រាជធានីភ្នំពេញ ៖ បុរសម្នាក់ត្រូវអ្នកភូមិប្រទះឃើញដេកប្រកាច់នៅវាលស្រែសង្ស័យថា គឺជាជនអនាថាដើរខាច់បាយរហូតមានអាការៈប្រកាច់ និងសន្លប់បែបនេះតែម្ដង ហេតុការណ៍នេះបង្កឲ្យមានការភ្ញាក់ផ្អើលកាលពីម៉ោង៦និង៣០នាទីព្រឹក ថ្ងៃទី២០ ឧសភា នៅវាលស្រែត្រង់ចំណុចវត្តត្រពាំងឈូក ស្ថិតក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ ។
បុរសរងគ្រោះខាងលើមិនត្រូវបានស្គាល់អត្តសញ្ញាណនោះឡើយ បើតាមការប៉ាន់ស្មានគាត់មានអាយុប្រហែលជាង៣០ឆ្នាំ កម្ពស់ប្រហែល១,៥៥ម៉ែត្រ ក្បាលត្រង៉ោល សម្បុរ.ស ពាក់អាវពណ៌ផ្ទៃមេឃដៃវែងខាងក្រៅ អាវយឺតពណ៌ខៀវដៃខ្លីខាងក្នុង មានអក្សរអង់គ្លេស (Fly Emirate) ស្លៀកខោជើងវែងពណ៌ស និងមានពាក់ខ្សែគាថា (ខ្សែចង្កេះ) ថែមទៀតផង។
តាមអ្នកភូមិក្បែរនោះឲ្យដឹងថា កាលពីល្ងាចថ្ងៃទី១៩ ឧសភា ពួកគាត់ឃើញបុរសរងគ្រោះរូបនេះអង្គុយតែម្នាក់ឯងនៅមុខវត្តត្រពាំងឈូកនោះ ដោយមិនដឹងថាគាត់មកពីទីណានោះឡើយ។ ខណៈនោះមិនមាននរណាម្នាក់ចាប់អារម្មណ៍ទេ ព្រោះមិននឹកស្មានថា បុរសនេះគឺជាជនអនាថាទេ ស្មានថា គាត់អង្គុយលេងធម្មតា។ លុះដល់យប់ក៏មិនដឹងថា បុរសនេះមានរឿងអ្វីកើតឡើងដែរ ហើយទំនងជាគាត់អត់បានហូបបាយទឹក ទើបហេវហត់អស់កម្លាំងក៏ដេកប្រកាច់សន្លប់បែបនេះ ។ រហូតដល់ព្រឹកថ្ងៃទី២០ ឧសភា ពេលពួកគាត់ឆ្លងកាត់តាមនោះទើបប្រទះឃើញបុរសនេះដេកប្រកាច់ត្រឡប់ត្រឡិន ហើយសន្លប់បាត់ស្មារតីទៅជាហេតុបង្កឲ្យមានការភ្ញាក់ផ្អើលទាំងព្រឹក ហើយក៏មានអ្នកទៅចោមរោមមើលច្រើនដែរ ប៉ុន្តែមិនមាននរណាម្នាក់ស្គាល់នោះឡើយ។
តាមប្រភពមួយទៀតឲ្យដឹងថា នៅម៉ោងជាង៤ជិតភ្លឺមានបុរសម្នាក់ជិះម៉ូតូសណ្ដោងរ៉ឺម៉កដឹកធុងបាស់ឆ្លងកាត់ទីនោះប្រទះឃើញបុរសនោះប្រកាច់ដែរ ប៉ុន្តែមើលមិនច្បាស់ស្មានថា ជាសត្វឆ្កែពុលថ្នាំប្រកាច់ ក៏ជិះម៉ូតូហួសទៅមុខទៀត ។ ក្រោយមកក៏ប្រាប់ទៅបុរសម្នាក់ទៀតដែលចូលចិត្តបរិភោគសាច់ឆ្កែថា «ទៅមើលឆ្កែ១ក្បាលកំពុងប្រកាច់នៅមុខវត្តត្រពាំងឈូក»។ លុះពេលភ្លឺបុរសនោះទៅមើលនឹកស្មានថា បានឆ្ងាញ់មាត់ហើយ តែពេលទៅដល់ឃើញមានមនុស្សជុំៗកំពុងចោមរោមមើលបុរសរងគ្រោះសន្លប់នោះទៅវិញ។
ពេលនោះក៏មានអ្នកច្រឡំថាបុរសនេះគឺជាសាច់ញាតិខ្លួនប្រុងលើកយកទៅផ្ទះផងដែរ ប៉ុន្តែក្រឡេតពិនិត្យទៅទើបដឹងថា មិនមែនទើបលែងយកវិញ។ ក្រោយមកនគរបាលហៅរថយន្តសង្គ្រោះដឹកយកជនរងគ្រោះទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ភ្លាមៗ ហើយនគរបាលកំពុងធ្វើការស្រាវជ្រាវរកសាច់ញាតិរបស់បុរសនេះហើយ៕
ចែករំលែកព័តមាននេះ