រាជធានីភ្នំពេញ ៖ បើតាមការសិក្សាស្រាវជ្រាវរបស់ធនាគារពិភពលោកប្រចាំកម្ពុជា បានបង្ហាញថា កម្ពុជានៅខ្វះខាតកម្លាំងពលកម្មជំនាញច្រើន ដែលត្រូវការឲ្យរាជរដ្ឋាភិបាល បណ្ដុះបណ្ដាលជំនាញបន្ថែមទៀត ដោយមិនចាំបាច់រង់ចាំការបណ្ដុះបណ្ដាលពីវិស័យឯកជនឡើយ ។
បើតាមប្រសាសន៍លោក លី សូដេត សេដ្ឋវិទូជាន់ខ្ពស់នៃធនាគារពិភពលោកប្រចាំកម្ពុជាថា ការបណ្ដុះបណ្ដាលធនធានមនុស្សសម្រាប់វិស័យការងារនៅក្នុងប្រទេសកម្ពុជា គួរតែរាជរដ្ឋាភិបាលជាអ្នកធ្វើឲ្យបានច្រើនជាងវិស័យឯកជន ព្រោះវិស័យឯកជនមិនអាចគ្រប់គ្រងជំនាញនានាដែលមានតម្រូវការនៅលើទីផ្សារគ្រប់គ្រាន់ទេ ។
លោកបន្តថា វិស័យឯកជនក៏ត្រូវតែចូលរួមបណ្ដុះបណ្ដាលជំនាញដល់ធនធានមនុស្សកម្ពុជាដែរ ក៏ប៉ុន្តែពួកគាត់មិនអាចបណ្ដុះបណ្ដាលបានទាំងអស់ទេ ណាមួយត្រូវការចំណាយទុនច្រើនដើម្បីបណ្ដុះបណ្ដាល ហើយនៅពេលម្ចាស់សហគ្រាសបណ្ដុះបណ្ដាលជំនាញដល់បុគ្គលិកខ្លួនបានចេះហើយនោះ ក៏មិនប្រាកដថា ពួកគេនៅធ្វើការជាមួយបានយូរកម្រិតណាដែរ ។ ពួកគេអាចនឹងទៅរកក្រុមហ៊ុនថ្មី ឬសហគ្រាសថ្មីផ្សេងទៀត ដែលហ៊ានចំណាយប្រាក់ខែឲ្យបុគ្គលិកច្រើនជាងក្រុមហ៊ុនចាស់ ។ លោកថា ៖« វិស័យឯកជនគួរតែចងក្រងគ្នាជាបណ្ដាញ និងចូលរួមបណ្ដុះបណ្ដាលធនធានមនុស្សជំនាញផ្សេងៗ ដើម្បីយកទៅបម្រើការទៅតាមសហគ្រាសរបស់ខ្លួន បើក្នុងករណីខ្លួនមិនអាចបណ្ដុះបណ្ដាលតែម្នាក់ឯងបាន » ។
លោកបន្តទៀតថា ៖« បច្ចុប្បន្ននេះ កម្ពុជាជាប្រទេសដែលខ្វះខាតកម្លាំងពលកម្មជំនាញច្រើនជាងគេមួយក្នុងចំណោមប្រទេសក្នុងតំបន់។ ប្រទេសណាក៏ដូចគ្នាដែរ គឺសុទ្ធតែខ្វះខាតជំនាញដូចគ្នា គ្រាន់តែការខ្វះខាតជំនាញនោះមានតិចមានច្រើនប៉ុណ្ណោះ » ។
លោកបន្ថែមថា បច្ចុប្បន្ននេះ កម្ពុជាមានក្រុមហ៊ុនធំៗដែលផ្ដល់ការងារដល់បុគ្គលិកបានច្រើន គឺមានតិចតួចប៉ុណ្ណោះ ចំណែកក្រុមហ៊ុនលក្ខណៈតូចៗ ឬហៅថា សហគ្រាសខ្នាតតូចនិងមធ្យម មានច្រើន ក៏ប៉ុន្តែបានផ្ដល់ការងារដល់ធនធានមនុស្សតិចតួចប៉ុណ្ណោះ ។ លោកថា ៖« មិនមានតួលេខច្បាស់លាស់ទេពាក់ព័ន្ធនឹងបរិមាណក្រុមហ៊ុនធំៗ និងក្រុមហ៊ុនតូចៗ តែបើតាមការប៉ាន់ស្មាន វត្តមានក្រុមហ៊ុនធំៗដែលអាចផ្ដល់ការងារដល់ពលរដ្ឋបានច្រើន មានតែជាង១០%ប៉ុណ្ណោះ » ។
លោកស្រី អុីហ្គូដា ដូប្រាចា នាយិកាគ្រប់គ្រងធនាគារពិភពលោកប្រចាំប្រទេសកម្ពុជា បានមានប្រសាសន៍ផងដែរថា ដើម្បីរក្សាឲ្យកំណើនសេដ្ឋកិច្ចរឹងមាំ ប្រទេសកម្ពុជាត្រូវវិនិយោគបន្ថែមទៀតទៅលើវិស័យអប់រំ និងបណ្តុះបណ្តាលជំនាញ ហើយស្របគ្នានេះដែរ ត្រូវប្រឹងរកដំណោះស្រាយដល់ឧបសគ្គនានា ដែលធុរកិច្ចធុនតូច និងមធ្យម កំពុងជួបប្រទះ ។ លោកស្រីថា ៖« ការវិនិយោគទៅលើមនុស្ស គឺជាជម្រើសដ៏ប្រសើរបំផុតសម្រាប់ឈានទៅកាន់អនាគតមួយកាន់តែចម្រុងចម្រើន » ។
គួរបញ្ជាក់ថា បច្ចុប្បន្ននេះ រាជរដ្ឋាភិបាលកម្ពុជាបាននិងកំពុងសហការជាមួយបណ្ដាដៃគូក្នុងនិងក្រៅស្រុក ដើម្បីបណ្ដុះបណ្ដាលធនធានមនុស្សលើជំនាញផ្សេងៗ ។ ជាក់ស្ដែង ថ្មីៗនេះ ភាគីចិនក៏បានសន្យាបណ្ដុះបណ្ដាលជំនាញទេសចរណ៍ដល់ធនធានមនុស្សកម្ពុជាផងដែរ ហើយកន្លងមកនេះ ភាគីកូរ៉េ និងជប៉ុន ក៏បានសហការជាមួយស្ថាប័នអប់រំកម្ពុជា ដើម្បីបណ្ដុះបណ្ដាលសិស្ស-និស្សិតលើជំនាញបច្ចេកទេសដូចជា ជួសជុលរថយន្ត មេកានិក និងអេឡិចត្រូនិក ជាដើម ៕
ចែករំលែកព័តមាននេះ