ឃើញស្ទង់ៗស្មានជាសត្វព្រៃ…មនុស្សសោះ
- ព្រះវិហារ
ខេត្តព្រះវិហារ ៖ ជាការចៃដន្យដ៏អាក្រក់មួយ បណ្តាលឱ្យជនរងគ្រោះឈ្មោះ អួន រ៉ាវី ភេទប្រុស អាយុ២៥ឆ្នាំ រស់នៅភូមិប្រមេរុ ឃុំប្រមេរុស្រុកត្បែងមានជ័យបានស្លាប់បាត់បង់ជីវិត…
ខេត្តព្រះវិហារ ៖ ជាការចៃដន្យដ៏អាក្រក់មួយ បណ្តាលឱ្យជនរងគ្រោះឈ្មោះ អួន រ៉ាវី ភេទប្រុស អាយុ២៥ឆ្នាំ រស់នៅភូមិប្រមេរុ ឃុំប្រមេរុស្រុកត្បែងមានជ័យបានស្លាប់បាត់បង់ជីវិត ខណៈបញ្ជូនមកដល់មន្ទីរពេទ្យបង្អែក១៦ មករា ក្រុងព្រះវិហារ ដោយសារតែត្រូវគ្រាប់កាំភ្លើងច្នៃ នៅវេលាម៉ោងជិត១១យប់ថ្ងៃទី១៥ ឧសភា ស្ថិតនៅចំណុចស្រែព្រាល ខាងកើតភូមិប្រមាណជា១៥គីឡូម៉ែត្រ ។ ការត្រូវគ្រាប់កាំភ្លើងច្នៃនេះ គឺពួកគេ ជាព្រានព្រៃបានដើរប្រមាញ់សត្វព្រៃពេលយប់ ប៉ុន្តែពេលបាញ់មិនត្រូវសត្វ ក៏ត្រូវចំគ្នាឯងទៅវិញ ។
តាមសម្តីលោកវរសេនីយ៍ឯក ឆយ បូរិន នាយសេនាធិការនៃស្នងការដ្ឋាននគរបាលខេត្តបានប្រាប់កោះ សន្តិភាព នៅព្រឹកថ្ងៃទី១៦ ឧសភា ថា មូលហេតុដែលនាំឱ្យជនរងគ្រោះខាងលើស្លាប់ ដោយសារតែបុរសនោះ និងបក្សពួកម្នាក់ទៀតបាននាំគ្នាចូលព្រៃដើររកបាញ់សត្វ ។ ពេលនោះ ជនរងគ្រោះបានប្រទះឃើញសត្វ ក៏ដើរសំដៅទៅយ៉ាងរហ័ស ។ រីឯបក្សពួកម្នាក់ទៀត នៅពីក្រោយខ្នងក៏លើកកាំភ្លើងកែច្នៃម៉ាកការាប៊ិនប្រុងនឹងបាញ់សត្វ ក៏ស្រាប់តែរាលកៃផ្ទុះ២គ្រាប់ផ្ទួនៗគ្នា ហោះទៅចំកណ្តាលក្បាលគ្នាឯងមួយគ្រាប់ និងថ្ពាល់មួយគ្រាប់ហូរឈាមជោកខ្លួន ។ ឃើញសភាពបែបនេះ អ្នកកាន់កាំភ្លើងច្នៃក៏បាននាំជនរងគ្រោះត្រឡប់ទៅភូមិវិញ រួចបញ្ជូនទៅសង្គ្រោះនៅមន្ទីរពេទ្យបង្អែក១៦មករា ក្រុងព្រះវិហារ តែជាអកុសលជនរងគ្រោះបានដាច់ខ្យល់ស្លាប់ពេលបញ្ជូនដល់មន្ទីរពេទ្យ ។
លោកវរសេនីយ៍ឯក ឆយ បូរិន បានបន្តថា ក្រោយពេលកើតហេតុភ្លាម សមត្ថកិច្ចក៏បានឃាត់ខ្លួនអ្នកប្រើកាំភ្លើង ឈ្មោះ សុខ វ៉ាន់ឌីន អាយុ២១ឆ្នាំ រស់នៅភូមិឃុំជាមួយជនរងគ្រោះខាងលើទៅកាន់អធិការដ្ឋាននគរបាលស្រុកត្បែងមានជ័យ ដើម្បីសាកសួរ និងកសាងសំណុំរឿងចាត់ការតាមនីតិវិធី ។
គួរកត់សម្គាល់ថា ការដើរបរបាញ់សត្វនេះ គឺជាទំនៀមទម្លាប់របស់អ្នកភូមិដែលរស់នៅក្បែរព្រៃ តែងតែយកពេលទំនេរពីការធ្វើស្រែ និងដាំដំណាំចូលព្រៃបរបាញ់សត្វយកមកធ្វើម្ហូបអាហារ ដោយមិនមានការលក់ដូរនោះទេ ហើយសត្វដែលបរបាញ់បានពីក្នុងព្រៃមានជ្រូកព្រៃ ឬក៏សត្វឈ្លូស និងសត្វព្រៃមួយចំនួនទៀត ។ ទោះជាយ៉ាងណា ការប្រើប្រាស់អាវុធច្នៃពីកាំភ្លើងការាប៊ីននេះ គឺប្រឈមនឹងគ្រោះថ្នាក់ណាស់ ព្រោះមិនមានសោចាក់ទេ បើធ្វេសប្រហែសតែបន្តិចកៃកាំភ្លើងនេះនឹងលោត ហើយគ្រាប់នឹងហោះទៅភ្លាមអត់ប្រាប់ម្ចាស់ទេ ។
ចែករំលែកព័តមាននេះ