ខេត្តស្ទឹងត្រែង ៖ មន្ទីរថ្មីសម និងមន្ត្រីល្អ មានការសាមគ្គីគ្នាល្អរវាងបុគ្គលិក និងបុគ្គលិក រវាងមន្ត្រីក្នុងស្ថាប័ននិងមន្ត្រីនានានៃមន្ទីរផ្សេងៗ គិតផលប្រយោជន៍ជាធំ និងបម្រើប្រជាពលរដ្ឋគ្រប់ពេលវេលាទាំងនេះជាប្រសាសន៍ផ្តាំផ្ញើបស់ឯកឧត្តម ឌិត ទីណា រដ្ឋលេខាធិការក្រសួងរ៉ែ និងថាមពលដែលបានផ្តាំផ្ញើដល់មន្ត្រីរ៉ែ និងថាមពលទាំងអស់ក្នុងខេត្តស្ទឹងត្រែង ក្នុងកំឡុងពេលបើកការសម្ពោធដាក់ឲ្យប្រើប្រាស់ជាផ្លូវការនូវអគាររ៉ែមួយខ្នង កាលពីព្រឹកថ្ងៃទី២១ ខែឧសភា ឆ្នាំ២០១៨ ។
ដោយមានការអញ្ជើញដ៏ខ្ពង់ខ្ពស់ពីសំណាក់ឯកឧត្តម ម៉ុម សារឿន អភិបាលខេត្ត ឯកឧត្ដមឈឹម រចនា ប្រធានក្រុមប្រឹក្សាខេត្ត និងមន្ត្រីរាជការ កងកម្លាំងប្រដាប់អាវុធ សិស្ស និស្សិត ក្រុមកាយឬទ្ធិ ក្រុមកាកបាទក្រហម លោកគ្រូអ្នកគ្រូ តាជី យាយជី ជាច្រើននាក់ផងដែរ ។
លោក នូ សុវណ្ណារា ប្រធានមន្ទីររ៉ែ និងថាមពលបានឲ្យដឹងថា ពីមុនមន្ទីររ៉ែ និងថាមពលបានជួលផ្ទះប្រជាពលរដ្ឋ ដើម្បីធ្វើការងារតែដោយសារបានការយកចិត្តទុកដាក់ពីអាជ្ញាធរខេត្ត ជាពិសេសឯកឧត្តម ម៉ុម សារឿន ប្រធានគណបញ្ជាការឯកភាពខេត្តបានប្រគល់ដីមួយកន្លែង ទំហំ១ពាន់២រយម៉ែត្រការ៉េ ដែលមានទីតាំងស្ថិតក្នុងភូមិលើ សង្កាត់ស្រះឬស្សី ក្រុងស្ទឹងត្រែង ដើម្បីបានសាងសង់អាគាររដ្ឋបាលថ្មីនេះ ឡើងឲ្យបានសមរម្យ ។
លោកបន្តថា អាគារដ្ឋបាលថ្មីនេះសាងសង់តាមរចនាបទបែបខ្មែរសម័យទំនើប ដែលមានធ្វើឡើងពីបេតុង ជញ្ជាំងឥដ្ឋ ដំបូលប្រក់ក្បឿង ទទឹង១០ម៉ែត្រ បណ្តោយ២០ម៉ែត្រ កំពស់២ជាន់ មាន៩បន្ទប់ ក្នុងនោះសាលប្រជុំ១ ការិយាល័យ៦ និងបន្ទប់ទឹក២ ។
ក្នុងឱកាសនោះឯកឧត្តមម៉ុម សារឿន បានអបអរសាទរយ៉ាងក្រៃលែងចំពោះអាគារមន្ទីររ៉ែ និងថាមពលថ្មីមួយនេះដែលបានបដិសន្ធិឡើង រួចរាល់ជាស្ថាពរនាពេលនេះ ដើម្បីបម្រើប្រយោជន៍ដ៏ធំធេងជូនប្រជាពលរដ្ឋក្នុងខេត្តទាំងមូល ។ ឯឧត្តម ម៉ុម សារឿនបន្តថា នេះជាមោទភាពបំផុតដែលខេត្តស្ទឹងត្រែងមានវារីអគ្គិសនីដែលមានអានុភាពដល់៤០០មេហ្គាវ៉ាត់ ដែលធ្វើឲ្យប្រជាពលរដ្ឋស្ទើគ្រប់ខ្នងផ្ទះ ក្នុងខេត្តមានភ្លើងអគ្គិសនីប្រើប្រាស់ ដោយឡែកចំពោះភូមិនៅដាច់ស្រយាល ខាងមន្ត្រីអគ្គិសនីខេត្ត បានកំពុងដាក់បង្គោល ដើម្បីភ្ជាប់បណ្តាញហើយ និងបានភ្លើងប្រើគ្រប់ៗគ្នាក្នុងពេលដ៏ខ្លីខាងមុខ ។
ឯកឧត្តមបានជំរុញប្រជាពលរដ្ឋទាំងអស់ ដែលមានឈ្មោះក្នុងបញ្ជីបោះឆ្នោត សូមអញ្ជើញទៅបោះឆ្នោតឲ្យបានគ្រប់ៗគ្នា ដើម្បីអភិវឌ្ឃជាតិយើងឲ្យបានរីករុងរឿងជាបន្តទៅមុខទៀត ៕
ចែករំលែកព័តមាននេះ