រាជធានីភ្នំពេញ ៖ រថយន្តដឹកដែកធុនធំមួយគ្រឿង បានបើកទាក់ជាមួយនឹងខ្សែភ្លើងកាត់ទទឹងផ្លូវ បណ្តាលឱ្យរំលំបង្គោលភ្លើងសង្កត់លើរថយន្តដឹកសិស្ស នៅចំណុចផ្លូលំ ក្នុងភូមិឬស្សី សង្កាត់ស្ទឹងមានជ័យ៣ ខណ្ឌមានជ័យ កាលពីវេលាម៉ោង៣និង៣០នាទីរសៀលថ្ងៃទី១៨…
រាជធានីភ្នំពេញ ៖ រថយន្តដឹកដែកធុនធំមួយគ្រឿង បានបើកទាក់ជាមួយនឹងខ្សែភ្លើងកាត់ទទឹងផ្លូវ បណ្តាលឱ្យរំលំបង្គោលភ្លើងសង្កត់លើរថយន្តដឹកសិស្ស នៅចំណុចផ្លូលំ ក្នុងភូមិឬស្សី សង្កាត់ស្ទឹងមានជ័យ៣ ខណ្ឌមានជ័យ កាលពីវេលាម៉ោង៣និង៣០នាទីរសៀលថ្ងៃទី១៨ ខែឧសភា ឆ្នាំ២០១៨ ។
រថយន្តបង្កជារថយន្តដឹកដែកធុនធំ ម៉ាកហ៊ីយ៉ាន់ ពណ៌ក្រហម ពាក់ស្លាកលេខ ព្រះសីហនុ ៣A-៣២៥៧ រីឯរថយន្តរងគ្រោះ ជារថយន្តដឹកសិស្សសាលា ម៉ាកសាំយ៉ុង ពណ៌ស ពាក់ស្លាកលេខ ភ្នំពេញ ២AB-៨២៦៨ ។
តាមប្រភពព័ត៌មានបានឱ្យដឹងថា មុនពេលកើតហេតុ រថយន្តបង្កបើកបរតាមបណ្តោយផ្លូវលំ ក្នុងទិសដៅពីត្បូងទៅជើង លុះធ្វើដំណើរមកដល់ចំណុចកើតហេតុ ដែលជាតំបន់សម្បូរទៅដោយខ្សែភ្លើង និងខ្សែកាបកាត់ទទឹងផ្លូវជាច្រើននោះ រថយន្តបង្កបានបើកទាក់នឹងខ្សែភ្លើងមួយសំណុំធំ បណ្តាលឱ្យខ្សែភ្លើងទាញបង្គោលភ្លើងបាក់រំលំមកសង្កត់លើរថយន្តសាំយ៉ុងរងការខូចខាត ហើយខ្សែភ្លើងជ្រុះរប៉ាត់របាយ ពេញផ្លូវ ។ ក្នុងហេតុការណ៍នេះ ពុំបណ្តាលឱ្យមនុស្សណាម្នាក់រងរបួសឡើយ ព្រោះនៅក្នុងរថយន្តសាំយ៉ុងដឹកសិស្សសាលានោះ គឺពុំមានសិស្សរួមដំណើរទេ គឺមានតែអ្នកបើកបរតែម្នាក់ឯងប៉ុណ្ណោះ។ បន្ទាប់ពីកើតហេតុ អ្នកបើកបររថយន្តបង្កព្យាយាមបើកទៅមុខបានប្រមាណ៥០០ម៉ែត្រ ក៏ឈប់រថយន្ត ហើយរត់ចូលពួនសំងំក្នុងក្រុមហ៊ុនរបស់ខ្លួន ដែលមានទីតាំងក្បែរនោះដែរ ។
ក្រោយកើតហេតុ សមត្ថកិច្ចមូលដ្ឋានសហការជាមួយមន្ត្រីជំនាញចុះអន្តរាគមន៍វាស់វែង និងយករថយន្តទាំង២គ្រឿងទៅរក្សាទុកនៅ ការិយាល័យចរាចរណ៍ជើងគោកនៃស្នងការដ្ឋាននគររាជធានីភ្នំពេញ រង់ចាំដោះស្រាយតាមផ្លូវច្បាប់ ។ ចំណែកខ្សែភ្លើង និងខ្សែកាបដែលបានដាច់ធ្លាក់ពេញផ្លូវ ត្រូវបានក្រុមជំនាញ ចុះមកតភ្ជាប់ ហើយបានដំណើរការឡើងវិញផងដែរ ៕
ចែករំលែកព័តមាននេះ