រាជធានីភ្នំពេញ ៖ ថ្ងៃទី២១ ខែឧសភា ឆ្នាំ២៩១៨ គឺជាថ្ងៃដែលគណៈកម្មាធិការជាតិរៀបចំការបោះឆ្នោតបានបិទបញ្ចប់ការពិនិត្យសុំចុះបញ្ជីបេក្ខជនឈរឈ្មោះរបស់គណបក្សនយោបាយ អ្វីសំខាន់នោះ គ.ជ.ប បានទទួលស្គាល់គណបក្សនយោបាយ១៦ជាផ្លូវការ ។ នេះបើតាមមន្ត្រី ជាន់ខ្ពស់គ.ជ.ប ។
លោក សោម សូរីដាអគ្គលេខាធិការរងគ.ជ.បបានឲ្យដឹងថា ចាប់តាំងពីទទួលចុះបញ្ជីបេក្ខជនឈរឈ្មោះគណបក្សនយោបាយមកគ.ជ.ប បានទទួលស្គាល់ជាផ្លូវការគណបក្សនយោបាយចំនួន១៦ ហើយមកត្រឹមត្រូវថ្ងៃនេះ ដោយគណបក្សខ្មែរអភិវឌ្ឍន៍សេដ្ឋកិច្ចត្រូវបានគ.ជ.ប ទទួលស្គាល់នៅថ្ងៃទី២១ ឧសភាជាថ្ងៃចុងក្រោយ ។
លោកបន្តថា ការទទួលស្គាល់គណបក្ស១បន្ថែមទៀតនេះនាំឲ្យចំនួនគណបក្សដែលត្រូវបានចុះបញ្ជីសម្រាប់ការប្រកួតប្រជែងការបោះឆ្នោតនាពេលខាងមុខកើនដល់១៦ គណបក្សនយោ បាយក្នុងចំណោមគណបក្សនយោបាយ២០ បានមកចុះបញ្ជីនៅគ.ជ.ប ។
លោកបញ្ជាក់ថា «ថ្ងៃនេះជាថ្ងៃចុងក្រោយនៃការពិនិត្យបេក្ខជនសុំចុះបញ្ជីគណបក្សនយោបាយ ហើយមាន១៦ បានបំពេញគ្រប់លក្ខខណ្ឌសម្រាប់ការបញ្ជីរួចហើយ ។ នៅសល់គណបក្ស៤ទៀតមិនទាន់បានបំពេញគ្រប់ ដូច្នេះរាប់ពីថ្ងៃនេះទៅគ.ជ.ប ទុកពេល៥ថ្ងៃ ដើម្បីឲ្យគណបក្សបំពេញបែបបទបន្ថែម» ។
លោកបន្តថា គណបក្សទាំង១៦ដែលត្រូវបានចុះបញ្ជីផ្លូវការរួមមានទី១- គណបក្សយុវជនកម្ពុជា ទី២- គណបក្សប្រជាជនកម្ពុជា ទី៣- គណបក្សសញ្ជាតិកម្ពុជា ទី៤- គណបក្សខ្មែររួបរួមជាតិ ទី៥- គណបក្សហ្វ៊ុនស៊ិនប៉ិច ទី៦- គណបក្សពន្លឺថ្មី ទី៧- គណបក្សប្រជាធិបតេយ្យមូលដ្ឋាន ទី៨- គណបក្សខ្មែរតែមួយ ទី៩- គណបក្សសម្ព័ន្ធ ដើម្បីប្រជាធិបតេយ្យ ទី១០- គណបក្សសំបុកឃ្មុំសង្គមប្រជាធិបតេយ្យ ទី១១- គណបក្សខ្មែរឈប់ក្រ ទី១២- គណបក្សធម្មាធិបតេយ្យ ទី១៣- គណបក្សមាតុភូមិយើង ទី១៤ – គណបក្សខ្មែរក្រោក ទី១៥- គណបក្សសាធារណរដ្ឋប្រជាធិបតេយ្យ និងទី១៦- គណបក្សខ្មែរអភិវឌ្ឍន៍សេដ្ឋកិច្ច ។
លោកអគ្គលេខាធិការរងគ.ជ.ប ក៏បានឲ្យដឹងថា គណបក្សនយោបាយចំនួន៤ដែលមិនត្រូវបានគ.ជ.ប ប្រកាសទទួលស្គាល់មានទី១- គណបក្សឆន្ទៈខ្មែរ ទី២- គណបក្សខ្មែរសាធារណរដ្ឋ ទី៣- គណបក្សរស្មីខេមរា ទី៤- គណបក្សជនជាតិដើមប្រជាធិបតេយ្យ ។
លោកក៏បានឲ្យដឹងថា គណបក្សទាំង៤នេះត្រូវបានទុកពេល៥ថ្ងៃ ដើម្បីបំពេញបែបបទដែលត្រូវបាន គ.ជ.ប ឲ្យបំពេញតែបើហួសរយៈពេលនេះ គ.ជ.ប ចាត់ទុកថា គណបក្សនយោបាយ ទាំងនោះបោះបង់ការឈរឈ្មោះបោះឆ្នោតអាណត្តិទី៦នេះ ។
សូមជម្រាបថា ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ។ គ.ជ.បបានអំពាវនាវដល់ពលរដ្ឋដែលមានឈ្មោះក្នុងបញ្ជីបោះឆ្នោត សូមអញ្ជើញទៅបោះឆ្នោតឲ្យបានគ្រប់គ្នា ព្រោះថា ការបោះឆ្នោតមានរយៈពេ ល៥ឆ្នាំម្តង ដើម្បីជ្រើសអ្នកដឹកនាំដែលខ្លួនស្រឡាញ់តាមរយៈសន្លឹកឆ្នោតមួយសន្លឹក ៕
ចែករំលែកព័តមាននេះ