ខេត្តសៀមរាប ៖ កាលពីវេលាម៉ោងប្រមាណ៦ព្រឹកថ្ងៃទី២០ ខែឧសភា ឆ្នាំ២០១៨នេះ មានករណីគ្រោះថ្នាក់ចរាចរណ៍មួយបានកើតឡើងរវាងម៉ូតូបុកជាមួយម៉ូតូ នៅលើផ្លូវជាតិលេខ៦ ស្ថិតនៅត្រង់ចំណុចមុខវិទ្យាល័យពួក ក្នុងភូមិពួកចាស់ ឃុំពួក…
ខេត្តសៀមរាប ៖ កាលពីវេលាម៉ោងប្រមាណ៦ព្រឹកថ្ងៃទី២០ ខែឧសភា ឆ្នាំ២០១៨នេះ មានករណីគ្រោះថ្នាក់ចរាចរណ៍មួយបានកើតឡើងរវាងម៉ូតូបុកជាមួយម៉ូតូ នៅលើផ្លូវជាតិលេខ៦ ស្ថិតនៅត្រង់ចំណុចមុខវិទ្យាល័យពួក ក្នុងភូមិពួកចាស់ ឃុំពួក ស្រុកពួក ខេត្តសៀមរាប ។
បើតាមលោកវរសេនីយ៍ឯកទេព ពុំសែន អធិការនគរបាលស្រុកពួកបានឱ្យដឹងថា ម៉ូតូទាំងពីរគ្រឿងខាង
លើ រួមមានម៉ូតូមួយគ្រឿងជិះគ្នាពីរនាក់ ម៉ាកហុងដាឌ្រីម ស៊េរីឆ្នាំ២០០៥ ពណ៌ក្រហម ពាក់ស្លាកលេខ សៀមរាប១B-៤៥៧៥ បើកបរដោយឈ្មោះ ឡុច ធិង ភេទប្រុស អាយុ២២ឆ្នាំ មុខរបរកម្មករសំណង់ រស់នៅភូមិត្រពាំងស្វាយ ឃុំរើល ស្រុកពួក ខេត្តសៀមរាប បានរងរបួសធ្ងន់ និងអ្នករួមដំណើរឈ្មោះ ឡុច ពៅ ភេទប្រុស អាយុ២៣ឆ្នាំ មុខរបរកម្មករសំណង់ រស់នៅភូមិ-ឃុំជាមួយគ្នា បានរងរបួសស្រាល ។ ចំណែកម៉ូតូមួយគ្រឿងទៀតជិះគ្នាពីរនាក់ដែរម៉ាកវេវ អាល់ហ្វា ពណ៌ខ្មៅ ពាក់ស្លាកលេខភ្នំពេញ១AF-៥១៤៩ បើកបរដោយឈ្មោះ ឈឿត ចំរើន ភេទប្រុស អាយុ២៣ឆ្នាំ មុខរបរសន្តិសុខព្រលានយន្តហោះ នៅភូមិប្រាសាទ ឃុំសំរោងយា ស្រុកពួក បានរងរបួសធ្ងន់ និងអ្នករួមដំណើរឈ្មោះ នៅ សម្បត្តិ ភេទស្រី អាយុ៤៦ ឆ្នាំ មុខរបរសន្តិសុខព្រលានយន្តហោះ នៅភូមិ-ឃុំជាមួយគ្នា បានរងរបួសធ្ងន់រហូតដល់ស្លាប់ ។
ប្រភពបានបន្តថា មុនពេលកើតហេតុ ម៉ូតូម៉ាកហុងដាមួយគ្រឿងជិះគ្នាពីរនាក់បើកបរក្នុងល្បឿនលឿនក្នុងទិសដៅពីលិចទៅកើត លុះដល់ចំណុចកើតហេតុខាងលើបានបុកយ៉ាងពេញទំហឹងជាមួយម៉ូតូមួយគ្រឿងទៀតជិះគ្នាពីរនាក់ដែរម៉ាកវ៉េវអាល់ហ្វាបើកបរមកពីទិសខាងកើត ហើយបម្រុងបត់ឆ្វេងមកទិសខាងលិច ដោយមិនបានប្រុងប្រយ័ត្ន បណ្តាលឱ្យអ្នកបើកបរម៉ូតូវេវអាល់ហ្វា រងរបួសធ្ងន់ ចំណែកជិះពីក្រោយបានរងរបួសធ្ងន់រហូតដល់ស្លាប់ ចំណែកអ្នកបើកបរម៉ូតូម៉ាកហុងដា រងរបួសធ្ងន់ និងអ្នកជិះពីក្រោយរងរបួសស្រាល រីឯម៉ូតូទាំងពីរគ្រឿងរងការខូចខាតផងដែរ ។
ក្រោយកើតហេតុ កម្លាំងផ្នែកជំនាញបានចុះវាស់វែងដល់ទីកន្លែងកើតហេតុភ្លាមៗផងដែរ។ បច្ចុប្បន្ន សពស្ត្រីរងគ្រោះ ត្រូវបានសមត្ថកិច្ចជំនាញប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ។ រីឯអ្នករងរបួសទាំង៣នាក់កំពុងសម្រាកព្យាបាលនៅមន្ទីរពេទ្យបង្អែកស្រុកពួក ។ ចំណែកម៉ូតូទាំងពីរគ្រឿងត្រូវបានយកមករក្សាទុកនៅអធិការដ្ឋាននគរបាលស្រុកពួក ដើម្បីចាត់ការតាមនីតិវិធី ៕
ចែករំលែកព័តមាននេះ