រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខឥសានបានអះអាង គម្រោងធ្វើបាតុកម្មរបស់សកម្មជនអតីតសង្គ្រោះជាតិនៅក្រៅប្រទេស ដើម្បីទាមទារឲ្យរដ្ឋាភិបាលជប៉ុនផ្អាកការផ្តល់ជំនួយដល់ការបោះឆ្នោតនៅកម្ពុជា គឺជាក្រុមឧទ្ទាមក្រៅច្បាប់ និងបំផ្លាញលទ្ធិប្រជាធិបតេយ្យនៅកម្ពុជា ។
ការលើកឡើងរបស់អ្នកនាំពាក្យគណបក្សកាន់អំណាចនេះស្របពេលប្រធានគណបក្សសង្គ្រោះជាតិប្រឆាំងសហរដ្ឋអាមេរិកគ្រោងធ្វើបាតុកម្មនៅមុខស្ថានទូតជប៉ុនប្រចាំអាមេរិកដើម្បីទាមទារឲ្យរដ្ឋាភិបាលជប៉ុនផ្អាកការផ្តល់ជំនួយមកកម្ពុជា ពិសេសនោះការបោះឆ្នោតនៅពេលខាងមុខនេះ ។
យ៉ាងណាក្តីលោកសុខឥសានបានលើកឡើងនៅថ្ងៃទី២៣ ឧសភា ឆ្នាំ២០១៨ ថា
ការដែលអតីតប្រឆាំងមិនអាច និងមិនបានចូលរួមប្រកួតប្រជែងក្នុងការបោះឆ្នោតនោះដោយ សារសាម៉ីគណបក្សនេះបានប្រព្រឹត្តល្មើសច្បាប់ដោយខ្លួនឯងដែលត្រូវរលាយខ្លួនឯងកុំបន្ទោសអ្នកដទៃ ប្ញគណបក្សដទៃឲ្យសោះ គ្មានអ្នកណាបង្កើតកំហុសឲ្យខ្លួនទេ ។
លោកបញ្ជាក់ថា «ខ្លួនសម្លាប់ខ្លួនឯងហើយ ចង់ចូលរួមបោះឆ្នោតទៀត ហើយការធ្វើបាតុកម្មប្រឆាំងនឹងរដ្ឋាភិបាលជប៉ុន និងទាមទារឲ្យជប៉ុនផ្អាកជំនួយមកឲ្យគជប និងកម្ពុជា គឺជាចេតនាទុច្ចរិតរបស់ពួកឧទ្ទាមក្រៅច្បាប់ ចង់បំផ្លាញលទ្ធិប្រជាធិបតេយ្យនៅកម្ពុជា ។ ទោះមានបាតុកម្មយ៉ាងណាក៏គ្មានឥទ្ធិពលអ្វីដល់ការសម្រេចចិត្តរបស់ប្រទេសជប៉ុន និងមិនប៉ះពាល់ដល់ដំណើរលទ្ធិប្រជាធិបតេយ្យនៅកម្ពុជាឡើយ ។
ម្យ៉ាងទៀតការធ្វើបាតុកម្មប្រឆាំងនឹងប្រទេសជប៉ុនបង្ហាញច្បាស់ពីភាពទាល់ច្រករបស់ពួកឧទ្ទាមក្រៅច្បាប់ ដែលទទួលបរាជ័យផ្ទួនៗជាបន្តបន្ទាប់» ។
ជាមួយគ្នានោះដែរអ្នកនាំពាក្យគណបក្សកាន់អំណាចក៏បានលើកឡើងថា ដើម្បីស្របតាមនីតិរដ្ឋ នៅក្នុងសង្គមប្រជាធិបតេយ្យនោះ អង្គការមិនមែនរដ្ឋាភិបាលដែលចង់សង្កេតការណ៍បោះឆ្នោត ត្រូវតែមានចុះបញ្ជីត្រឹមត្រូវនៅក្រសួងមហាផ្ទៃ មិនត្រូវល្មើសច្បាប់ពោល គឺត្រូវគោរពច្បាប់ ។
លោកក៏បានគូសបញ្ជាក់ថា «បើចង់សង្កេតការណ៍បោះឆ្នោត ហើយចង់បង្កើតអង្គការចាត់តាំងអណាធិបតេយ្យ ខុសច្បាប់នោះមិនអាចបណ្តែតបណ្តោយបានជាដាច់ខាត ពីព្រោះ កម្ពុជាមានរដ្ឋអំណាចស្របច្បាប់ច្បាស់លាស់ មិនអាចឲ្យមានរដ្ឋនៅក្នុងរដ្ឋនោះឡើយ »។
ការលើកឡើងរបស់លោកសុខ ឥសានេះ បន្ទាប់ពីពលរដ្ឋខ្មែរនៅក្រៅប្រទេសដែលគាំទ្របក្សប្រឆាំងគ្រោងធ្វើមហាបាតុកម្មនៅអង្គការសហប្រជាជាតិពាក់កណ្ដាលខែមិថុនា ដើម្បីទាមទារឱ្យប្រទេសជប៉ុនដកជំនួយបោះឆ្នោត និងស្នើសុំឱ្យប្រទេសជប៉ុនប្រកាស ជាផ្លូវការកុំគាំទ្រលទ្ធផលបោះឆ្នោតជាតិរៀបចំដោយរបបលោកហ៊ុន សែន ដែលបាន ផាត់ចោលគណបក្សសង្គ្រោះជាតិមិនឱ្យចូលរួមនោះ ។
យោងតាមគេហទំព័រសារព័ត៌មានវិទ្យុអាស៊ីស៊េរីបានផ្សាយថា ប្រធានគណបក្សសង្គ្រោះជាតិប្រចាំសហរដ្ឋអាមេរិកលោកអ៊ុង រិទ្ធី នឹងដឹកនាំធ្វើមហាបាតុកម្មដែលគ្រោង ធ្វើនៅទី១៦ ខែមិថុនា នៅមុខស្ថានបេសកកម្មអចិន្ត្រៃយ៍របស់ប្រទេសជប៉ុនប្រចាំអង្គការសហប្រជាជាតិ និងនៅទីក្រុងញូវយ៉កនេះ គឺជាការផ្ញើសារមួយដល់ប្រទេសម្ចាស់ ជំនួយដ៏ធំរបស់កម្ពុជាមួយនេះ ឱ្យដាក់សម្ពាធលើរបបលោកហ៊ុន សែន ឱ្យងាកមក គោរពគោលការណ៍ប្រជាធិបតេយ្យសេរីពហុបក្ស និងសិទ្ធិមនុស្សឱ្យបានខ្ជាប់ខ្ជួន ស្របតាមស្មារតីនៃកិច្ចព្រមព្រៀងសន្តិភាពទីក្រុងប៉ារីសដែលប្រទេសជប៉ុនក៏ជា ប្រទេសម្ចាស់ហត្ថលេខីមួយដែរ ។
លោកអ៊ុង រិទ្ធី អះអាងថា ជំហរទន់ភ្លន់បែបការទូតរបស់ប្រទេសជប៉ុន និងការមិនព្រម ដាក់សម្ពាធណាមួយ គឺជាការបើកដៃឱ្យរដ្ឋាភិបាលកម្ពុជាបានចិត្តនៅតែមានះបន្ត រៀបចំ ការបោះឆ្នោតមួយក្លែងក្លាយដែលរងការរិះគន់ពីជុំទិស ។
លោកបន្តថា ប្រសិនបើជប៉ុនជាមហាអំណាចសេដ្ឋកិច្ចនៅអាស៊ីហ្នឹងមិនដកថយ គេ នៅតែចចេសនៅតែបន្តផ្តល់ជំនួយការបោះឆ្នោតទេនឹងបន្តបាតុកម្មរហូតដល់ជប៉ុនដក ជំនួយចេញពីការបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ។
សូមជម្រាបថា រដ្ឋាភិបាលជប៉ុនបានបញ្ជាក់ប្រាប់សម្តេតេជោ ហ៊ុន សែនរាល់ជំនួបផ្លូវ ការថា ប្រទេសជប៉ុនចង់ឃើញការបោះឆ្នោតមួយនៅកម្ពុជាដែលមានភាពសេរីត្រឹមត្រូវ និងយុត្តិធម៌ដែលឆ្លុះបញ្ចាំងអំពីឆន្ទៈពិតប្រាកដរបស់ពលរដ្ឋម្ចាស់ឆ្នោត ។ ហើយ ប្រទេសជប៉ុននៅតែរក្សាជំហរទន់ភ្លន់ដោយនៅតែបន្តផ្ដល់ជំនួយដល់គ.ជ.ប ក្នុងការរៀបចំការបោះឆ្នោតនៅកម្ពុជាទោះបីជាសហភាពអឺរ៉ុប និងសហរដ្ឋអាមេរិកកាត់ផ្ដាច់ ជំនួយទាំងស្រុងដល់គណៈកម្មាធិការជាតិរៀបចំការបោះឆ្នោត និងកាត់ផ្ដាច់ជំនួយ ដទៃទៀតក៏ដោយ ៕
ចែករំលែកព័តមាននេះ