រាជធានីភ្នំពេញ ៖ អាជីវករជាង១០០នាក់ ដែលជាម្ចាស់តូបជាង២០០នៅក្នុងផ្សារឯករាជ្យ២ បានប្រមូលផ្ដុំគ្នាធ្វើការតវ៉ាប្រឆាំងនឹងអ្នកគ្រប់គ្រងផ្សារខាងលើ ដោយពួកគាត់ចោទប្រកាន់ថា ដំឡើងថ្លៃអនាម័យ និង សន្តិសុខតាមតូបនីមួយៗស្រេចតែចិត្តនឹកឃើញ ។…
រាជធានីភ្នំពេញ ៖ អាជីវករជាង១០០នាក់ ដែលជាម្ចាស់តូបជាង២០០នៅក្នុងផ្សារឯករាជ្យ២ បានប្រមូលផ្ដុំគ្នាធ្វើការតវ៉ាប្រឆាំងនឹងអ្នកគ្រប់គ្រងផ្សារខាងលើ ដោយពួកគាត់ចោទប្រកាន់ថា ដំឡើងថ្លៃអនាម័យ និង សន្តិសុខតាមតូបនីមួយៗស្រេចតែចិត្តនឹកឃើញ ។ មិនតែប៉ុណ្ណោះ នៅពេលពួកគាត់មិនយល់ព្រម ស្រាប់តែអ្នកគ្រប់គ្រងផ្សារនេះ បិទភ្លើងមិនឲ្យប្រើប្រាស់ឡើយ ។ ដោយសារទទួលរងនូវការគាបសង្កត់បែបនេះទើបពួកគាត់អត់ទ្រាំលែងបាន ក៏នាំគ្នាធ្វើការតវ៉ាដើម្បីស្វែងរកយុត្តិធម៌ ។
ហេតុការណ៍នេះ បានកើតឡើងកាលពីវេលាម៉ោង៩ព្រឹកថ្ងៃទី១៦ ខែឧសភា ដែលផ្សារខាងលើស្ថិតនៅក្នុងភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ ។ ក្រុមអាជីវករនិយាយថា ពួកគាត់លក់ដូរនៅក្នុងផ្សារឯករាជ្យ២នេះជាច្រើនឆ្នាំមកហើយ ដោយអ្នកគ្រប់គ្រងផ្សារបានកំណត់យកថ្លៃសេវាអនាម័យនិងសន្តិសុខក្នុង១ខែ តូបមួយចំនួន២០ដុល្លារ ។ ពេលនោះ ពួកគាត់មិនបានប្រកែកអ្វីទេ គឺបាន អនុវត្តតាមគោលការណ៍ខាងលើរហូតមក មិនដែលមានបញ្ហាអ្វីកើតឡើងឡើយ ទើបតែពេលថ្មីៗនេះ ស្រាប់តែអ្នកគ្រប់គ្រងផ្សារបានផ្លាស់ប្តូរគោលការណ៍ចាស់ចោល ហើយដាក់ចេញនូវគោលការណ៍ថ្មីមកជំនួសវិញ ។
ប្រភពដដែលបន្តថា កាលពីពេលថ្មីៗនេះ អ្នកគ្រប់គ្រងផ្សារបានកំណត់ដំឡើងថ្លៃលើការប្រមូលសេវាអនាម័យនិងសន្តិសុខពីលើសេវាចាស់៥ដុល្លារទៀត ដែលធ្វើឲ្យសេវានេះឡើងដល់២៥ដុល្លារ ។ ពេលនោះពួកគាត់មិនបានយល់ព្រមបង់តាមការទាមទារដំឡើងថ្លៃស្រេចតែចិត្តនេះឡើយ លុះមកដល់ព្រឹកថ្ងៃទី១៦ ខែឧសភាស្រាប់តែអ្នកគ្រប់គ្រងផ្សារបិទភ្លើងឈប់ឲ្យប្រើ ដែលធ្វើឲ្យរំខាននិងប៉ះពាល់ការលក់ដូររបស់ពួកគាត់យ៉ាងខ្លាំង ។ ដោយអត់ទ្រាំចំពោះការគាបសង្កត់នេះលែងបាន ទើបពួកគាត់នាំគ្នាប្រមូលផ្ដុំធ្វើការតវ៉ាទាមទាររកយុត្តិធម៌ ។
ទាក់ទងទៅនឹងហេតុការណ៍នេះ មិនអាចសុំការបំភ្លឺពីអ្នកគ្រប់គ្រងផ្សារបានទេ ហើយបន្ទាប់ពីអាជីវករផ្ទុះការតវ៉ា អាជ្ញាធរសង្កាត់ចោមចៅ៣បានចុះទៅសម្របសម្រួលឲ្យពួកគាត់មានការស្ងប់ស្ងាត់សិន និងឲ្យអ្នកគ្រប់គ្រងផ្សារបើកភ្លើងឡើងវិញ រង់ចាំការដោះស្រាយនៅពេលក្រោយ ៕
ចែករំលែកព័តមាននេះ