រាជធានីភ្នំពេញ ៖ ម្ដាយរបស់កញ្ញា ស៊ឹម ថៃណា មានជំងឺទឹកនោមប្រៃជាយូរមកហើយ ដោយតម្រូវឲ្យអ្នកស្រីលាងឈាមជាប្រចាំ និងត្រូវចំណាយប្រាក់ច្រើន ដើម្បីថែទាំសុខភាព។ ដូច្នេះហើយទើប ស៊ឹម ថៃណា ប្រកាសលក់ផ្ទះ ព្រមទាំងទ្រព្យសម្បត្តិមួយចំនួនដែលនៅសេសសល់ដើម្បីព្យាបាលម្តាយ ។
តារាចម្រៀងស្រីកញ្ញាស៊ឹម ថៃណា កំពុងជួបរឿងសោកសៅចិត្ត ដ្បិតម្តាយធ្លាក់ខ្លួនឈឺ កំពុងសម្រាកព្យាបាលក្នុងមន្ទីរពេទ្យ ។ ម្ដាយរបស់នាងឈឺអស់ពេលជាង៣ទៅ៤ខែមកហើយ ពេលនេះអាការជំងឺមិនបានធូរស្រាលទេ រហូតកញ្ញាស៊ឹម ថៃណា និងគ្រួសារមានចិត្តបារម្ភជាខ្លាំង ។
លោកស៊ឹម សុរ៉ាមភូមិ ជាមិត្តភក្តិរៀបរាប់ថា កាលពីប៉ុន្មានឆ្នាំមុនលោកបានលក់ផ្ទះ រថយន្ត ហាងថតរូប អស់ពីខ្លួនរលីងដើម្បីព្យាបាលជំងឺអ្នកម្ដាយ មិនខុសពីស្ថានភាពជីវិតតារាចម្រៀង ស៊ឹម ថៃណា អំឡុងពេលនេះឡើយ ។ ដូច្នេះលោកគ្មានអ្វីក្រៅពីពាក្យជូនពរ និងបន្តជាកម្លាំងចិត្តឲ្យនាង រឹងមាំឡើង ។ «ខ្ញុំយល់ពីអារម្មណ៍មួយនេះច្បាស់ អស់អ្វីអស់ទៅសុំត្រឹមនៅក្បែរអ្នកម៉ែ មិនថាអស់លុយច្រើនប៉ុនណា ហត់នឿយប៉ុនណា ។ ក្នុងចិត្តគឺចង់បានតែមួយគត់ ចង់នៅក្បែរម៉ែបន្តទៀត ព្រោះខ្ញុំធ្លាប់ឆ្លងកាត់រួចហើយ ។ ថៃណា មិត្តសម្លាញ់ត្រូវរឹងប៉ឹង មិត្តធ្វើជាកូនល្អ អស់ពីកម្លាំងកាយចិត្តហើយ » ។
កញ្ញាញឹម ចាន់ថន ជាមិត្តភក្តិតាំងពីយូរមកហើយនោះបានស្វះស្វែងរកជំនួយមួយចំនួនយកទៅជួយដល់ស៊ឹម ថៃណា ។ ចាន់ថនបានប្រាប់ពីស្ថានភាពជំងឺម្តាយថៃណាកាលពីរសៀលថ្ងៃទី២១ឧសភាថា«អាណិតថៃណាណាស់ ។ ម្តាយថៃណាធ្វើទុក្ខណាស់ បានតែថ្នាំ និងសេរ៉ូមជួយទប់ទេ ។ យើងគ្មានអ្វីក្រៅពីប្រឹងជួយតាមលទ្ឋភាព និងលើកដៃបន់បារមីនានាជួយឃុំគ្រងម្តាយថៃណាឱ្យនៅរឹងមាំ ។ ដោយថៃណាមានសមត្ថភាពច្រៀង និងសម្តែងគឺចង់ឱ្យនាងចាប់ការសម្តែងព្រោះសម្តែងសម តែនាងថាធាត់ពេកចាំសម្រកទម្ងន់សិន ។ គិតយល់បែបនេះមកពីយល់ថាថៃណាអស់ទ្រព្យច្រើនអ៊ីចឹងមានតែខំសម្រួលចិត្តស្មារតីចូលសិល្បៈពេញទំហឹងចាប់ឱកាសឡើងវិញម្តងទៀត »។
ខណៈពេលម្តាយកំពុងចូលសម្រាកព្យាបាលនោះ កញ្ញាស៊ឹម ថៃណា បាននាំបងប្អូនទាំងអស់ទៅគេងកំដរម្ដាយ ទោះបីជានៅតាមផ្លូវដើរ គ្មានកន្លែងសម្រាកត្រឹមត្រូវក៏ដោយ ។ ជាមួយនឹងគ្នានេះក៏មានហ្វេន និងមហាជននាំគ្នាជូនពរដល់ម្ដាយនាងឲ្យឆាប់ជាសះស្បើយ ៕
ចែករំលែកព័តមាននេះ