ជំងឺរលាកទងសួតអាចជារឿងមួយធ្វើឲ្យអ្នកជំងឺមានអារម្មណ៍គួរឲ្យអាណិតខ្លួនឯង ប៉ុន្តែវាជាជំងឺតិចតួចមួយដែលបង្កឡើងដោយវីរុសប៉ុណ្ណោះ ជាពិសេសវីរុសបង្កជំងឺផ្តាសាយ ឬអ្នកជក់បារីរ៉ាំរ៉ៃ ។ ជំងឺរលាកទងសួតក៏អាចបង្កឡើងដោយការប៉ះពាល់នឹងផ្សែងបារី សារធាតុគីមី ឬបាក់តេរីផងដែរ ។ ការក្អក ក្អកមានស្លេស្ម និងអារម្មណ៍អស់កម្លាំងគឺជាសញ្ញាធម្មតានៃជំងឺរលាកទងសួត ប៉ុន្តែទាំងនេះក៏ជារោគសញ្ញានៃជំងឺ ផ្សេងៗទៀតដែរ។
នៅពេលទងសួតដែលដឹកនាំខ្យល់អុកស៊ីសែនទៅក្នុងសួតទៅជារលាក ភ្នាសខាងក្នុងរបស់ទងសួតនេះទៅជាហើម ហើយក៏ឲ្យវាកាន់តែ ក្រាស់ទៅៗ រហូតដល់ផ្លូវដង្ហើមរួមតូច។ ករណីបែបនេះក៏អាចធ្វើឲ្យកើតជាទឹករំអិលកាន់តែច្រើនចេញមក រហូតដល់ពេលខ្លះស្ទះផ្លូវដង្ហើមខ្លះផង ។ ការក្អកគឺជាវិធីដែលរាងកាយព្យាយាមបញ្ចេញជាតិស្លេស្ម ឬទឹករំអិលទាំងនេះមកខាងក្រៅដើម្បីងាយស្រួលដកដង្ហើម ។
សញ្ញា សំខាន់ៗនៃជំងឺរលាកទងសួតគឺការក្អកមានស្លេស្ម ដែលអាចបន្តជាប់ជាច្រើនថ្ងៃដល់ច្រើនសប្តាហ៍ ។ រោគសញ្ញាផ្សេងទៀតអាចកើតមានដែរដូចជា៖
•អស់កម្លាំង
•ដកដង្ហើមលឺសូរដូចហួច
•តឹង ឬឈឺក្នុងទ្រូង
•ពិបាកដកដង្ហើម
ការក្តៅខ្លួនមិនមែនជាសញ្ញាធម្មតាទេ ហើយវាច្រើនតែបញ្ជាក់អំពីជំងឺរលាកសួត ឬផ្តាសាយធំ ។
ជំងឺរលាកទងសួតស្រួចស្រាល់ច្រើនតែកើតឡើងពី៣ទៅ៤ថ្ងៃក្រោយពីផ្តាសាយរួច។ វាប្រហែលជាចាប់ផ្តើមជាមួយនឹងការក្អកស្ងួត បន្ទាប់មកពីបីថ្ងៃក្រោយ ការក្អកទៅជាមានស្លេស្មវិញ ។ មនុស្សភាគច្រើនអាចមានភាពស្រួចស្រាល់នៃការរលាកទងសួតរយៈពេល២ទៅ៣សប្តាហ៍ ថ្វីបើការក្អកពេលខ្លះអាចបន្តចាប់ពី៤សប្តាហ៍ឡើយទៅក៏មានដែរ។ បើសិនជាអ្នកមានសុខភាពល្អធម្មតា សួតនឹងត្រឡប់មកសភាពធម្មតាវិញក្រោយពីអ្នកជាពីការបង្ករោគដំបូងរួច។
គ្រូពេទ្យអាចនឹងសង្ស័យថាអ្នកមានជំងឺរលាកទងសួតរ៉ាំរ៉ៃនៅពេលក្អកមានស្លេស្មច្រើនថ្ងៃរយៈពេលយ៉ាងហោចណាស់ ៣ខែក្នុងមួយឆ្នាំ រយៈពេល២ឆ្នាំជាប់គ្នា ។ ការរលាកទងសួតរ៉ាំរ៉ៃគឺជាជំងឺធ្ងន់មួយដែលធ្វើឲ្យសួតអ្នកងាយនឹងមានការបង្ករោគដោយបាក់តេរី ហើយក៏ត្រូវការការព្យាបាលជាប់យូរដែរ ។ វាគឺជាទម្ងន់ជំងឺមួយរបស់ ជំងឺស្ទះសួតរ៉ាំរ៉ៃ ដែលធ្វើឲ្យអ្នកជំងឺពិបាកដកដង្ហើម ៕
ស្រង់ពីគេហទំព័រសុខភាព
ចែករំលែកព័តមាននេះ