រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា និងសម្តេចកិត្តិព្រឹទ្ធបណ្ឌិតនាព្រឹកថ្ងៃទី២៤ ខែឧសភា ឆ្នាំ២០១៨ បានអញ្ជើញជាអធិបតិក្នុងពិធីតែងតាំង និងពិធីបុណ្យស្រោចស្រពសុគន្ធវារីប្រគេន សម្តេចព្រះឧត្តមមុនី ជា សំអានព្រះមេគណខេត្តកណ្តាល សម្តេចព្រះពុទ្ធជ័យមុនី ព្រះមេគណរាជធានីភ្នំពេញ និងសម្តេចព្រះសាក្យមុនីកិត្តិបណ្ឌិតទស្សនវិជ្ជា រ័ត្ន សារឿន ព្រះគ្រូអនុគណខណ្ឌសែនសុខ នៅវត្តបុទមវតីមានប្រសាសន៍បញ្ជាក់ថា សូមលោក ទេសរដ្ឋមន្ត្រី ហ៊ីមឆែមរដ្ឋមន្ត្រីក្រសួងធម្មការ និងសាសនាត្រូវរៀបចំតាមថានានុក្រម តាមឋាន មិនមែនរៀបចំទៅតាមគោរមងារទេ ។ ត្រូវពិនិត្យអំពីបញ្ហានេះឡើងវិញ ដើម្បីចៀសវាងនូវការលំបាកក្នុងការរៀបចំ ។
សម្តេចតេជោបានមានប្រសាសន៍ថា សម្រាប់នៅពេលខាងមុខត្រូវដឹងថា ឋានព្រះមេគណ ខេត្តមានតួនាទីខាងវិស័យព្រះពុទ្ធសាសនា គឺស្មើនឹងអភិបាលខេត្តផ្នែកអាណាចក្រ ។ បើមិនដូច្នេះអាសនសង្ឃទៅជាវង្វេងទិសអស់ ។ សម្តេចតេជោមានប្រសាសន៍ថា សម្រាប់ទីក្រុងភ្នំពេញ និងខេត្តកណ្តាលឲ្យបានច្បាស់បន្តិច ដើម្បីថ្ងៃក្រោយត្រូវរៀបចំអាសនក្រមបែបណា សម្រាប់ការដោះស្រាយបញ្ហានេះ ។ បើសិនជាមិនដូច្នោះទេវានឹងបង្កើតនូវបញ្ហាធ្វើការលំបាក ។ នេះមិនមែនជាកំហុសរបស់ព្រះសង្ឃទេ ប៉ុន្តែជាកំហុសរបស់មន្ត្រីរាជការដែល ទទួលនូវការរៀបចំ ។
សម្តេចតេជោបញ្ជាក់ថា ព្រះមេគុណបើនិយាយឲ្យពិតតាមឋានានុក្រម គឺជាចៅហ្វាយខេត្តសង្ឃ ។ ក៏ប៉ុន្តែមានពេលខ្លះយើងយកចៅហ្វាយខេត្តសង្ឃយកទៅដាក់នៅខាងក្រោយ ប្រធានស្រុកសង្ឃ ឬក៏មេឃុំសង្ឃទៅវិញ ។ ដោយសារយើងយកងារ សម្តេចយកទៅដាក់ពីមុខ ។ ចំណុចនេះ គឺជាចំណុចដែលយើងធ្វើហើយមិនមាននៅតាមខេត្តដ៏ទៃទេ គឺមាននៅទីក្រុងភ្នំពេញ និងទីរួមខេត្តកណ្តាលតែប៉ុណ្ណោះ ។
ទាក់ទិនករណីនេះសម្តេចបានលើកឧទាហរណ៍នៅទីក្រុងភ្នំពេញមានពិធីបុណ្យមួយគឺយើងនិមន្តម្តង និមន្តសម្តេចអង្គនេះបន្ថែមទៅដោយនិមន្តព្រះមេគណព្រះអនុគណទៀត។ដូច្នេះយកសម្តេចមួយអង្គដែលជាចៅអធិការវត្តដែលមានគោរមងារជាសម្តេចយកទៅដាក់គង់កៅអីពីមុខ ។ រួចហើយក៏ព្រះមេគណដែលជាចៅហ្វាយខេត្តទៅដាក់ពីក្រោយ ។ចំណុចនេះហើយជាចំណុចឆ្គង ។ នេះជាអាសនក្រមដែលត្រូវដោះស្រាយ ។ បើយើងមិនបានគិតបញ្ហានឹងទេយើងនៅតែឆ្គង ។ ដូច្នេះការរៀបចំទាំងអស់ត្រូវរៀបចំទីតាមឋានានុក្រម ។
សម្តេចតេជោបានលើកឧទាហរណ៍ បើសិនជាមានពិធិបុណ្យតាមទីអារាមនានា គឺអត់មានការទាស់ខុសទេ ក្នុងការរៀបចំអាសនក្រមរវាងព្រះមេគណ និងគោរមងារសម្តេចអង្គណាមួយក្នុងកៅអីពីរនៅខាងមុខ អត់មានអីខុសទេ ។ ជាពិសេសគណកម្មការជាតិបុណ្យជាតិ អន្តរជាតិដែលតែងរៀបចំកម្មវិធីនានាកុំឲ្យការច្រឡំ រវាងគោរមងារ និងម្ខាងតួនាទី ។ សម្តេចបានលើកឡើង ដើម្បអនុវត្តន៍នូវបាវចនាជាតិ សាសនា ព្រះមហាក្សត្រកន្លែងធ្វើការ និងកន្លែងដ៏ទៃទៀត គឺត្រូវរៀបចំទង់ទាំង៣តែម្តង គឺទង់ជាតិ ទង់សាសនា និងទង់ព្រះមហាក្សត្រ ។
«សម្តេចតេជោបានមានប្រសាសន៍បញ្ជាក់រួចមកហើយថា អាណាចក្រ និងពុទ្ធចក្រ
ប្រៀបដូចជា កង់ពីរដែលមិនអាចខ្វះមួយណាបានទេ ។ អាណាចក្រ បើសិនជាដើរខុសឆ្គងហើយនោះនឹងនាំទៅដល់វិនាសកម្មសម្រាប់ពុទ្ធចក្រហើយពេលវេលាដោយឡែកសម្តេចតេជោនាយករដ្ឋមន្ត្រីគូសបញ្ជាក់ថា សង្ឃឹមថា ព្រះសង្ឃក៏ដូចជា ប្រជាពលរដ្ឋត្រូវខិតខំថែទាំនូវសន្តិភាពដែលយើងរកបានដោយលំបាក ។
បើសិនជារដ្ឋត្រូវជួបប្រទះនូវផលពិបាក ហើយព្រះពុទ្ធសាសនាក៏ត្រូវជួបប្រទះដូចតែគ្នា ព្រះសង្ខក៏ត្រូវរត់ព្រោះគ្រាប់បែកគ្រាប់ផ្លោងអត់ស្គាល់ព្រះសង្ឃទេគឺបំផ្លាញទាំងអស់ មិនស្គាល់ព្រះពុទ្ធ មិនស្គាល់ឥស្លាម មិនស្គាល់យីស៊ូគ្រឹះ គ្មានស្គាល់អីទាំងអស់ ។ដូច្នេះហើយយើងត្រូវរួមគ្នាការពារនូវសុខសន្តិភាពសម្រាប់ប្រទេសរបស់យើង ៕
ចែករំលែកព័តមាននេះ