្គទល់មុខក្រុងក្រចេះ ។ កោះនេះ ត្រូវបានកាត់ចូលជាសង្កាត់ ក្នុងក្រុងក្រចេះ និងបានចែកចេញជា២ភូមិ គឺភូមិចុងកោះ និងភូមិ ក្បាលកោះ ។ អត្រាពលរដ្ឋរស់នៅលើដីកោះមានចំនួន៤២៥គ្រួសារ ស្មើនិង១៨៨៣នាក់ ។ មិនត្រឹមតែបានផ្តល់នូវសក្តានុពលអេកូទេសចរណ៍ដ៏សម្បូរបែបនោះទេ នៅលើដីកោះដ៏តូចមួយ នេះ ក៏មានដីដែលសម្បូទៅដោយជីជាតិ សម្រាប់បង្កបង្កើនផលដំណាំកសិកម្មគ្រប់ប្រភេទ លើផ្ទៃដីទំហំជាង២២៣ហិកតាដូចជា បន្លែធម្មជាតិ ពិសេសនោះ គឺដំណាំក្រូចថ្លុង ដែលកំពុងតែ មានឈ្មោះបោះសម្លេងជាខ្លាំងធ្វើឲ្យមានការទាក់ទាញលើរស់ជាតិ និងក៏មានតម្លៃថ្លៃគួរ សមផងដែរ ៕
ចែករំលែកព័តមាននេះ