ខេត្តកំពត ៖ រយៈពេល២ថ្ងៃចាប់ពីថ្ងៃទី១៣ ដល់ថ្ងៃទី១៤ ខែឧសភា ឆ្នាំ២០១៨ ជាថ្ងៃបុណ្យចំរើនព្រះជន្មព្រះមហាក្សត្រ បរមនាថ សីហមុនី ព្រះមហាក្សត្រនៃព្រះរាជាណាចក្រកម្ពុជា គំរប់៦៥ព្រះវស្សាឈានចូល៦៦ព្រះវស្សា នេះនៅតំបន់រមណីដ្ឋាននានានៅក្នុងទឹកដីខេត្តកំពត សង្កេតឃើញភ្ញៀវទេសចរមកពីតាមបណ្តាខេត្តនានា និងរាជធានីផងដែរ បានធ្វើដំណើរតាមយានយន្តគ្រប់ប្រភេទរបស់បងប្អូន នាំក្រុមគ្រួសារមកលេងកំសាន្តនៅតំបន់ទេសចរណ៍ធម្មជាតិក្នុងទឹកដីកខេត្តកំពតយ៉ាងសប្បាយរីករាយ ។
លោក សយ ស៊ីណុល ប្រធានមន្ទីរទេសចរណ៍ខេត្តបានឲ្យដឹងថា រយៈពេលពីរថ្ងៃនេះភ្ញៀវទេសចរមកពីតាមបណ្តាខេត្ត និងរាជធានីភ្នំពេញផង មកលេងកំសាន្តតាមតំបន់រមណីដ្ឋាននានា នៅក្នុងទឹកដីខេត្តកំពត មានចំនួនប្រមាណជាង២ម៉ឺននាក់ រួមនឹងយានយន្តគ្រប់ប្រភេទសរុបប្រមាណជាង៤ពាន់គ្រឿង ។ លោកបានបន្តទៀតថា ទន្ទឹមនឹងការមកលេងកំសាន្តរបស់ភ្ញៀវដែលគួរឲ្យកត់សំគាល់ខាងលើ ដោយសារនៅក្នុងទឹកដីខេត្តកំពតមានតំបន់រមណីដ្ឋានបែបធម្មជាតិច្រើនដូចជា រមណីដ្ឋានភ្នំបូកគោ(ឋានសួគ៌កគោ) រមណីដ្ឋានទឹកឈូ រមណីដ្ឋានកោះតាដា រមណីដ្ឋានអន្លង់ធំស្ថិតក្នុងឃុំព្រែកត្នោត ។
ក្រៅពីនោះមានរមណីដ្ឋានថ្មីៗបែបធម្មជាតិមួយចំនួនទៀតផងដែរ ដែលបច្ចុប្បន្នទាំងភ្ញៀវជាតិ និងអន្តរជាតិកំពុងមានការចាប់អារម្មណ៍យ៉ាងខ្លាំង ដូចជារមណីដ្ឋានដូងទេរ រមណីដ្ឋានតំបន់ឆ្នេរខ្សាច់ភ្នំដូង ស្ថិតក្នុងសង្កាត់ត្រើយកោះ ក្រុងកំពត រមណីដ្ឋានសហគមនេសាទត្រពាំងសង្កែ ស្ថិតក្នុងឃុំត្រពាំងសង្កែ ស្រុកទឹកឈូ និងមានរមណីដ្ឋានថ្មីៗមួយចំនួនទៀតដែលភ្ញៀវកំពុងតែមានការចាប់អារម្មណ៍ទៅលើតំបន់នោះ ៕
ចែករំលែកព័តមាននេះ